IFOTO (Igice cya 8): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

Nshimyimana Leonidas

Kuya 8 Nyakanga 2015 saa 11:00
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga.

Mu gice kibanziriza iki, twabagejejeho uburyo nyuma y’iminsi ibiri Gaju yakize neza bakamusezerera. Mbere yo gutaha yabajije Yvette na Claire iby’umusore bamubwiye wamuzanye kwa muganga. Aho kumusubiza bararebanye, Gaju agira ibyo akeka abahata ibibazo ntiyabaha amahwemo. Biyemeje kumubwira byose ndetse banamubwira ingorane yahuye nazo kandi ko badashidikanya ko ari we yazize. Gaju yaraturitse ararira abasaba kujya kumwereka aho arwariye.

Gaju yakubise amaso isura itagira uko isa y’uwo musore w’icyusa n’ubushongore yuzuyemo inguma n’ibipfuko, amarira arisuka avuza induru ako akanya ahita yi.....(Byaje...)

IGICE CYA MUNANI

Gaju yakubise amaso isura itagira uko isa y’uwo musore w’icyusa n’ubushongore yuzuyemo inguma n’ibipfuko, amarira arisuka avuza induru ako akanya ahita yihuta amusanga. Kalisa aho yari aryamye ariko ateguka yagaragaje ibineza neza mu maso hangiritse ku bw’isura y’umwari utagira uko asa yari yarabutswe.

Gaju yaramwegereye amubwira amureba mu maso n’ijwi rituje ,ati: "Kali (undi agaragaza gutungurwa ku bw’uko amuvuze mu izina), ntuzigere wicuza ko wankanze nkagira ikibazo, nta kosa ufite kuko ntiwari uzi uwo mugiye guhura. Nahaye agaciro ibyo wankoreye nyuma y’ibyo byose. Gusa mbabajwe n’uko unzize utananzi. Njye norohewe nzakwitaho uko nshoboye kandi na murumuna wawe nta kibazo azagira. Ajye akugumaho nzajya ntegura ibyo kubagemurira mwembi kugeza worohewe. Kandi Kali, uri umusore w ‘igikundi… ".

Kalisa ntiyatumye iryo jambo arirangiza kuko yegutse kujya ku muhobera kandi nta mbaraga, Gaju na Claire bihuta bajya gufata serumu n’urushinge byari bimurimo ngo bitamwangiza, barongera baramuryamisha ariko ataka cyane kuko yari atonekaye.

Bamuteye agashinge ko kumusinziriza, Yvette na Gaju bo barataha babwira Claire ko bari bugaruke ku mugoroba bagemuriye umurwayi, Claire na we abasezeraho ajya gutunganya ibitabo ngo na we atahe uza kumusimbura ze kumenya aho ahera.

Yvette yagiye aganiriza Gaju uko Claire yamuhamagaye, amusobanurira ibyo Kalisa yamubwiye byose. Gaju yabwiye Yvette ko byanga bikunda azakorera Kalisa ikintu cyiza ariko atigeze amuhingukiriza. Icyakora Yvette yamubajije iby’imyitwarire ye imbere ya Kalisa yagaragaje amarangamutima.

Mu kumusubiza Gaju yavuze ko ari impuhwe yagize kubera uburyo yabonye isura nziza ya Kalisa yarangiritse, gusa anamubwira ko n’ubwo yazinutswe abahungu ariko yumva kuri Kalisa hari itandukaniro. Yungamo ko gusa adashaka kubiha umwanya cyane ati "nyina ubyara abahungu ni umwe". Akimara kubivuga yahise yivugisha ati : "Na Kalisa se ?" Yvette wari wakiriye ubutumwa kuri telefoni ari kubusoma ahita amubwira atamureba ati: "Rahira ko utaguye muri kole?" Basekamo bombi bakomeza urugendo.

Mu kugera mu rugo Yvette yahitiye mu gikoni kureba aho umukozi ageze abategurira ngo batangire bondore Gaju uvuye mu bitaro. Gaju we yagumye gato mu ruganiriro areba aho yajyaga amanika ifoto ya Muganza abona nta yihari ati ibyamunyibutsaga byose narabimushubije sinshaka no kongera kwibuka ko abaho uriya muhemu.

Akibaza ibyo Yvette aba araje ahita abaza Gaju mu byukuri niba yibuka uko byagenze. Gaju araterura ati: "Burya twamaze gutandukana njya mu cyumba cyanjye ndyama ntaryamye kubera agahinda natewe na Muganza. Bucyeye nabyutse kare mutaranabyuka njya mu ruganiriro, ncana itara, nurira ariya meza yo kuriraho, manura ya foto ya Muganza yari imanitse hariya, nyifata hafi y’umutima wanjye ubundi nkingura umuryango w’inzu nerekeza ku muryango w’urupangu.

Mpageze nasanze urugi rufunze kandi sinashakaga kubyutsa umukozi ngo arumpe, nge nisesereye harya hirya y’urugi hamwe hasenyutse ngera mu muhanda, mpita njya kuri Kiliziya ngo Muganza naza mu misa ya mbere asange mpari mpite mujugunyira igifoto cye akigumane n’izindi ndaya ze.

Gusa sinashakaga kujya mu misa ngo ntahura na kagakobwa turirimbana yahaye ifoto nk’iriya sinzi niba nzanasubirayo.

Ubwo shahu Yvette narakataje muri uwo muhanda nta n’inyoni itamba, uuh ariko se, nageze ku kiliziya se ? Ko ntabyibuka ra ? None se, ifoto narayimuhaye se ? Uuh, kwa muganga se, no Yvette simbyibuka".

Gaju yahise ahaguruka yiruka yerekeza mu cyumba cye, Yvette na we amusanga yo yihuta ngo atongera kugira ikibazo nyamara yasanze Yvette ya…
(Biracyaza).

Ntuzacikwe n’igice cya cyenda cy’iyi nkuru ngo umenye uko Yvette yasanze byifashe mu cyumba cya Gaju.

Iyi nkuru ndende kandi y’uruhererekane muzajya muyigezwaho mu mugoroba wa buri wa gatatu buri cyumweru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza