Impamvu ibigo n’amashuri bikwiriye guteganya ingengo y’imari yo kugura ibitabo buri mwaka

Yanditswe na Hategekimana Richard
Kuya 23 Ukuboza 2020 saa 08:02
Yasuwe :
0 0

Abanditsi bo mu bihugu byateye imbere baterwa ishema no kubona ibitabo bandika bigurwa, bigasomwa ndetse bikanakoreshwa mu buzima bwa buri munsi bw’abenegihugu.

Mu ngengo y’Imari y’ibyo bihugu ntihashobora kuburamo amafaranga yo kugura ibitabo bijya mu masomero y’ibigo byabo.Amashuri makuru na za Kaminuza zabo ntihashobora kubura amafaranga yo kugura ibitabo by’abanditsi haba ibitabo biboneka kuri murandasi cyangwa ibitabo bisanzwe bifatwa mu ntoki.

Abanditsi b’u Rwanda bashimira cyane ko igihugu kidahwema mu igenamigambi kugaragaza ko ubukungu bw’igihugu bugomba kuba bushingiye ku bumenyi(Economy based knowledge) kandi nibyo kuko ibihugu by’icyitegererezo nka Singapore ubukungu bwabyo bushingiye ku bumenyi, kandi imwe mu isoko y’ubumenyi ni ibitabo.

Icyakora, abanditsi nyarwanda bibaza impamvu mu nzego zimwe na zimwe mu igenamigambi ryabo hatabamo ingengo y’Imari yo kugura ibitabo. Bibaza impamvu za Kaminuza zimwe na zimwe mu ngengo y’Imari yabo hatagaragaramo amafaranga yo kugura ibitabo.

Ese niba Kaminuza zimwe na zimwe zidashobora kugura ibitabo by’abanditsi b’u Rwanda , iki kibazo cyakemuka gute? Hari umuyobozi muri Kaminuza imwe duherutse kuganira, ambwira ko nta ngengo y’imari yo kugura ibitabo bateganyije uyu mwaka kubera ingaruka za Covid-19.

Nibyo Covid yahungabanyije ubukungu, ariko ntibikuraho ko amashuri amwe yafunguye ndetse n’igihe abanyeshuri bari bari mu rugo, amashuri yabo yakomeje kubakurikirana hifashishijwe ikoranabuhanga. Ibi byumvikanisha ko ibitabo ari ngombwa, byaba iby’ikoranabuhanga n’ibisanzwe bifatika.

Abanditsi b’u Rwanda ntibazahwema gukomeza gushimira Nyakubahwa Perezida wa Repubulika kuko impanuro yabahaye harimo ko Abanyarwanda tugomba kwiyandikira amateka kuko ayacu yanditswe n’abanyamahanga kandi bakayagoreka.

Abanditsi bazirikana ko kugira ngo igihugu gitere imbere ko ari ngombwa kugira ibitabo byandikwa kugira ngo bifashe ab’uyu munsi n’ab’ejo hazaza kurushaho kubaka igihugu.

Urugaga rw’Abanditsi mu Rwanda rushimira cyane bimwe mu bigo n’inzego zinyuranye bazirikana agaciro k’ibitabo bikajya mu igenamigambi ryabo ariko rugasaba ibindi bigo binyuranye kujya bazirikana agaciro k’ibitabo mu iterambere ry’Igihugu.

Kubaka u Rwanda ndetse n’Afurika dushaka bisaba kugira ubumenyi kandi ubumenyi tubukura mu bushakashatsi buba bwakozwe bukajya mu bitabo.
Za Kaminuza n’andi mashuri bakwiriye guteganya ingengo y’imari yo kugura ibitabo bifasha abana b’u Rwanda kugira ubumenyi buzatuma bubaka urwababyaye.
Abakozi mu nzego zinyuranye bakeneye ibitabo bibafasha kurushaho kugira ubumenyi bwo kunoza akazi kabo.

Urugaga rw’Abanditsi ntiruhwema iteka gusaba ko mu masomero yo mu Rwanda hakwiye kubamo ibitabo byanditswe mu Kinyarwanda. Birababaje kuba mu masomero menshi mu gihugu huzuyemo ibitabo byanditswe mu ndimi z’amahanga.

Imiryango Nyarwanda Itari iya Leta bafata ingengo y’Imari yo kugurira abaturage ibitabo byanditswe mu ndimi z’amahanga kandi bamwe muri abo Banyarwanda batazi izo ndimi. Abaturage bakeneye ibitabo bibafasha gukemura ibibazo bahura nabyo mu buzima bwa buri munsi, ibitabo bibongerera indangagaciro na Kirazira mu iterambere ry’Igihugu.

Igenamigambi ryubaka u Rwanda, ni igenamigambi rigena amafaranga yo kugura ibitabo bizashingirwaho mu iterambere rirambye ry’Igihugu, ni igenamigambi tuzirikana ko igitabo ari isooko y’ubumenyi, ni igenamigambi rizirikana ko ubushakashatsi bukorwa busubiza ibibazo binyuranye bibangamiye iterambere ry’Igihugu, ni igenamigambi rizirikana ko abana b’u Rwanda bakeneye guhora basoma ibitabo n’inyandiko bishya byasohotse bikabafasha kwiyungura ubumenyi.

Ibi ni ibitekerezo bya HATEGEKIMANA Richard
Umuyobozi w’Urugaga rw’Abanditsi mu Rwanda,
E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .