IFOTO (Igice cya 7): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

Nshimyimana Leonidas

Kuya 24 Kamena 2015 saa 08:53
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga. Mu gice cya kabiri twabagejejeho uko abaganga basanze uwo mwari amerewe, mu gice cya gatanu tubagezaho uburyo abakobwa bavugwa mu gice cya kane baje kureba Kalisa n’icyo bari baje bamushakira, n’aho mu cya 6 ho twababwiye ijambo umurwayo yari yaciyemo kabiri mu gice cya 5, aho yagize ati “gumana ifoto zawe n’abo wirirwa uzinyanyagizamo kandi ntuzongera kumb….”

Igice cya Karindwi

Nyamara ngo ayawe ntakurara ku mubiri, Muganza bari batandukanye yaritsize yashatse abasore b’intarumikwa bari bamucungiye hafi ya banki kuko yari yumvise ko ari ho akora, bamwoma runono kugera ahantu hiberetse bamushokera icyarimwe baramuhondagura baramukomeretsa bikomeye bamusiga aho ari intere.

Muri ayo masaha, Yvette n’umukozi we bari begereje kugemura ibya nimugoroba. Bamaze kubitunganya berekeza inzira yo kwa muganga. Mu nzira bagenda, bumva inyuma y’agahuru ikintu gihirita. Babanje kugiramo akoba dore ko hatanabonaga neza icyakora bari bitwaje isitimu (Torch). Bamurikiye kure Yvette abona ishati abona isa rwose n’iy’umuntu witwa Kalisa yamenye uwo munsi.

Bashirutse ubwoba barahegera, Yvette atungurwa no kubona Kalisa mu kiziba cy’amaraso ashigaje ho gato ngo ace. Yahise ahamagara Claire ko bazana imbangukiragurabara ikabagoboka ko wa musore wazanye Gaju mu bitaro na we abagizi ba nabi bamukomerekeje cyane. Ntabwo yatinze kuko nta handi bari bagiye yahise azana na wa mushoferi batwara intere kwa muganga.

Wa muganga wari warakiriye Gaju yari yagarutse na none kurara izamu, kandi yari anasanzwe aziranye na Kalisa. Yamwakiriye vuba na bwangu akora ibishoboka byose ngo atabare ubuzima bwe. Ku bw’amahirwe ntabwo ikintu bari bamukubise mu mutwe cyageze ku bwonko, muganga asanga azakira nta kabuza.

Yvette na we yagiye kureba Gaju aho ari asanga na none yorohewe, amuha ibyo yamuteguriye ndetse Claire amaze gufasha muganga gutunganya Kalisa asanga Yvette mu cyumba ngo baganirize Gaju. Claire yahaye ubutumwa bugufi Claire mu ibanga ko atagira icyo avuga cy’ibyamubayeho kuri Kalisa.

Gusa Yvette na Claire bari bamaze gukeka ko ari Muganza wabikoze, icyakora birinda kubisakaza bataratanga iyo raporo mu nzego z’umutekano.

Gaju yabajije Yvette uko yageze mu bitaro kandi aheruka agiye kwa Muganza kumusubiza ifoto yamuhaye. Yaramubajije ati: “None se namuhaye ifoto mpita nza mu bitaro? Ko nzi ko yo namaze kuyimusubiza kandi namubwiye ko atazongera kumbabaza ukundi ko ibyanjye nawe birangiriye aho?

Bamusobanuriye uko byagenze byose, kuko rero iyo umuntu arota avuga, akora cyangwa agenda kubimwibutsa bitoroha kuko ntabyo amenya, yirinze kubitindaho gusa ababaza uwo musore ari nde n’aho ari.

Bamubwiye ko yitwa Kalisa ariko ari mu rugo iwe kuko bangaga ko hari abantu bagumya kumubangamira. Yabasabye ko nava mu bitaro bazamumwereka akamushimira, kandi anabasaba ko Muganza atazongera na rimwe kumenya ibye, nta n’icyo agomba kubabaza kigendanye nawe.

Byombi barabimwemereye, Claire abwira Yvette ko ari bumurarire kuri Gaju ko nta gikomeye kikirimo cyane, abasaba gutaha. Yinginze umushoferi ngo amucyurire Yvette n’umukozi mu gutinya ko ba bagizi ba nabi nabo babagirira nabi, umushoferi anasaba ko yajya kureba murumuna wa Kalisa yabonye mu rugo (yari amaze kuhamenya) kugirango amubwire ibyabaye kuri mukuru we nibinaba ngombwa banazane.

Baratashye Gaju we aguma mu bitaro na Claire wanyuzagamo rimwe na rimwe akajya kureba Kalisa uko amerewe mu bitaro by’indembe dore ko na murumuna we yari yamugezeho. Mu gitondo Yvette yazindukiye ku bitaro asaba muganga ko yabaha raporo y’ikomeretswa rya Kalisa bakayijyana mu nzego z’umutekano abo bagizi ba nabi bagashakishwa.

Muganga yarayibahaye, bageze kuri polisi ku murenge bavuga n’uwo bakeka n’impamvu bamukeka. Polisi yasanze uwo muntu yaramufunze mu ijoro Gaju ajyanwa kwa muganga, kandi ko inkeragutabara zasobanuye ko bamukuye koko ku ivuriro yashyamiranye n’abazamu baho.

Biyemeje kuba bafunze Muganza hagakorwa iperereza ari mu maboko ya polisi, bashyiraho abagomba kumuhiga bidatinze bamugwa gitumo baramucakira yinjizwa uburoko by’agateganyo.

Nyuma y’iminsi ibiri Gaju yarakize neza baramusezerera. Mbere yo gutaha yabajije Yvette na Claire iby’umusore bamubwiye wamuzanye kwa muganga. Aho kumusubiza bararebanye, Gaju agira ibyo akeka abahata ibibazo ntiyabaha amahwemo. Biyemeje kumubwira byose ndetse banamubwira ingorane yahuye nazo kandi ko badashidikanya ko ari we yazize. Gaju yaraturitse ararira abasaba kujya kumwereka aho arwariye.

Gaju yakubise amaso isura itagira uko isa y’uwo musore w’icyusa n’ubushongore yuzuyemo inguma n’ibipfuko, amarira arisuka avuza induru ako akanya ahita yi.....(Biracyaza)

Mama se yahise amera gute ? Ntuzacikwe n’igice cya munani cy’iyi nkuru.

Iyi nkuru ndende kandi y’uruhererekane muzajya muyigezwaho mu mugoroba wa buri wa gatatu buri cyumweru.
Nshimyimana Leonidas


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza