00:00:00 IGIHE NETWORK KN KINYARWANDA EN ENGLISH FR FRANCAIS

Ikinyoma gishingiye kuri Pegasus, inkuru zakwijwe n’itangazamakuru nta bimenyetso

Yanditswe na Albert Rudatsimburwa
Kuya 23 Nyakanga 2021 saa 10:42
Yasuwe :
0 0

Muri iki Cyumweru ibitangazamakuru bitandukanye byatangaje inkuru yaje ari nk’igisasu gikomeye, ishinja ibihugu byinshi gukoresha Pegasus, porogaramu yifashishwa mu kumviriza abantu, by’umwihariko impirimbanyi z’uburenganzira bwa muntu n’abanyamakuru.

U Rwanda ni kimwe mu bihugu bya Afurika byashinjwe gukoresha iyo porogaramu. Tariki 19 Nyakanga, The Guardian yatangaje inkuru ifite umutwe ugira uti “Hotel Rwanda activist’s daughter placed under Pegasus surveillance” (Umukobwa w’impirimbanyi yamenyekanye muri Hotel Rwanda yanetswe hifashishijwe Pegasus). Ni mu gihe The Washington Post yatangaje ko Jean Paul Turayishimiye, umukozi wa RNC uba muri Leta Zunze Ubumwe za Amerika na we yibasiwe.

Mu buryo butangaje, u Rwanda nirwo rwibanzweho cyane na Amnesty International. Uwo muryango wasohoye itangazo rifite umutwe ugira uti “Rwanda authorities chose thousands of activists, journalists and politicians to target with NSO spyware,” (Abayobozi b’u Rwanda bakoresheje porogaramu y’ubutasi ya NSO mu kwinjirira impirimbanyi, abanyamakuru n’abanyapolitiki). Ni inkuru na yo yasohotse tariki 19 Nyakanga. Izi nkuru zose zihuriye ku kintu kimwe, “Nta kimenyetso simusiga zerekana” ko koko telefone z’abo bantu zaba zarinjiwemo, ni ukwandika gusa bashinja.

Raporo ivuga ko ku Isi hose, abantu 50 000 bibasiwe n’ibitero bya Pegasus. Muri bo, Amnesty International yabashije kwinjira muri telefone z’abantu 67 irazisuzuma, hanyuma 37 koko bazisangana ibimenyetso by’uko zinjiwemo na Pegasus.

Umuyobozi wa NSO, Shalev Hulio, ikigo cyakoze Pegasus, yavuze ko “Hari ibintu bidasobanutse kandi bitumvikana na mba muri iryo perereza rya Amnesty”.

Yakomeje agira ati “Ntabwo twigeze duhabwa urutonde rwose rw’izo nimero 37 bavuga ko zibasiwe na Pegasus. Batwoherereje zimwe muri zo. Mu zo baduhaye, nta n’imwe twigeze dusanga hari aho ihuriye na Pegasus”.

U Rwanda rwavuze ko iryo koranabuhanga ntaryo rugira. Minisitiri w’Ububanyi n’Amahanga, Dr Vincent Biruta yabwiye The Washington Post ko “u Rwanda rudakoresha iyo porogaramu kandi ko ubwo bushobozi ntabwo rufite. Ibi birego bihimbano ni kimwe mu bukangurambaga bugamije guteza umwuka mubi hagati y’u Rwanda n’ibindi bihugu no gukwirakwiza ibihuha ku Rwanda haba imbere mu gihugu no mu ruhando mpuzamahanga.”

Nyamara koko biramutse ari byo ko u Rwanda rutunga iyo porogaramu, rwakabaye ruza ku rutonde rw’ibihugu 45 bikoresha iryo koranabuhanga mu gukumira ‘iterabwoba n’ibyaha’ kandi Hulio yagaragaje ko ibyinshi mu bihugu biruriho ari iby’i Burayi.

Yavuze ko hari ibihugu 90 banze gukorana na byo kuko bitujuje ibisabwa ngo bikoreshe Pegasus n’ibyayikoresheje nabi bikaba ngombwa ko amasezerano na NSO ahagarikwa. Yavuze ko NSO yemerera “porogaramu zayo gukoreshwa n’ibihugu byubahiriza uburenganzira bwa muntu kandi ibyo bikorwa nyuma y’igenzura rikomeye.”

Guhirika ikibuye ngo rubanda irangare!

Ikintu gitangaje cyane ku bantu 3500 u Rwanda rushinjwa gutata, itangazamakuru ryihutiye kwifashisha mu nkuru zaryo abantu batari ku rutonde. Ni abantu ahubwo bamaze kumva iyi nkuru ishyushye, batwaye nimero zabo kuri Amnesty International basaba ko nabo bashyirwa ku rutonde no muri raporo.

Na nyuma yo kumenya ko batari mu binjiriwe muri telefone, ibinyamakuru byarabyirengagije byandika inkuru zifite imitwe ishitura, byemeza ko rwose binjiriwe, byirengagiza ukuri.
Abakobwa ba Rusesabagina ni bamwe mu bahise basamira hejuru ayo mahirwe yo kuvugwa muri izo nkuru, birukira kuri Amnesty International bizeye ko bashobora kubyifashisha bashyira igitutu kuri Guverinoma igafungura se uri mu rubanza rw’abashinjwa iterabwoba.

The Guardian yanditse ko “Nta kimenyetso cy’uko telefone ya Anaise Kanimba yaba yarinjiriwe”. Byari nyuma yo kumenya ko uwo mukobwa wa Rusesabagina ari umwe mu birukankanye telefone zabo kuri Amnesty International ngo bamurebere ko itumvirijwe.

The Washington Post yatangaje ko undi mukobwa wa Rusesabagina, Carine Kanimba na we yirukankanye telefone ye kuri Amnesty International, akabinginga ngo bemeze ko na we telefone ye yumvirijwe.

Ntibyagarukiye aho, abambari ba RNC barimo Jean Paul Turayishimiye, David Himbara wahoze ashinzwe ubutasi muri RNC akaba n’umucengezamatwara wayo nabo ntibatanzwe.

Icyakora ubwo Turayishimiye yasabwaga kwerekana telefone ye ngo hagenzurwe ko yinjiriwe, yarayibuze. Washington Post yanditse ko yavuze ko “ iPhone ye yatakaye, bituma bidakunda ko isuzumwa”. Igitangaje, ni uburyo Washington Post itamubajije icyemeza ko ibyo avuga ari ukuri mu gihe bizwi ko atajya imbizi na Leta y’u Rwanda, ashobora kuyibeshyera.

Himbara we yaje ari agatangaza. The Guardian yaranditse iti “Igenzura rya gihanga ryakorewe kuri telefone ya Himbara rikozwe na Amnesty International, nta kimenyetso na kimwe ryagaragaje cy’uko yaba yarinjiriwe”. Nyamara ibyo ntibyabujije abacengezamatwara b’i Kampala kubyifashisha, basubiramo ibinyoma Himbara yirirwa yandika ku rubuga rwe agamije guhindanya isura y’u Rwanda.

Muri make, Pegasus si akumiro nk’uko Amnesty International n’itangazamakuru byashatse kubyerekana, ahubwo ni undi mugambi wacuzwe ugamije gushyira igitutu kuri Leta y’u Rwanda ngo irekure intwari yabo, Rusesabagina.

Carine na Anaise nta wabarenganya kwifashisha ibinyoma ngo bacungure se utarigeze abigisha agaciro k’ubutabera. Himbara na Turayishimiye bo ni ibikoresho mu bukangurambaga bugamije gufunguza ukekwaho iterabwoba kugira ngo inzirakarengane z’iryo terabwoba zimwe ubutabera.

Rusesabagina ukurikiranyweho ibyaha by'iterabwoba byakorewe ku butaka bw'u Rwanda bigahitana inzirakarengane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .