00:00:00 IGIHE NETWORK KN KINYARWANDA EN ENGLISH FR FRANCAIS

Igikenewe ngo intambara ya Ukraine n’u Burusiya irangire

Yanditswe na Rutwaza Rodrigue
Kuya 12 Ukwakira 2022 saa 06:26
Yasuwe :

Ubwanditsi: Ibikubiye muri iyi nkuru, ni ibitekerezo bwite by’umwanditsi Rutwaza Rodrigue

Mu gitondo cyo kuwa 24 Gashyantare 2022, nibwo u Burusiya bwatangaje ko bugiye gukora ibikorwa bya gisirikare byihariye bigamije kurwanya Guveroma y’abanazi muri Ukraine (special Military operation of demilitarize and De-nazification of Ukraine).

Tuvuge ko ibyo Putin yaregaga Guverinoma ya Ukraine ari ukuri, ariko se ni gute Igihugu gikorera ibikorwa bya gisirikare mu kindi nta burenganzira cyabigihereye? Ese umuntu wese uzi cyangwa uvuga ururimi rw’Ikirusiya aho yaba ari hose u Burusiya buramushinzwe nubwo yaba ari umuturage w’ikindi gihugu?

Njye mbona ko iyi impamvu ari urwitwazo kuko ibibazo byose Ukraine nk’igihugu kigenga yagira imbere mu gihugu mu gihe bitigeze birenga imbibi zayo ngo bivogere imbibi z’u Burusiya, numva uburyo bwose bwo kubiikemura bukwiye kuba uburyo bwite bw’icyo gihugu n’abandi kiyambaje. Aha Ukraine ntiyigeze itabaza u Burusiya kubafasha gukemura ibibazo byari imbere mu gihugu.

Nagira ngo mbibutse ko Iyi si ifite uko iyoborwa byumvikanweho kandi bishyirwa mu mahame shingiro y’Umuryango Mpuzamahanga (Loni), bavuga ko buri gihugu ari ntavogerwa. Buri gigihu gifite ubudahangarwa n’ubusugire bungana n’ubw’ikindi gihugu hatitawe ku ngano cyangwa gukomera mu ubukungu no mu mbaraga za gisirikare.

Mu gihe Ukraine yari kuba yananiwe gukemura ibibazo byayo, hari kwitabazwa amategeko mpuzamahanga biciye mu miryango y’akarere Ukraine iherereyemo cyangwa imiryango mpuzamahanga.

Kwinjira ku butaka bwa Ukraine ntibikwiye kwitwa ibikorwa byihariye bya gisikare ahubwo bikwiye kwitwa gutera Ukraine cyangwa gushoza intambara, kuvogera imbibi z’igihugu. Ni ugukandagira ubusugire bw’ikindi gihugu. Nibyo u Burusiya bwakoze kuri Ukraine bibatizwa andi mazina.

Abantu nagiye mbona bashyigikira iki gikorwa kigayitse u Burusiya bwakoze. Abenshi bagiye bashingira ko ngo na Amerika n’ibihugu by’ibihangange bijya bikora n’ibyo u Burusiya bwakoze, bikivanga mu bibazo bwite bw’ibihugu cyangwa bigashoza intambara mu bindi, bityo rero ngo n’u Burusiya bubikoze buharanira gukomera n’inyungu zabwo bwite nta cyaha. M

u mboni yanjye mbona ikibi kidakwiye gusobanuzwa ikibi cy’undi. Ni ibyo kunengwa tutitaye k’ubikoze wese cyangwa uwigeze kubikora.

Nk’Umunyafurik, nababajwe n’imvugo iherutse ya Minisitiri w’ububanyi n’amahanga w’u Burusiya Sergey Lavrov, aho yagize ati “Ubuzwa gusinzira n’amakimbirane y’u Burusiya na Ukraine, namuha inama n’umuti wamufasha, ishyiremo ko ibi birimo kuba muri Afurika, ishyiremo ko biri kubera mu Burasirazuba bwo hagati, ishyiremo ko Ukraine yahindutse Palestine, u Burusiya bukaba Amerika”.

Ibi bishatse kuvuga ko u Burusiya ntaho batandukaniye n’uwagiriye nabi Afurika cyangwa uwagiriye nabi Palestine. Mu yandi magambo, ‘barahadutanze natwe dufata ahatwegereye cyangwa ahasigaye’.

Abayobozi ba Afurika ntibakwiriye kugwa mu mutego wose u Burusiya bwabashyiramo bwerekana ko bushaka kudukura munsi ya mpatsibihugu y‘Abanyaburayi na Amerika kuko bose nta mpuhwe badufitiye. Afurika ikwiriye guharanira politike yungukira impande zombi (win-win game) aho guhora muri politike yo gucinya inkoro, gutega amaboko gushyigikira aba cyangwa bariya. Dukwiriye gukora politike yo kwishyira ukizana kandi ikemura ibibazo by’abatuye Afurika.

U Burusiya, umugabo urya utwe akarya n’utw’abandi

Kenshi mu mvugo z’abayobozi b’u Burusiya bagiye bacikwa mu magambo bagaragaza ko Ukraine idakwiye kuba iriho, bagambiriye kwisubiza ubutaka bwabo cyangwa kugarura imbibi z’icyahoze Leta Zunze Ubumwe z’Abasoviyeti (USSR). Ubona ko iyi ntego batangiye kuyigeraho muri 2014 ubwo biyeguriraga igice cy’ubutaka bwa Crimea. Babigizeho kandi igihe bateraga igihugu cya Georgia bakigarurira ibice by’ubutaka bwayo nka Abkhazia na Ossetia y’Amajyepfo bigize 20% y’igihugu cyose . Barongeye batera Modova biyegurira igice cya Transnistria

Kuvuga ko Intego nyamukuru y’u Burusiya ari ukugira ngo Ukraine n’ibindi bihugu bituranyi ntibibe ibinyamuryango wa NATO, kubyemera ni ukureba hafi kuko nubwo nayo ari imwe mu mpamvu, siyo nyamukuru kuko byongeye kwigaragaza igihe ejobundi bakoreshaga amatora ya kamarampaka mu duce tune twa Ukraine bigaruriye, kugira ngo babone uko batwomeka ku Burusiya nubwo ingabo z’u Burusiya zitagenzuraga utu duce twose.

Nkuko tubibona ahandi, ibice bikeneye kwiyomora ku bihugu byabo akenshi baba bifuza gutangira ibihugu byigenga. Ntaho wapfa kubona agace gashaka kuva ku gihugu kimwe ngo kiyomeke ku kindi gihugu.

Byarashobokaga ko iyo koko abo baturage bari kuba bagowe bari guharanira kwibohora ngo bigenge ariko u Burusiya bwabikoze bugamije kugera ku ntego n’inyungu zabwo bwite.

Ukraine n’ibihugu biyishyigikiye nabo ntibashaka gutsindwa n’isi y’igitugu n’iterabwoba. Ibihugu byibumbiye muri NATO n’ibindi bihugu by’inshuti bikomeje gushyigikira Ukraine mu buryo bwa gisirikare n’ubwirinzi, no mu bijyanye n’ubukungu. Kwisubiza uduce tumwe u Burusiya bwari bwarafashe, byateye benshi kugira icyizere ko u Burusiya bwaba bugiye gutsindwa iyi ntamba.

Intambara iri gusura iya gatatu y’isi

Ibihugu byo mu Burengerazuba byagiye bigira uruhare muri iyi ntambara mu uburyo butaziguye, birinda kohereza ingabo kurwanira Ukraine. Birinze guha Ukraine intwaro zirasa kure cyane kugira ngo Ukraine itazarasa mu Burusiya intambara ikajya ku rundi rwego rwisumbuyeho.

Nubwo babyirinze, mbona intambara y’isi ishoboka nshigiye ku impamvu zitandukanye. Impamvu ya mbere ni ukubona ibihugu byinshi byarafashe uruhande bibogamiyeho muri iyi ntambara. Abashinzwe ububanyi n’amahanga ba Ukraine n’u Burusiya bageze muri Afurika bashakisha amaboko.

Impamvu ni uko u Burusiya bwemeje ku mugaragaro ko butwaye uduce dutanu dufite ubuso bungana na 22% kuri Ukraine. Ukraine nayo yiyemeje ko izagarura buri metero yose y’ubutaka bwayo u Burusiya bwatwaye.

Impamvu ya gatatu ni ihangana hakoreshejwe ingufu za nucléaire hagati y’u Burusiya na Amerika aho Perezida Putin yemeje ko azakoresha intwaro yose afite agatsinda iyi ntambara. Amerika nayo yatanze gasopo mu gihe izo ntwaro kirimbuzi zaba zikoreshejwe.

Indi mpamvu ni uko nyuma y’uko Ukraine irashe ikangiza ikiraro gihuza Crimea n’u Burusiya, u Burusiya bwarashe ibisasu bigera kure byinshi byangiza Umurwa mukuru wa Ukraine n’ahandi. Bigaraza ko uko impande zombi zigenda zihimuranaho bidahaze, bizarangira ibindi bihugu bibijemo.

Impamvu ya nyuma intambara ishoboka, ni uko Ukraine yarangije gusaba ku mugaragaro kwinjira muri NATO kandi ari byo u Burusiya budashaka.

Icyahagarika intambara

Uwatangije iyi ntambara ahagaritse cyangwa agahagaritswe iyi ntambara yahagarara. Mbona mu bivugwa byose n’ibikorwa harimo n’ibihano no gutera inkunga Ukraine, byose ari inzira ndende zigeza ku gisubizo gikerewe nyuma y’igihombo kinini.

Mu gihe haba habuze uhagarika u Burusiya, ikindi cyahagarika iyi ntambara ni ukurekura igihugu cy’intege nke kikayamanika, kigahanagurwa ku ikarita y’isi, intambara ikarangira. Ibyo mbona bidakwiriye kuko igihugu ni gakondo bwite, ntibikwiye ko isi turebera ibihugu bikomeye bikoresha ibyo byishakiye ibihugu bito. Ukraine ni uburenganzira bwayo kwishyira ikizana muri byose mu gihe yubahiriza uburenganzira bw’ibindi bihugu.

Igihe uburusiya bwahagarika kurwana intamba yarangira, ariko Ukraine guhagarika kurwana ubwayo yaba irangiye. Buri ruhande n’abarushyigikiye rufite uko rwifuza ko iyi ntambara yarangira ariko nta ruhande na rumwe rwifuza kurangiza iyi ntambara rutsinzwe cyangwa rwemeye kumanika amaboko.

Ibindi byiringiro byo kurangira kw’iyi ntambara kwari kuba iyo abaturage b’u Burusiya badahunga ahubwo bagahangana no guhindura ubutegetsi buriho. U Bushinwa n’ibindi bihugu bishyigikiye u Burusiya nanone biramutse bibuvuye inyuma byakwihutisha gutsindwa kwabwo.

Hashize amezi arindwi u Burusiya butangije intambara muri Ukraine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .

Article (176422) Re-process this page