IFOTO (Igice cya 6): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

Nshimyimana Leonidas

Kuya 27 Gicurasi 2015 saa 09:39
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga. mu gice cya kabiri twabagejejeho uko abaganga basanze uwo mwari amerewe, mu gice cya gatanu muramenya abakobwa bavugwa mu gice cya kane baje kureba Kalisa n’icyo bari baje bamushakira.

IGICE CYA GATANDATU

Wa murwayi yamukubise amaso asa noneho n’ukangutse bya nyabyo. Mu ijwi rirerire cyane ati va hano wa munyabinyoma we (amarira ahita amwuzura amaso n’ikiniga kiramuganza asa n’ucisha make), ati “gumana ifoto zawe n’abo wirirwa uzinyanyagizamo kandi ntuzongera kumb…” Ntabwo ijambo yarirangije kuko yahise atangira kurerembura arongera amererwa nabi.

Claire yahise abasohora bose, ahita ahamagara undi muganga bafatanya kugira icyo bamumarira. Bageze hanze Kalisa yabajije uwo musore uwo ari we kubera ibyo yari abonye, gusa akaba anamufite kuri ya foto yasanganye umurwayi.

Aho kumusubiza neza ahita amuhindukirana n’umujinya mwinshi ati: “Waraye umfungishije kugirango uzamwegukane se? Uribeshya ntabyo uzageraho nkiri kuri iyi si”.

Kalisa w’inzirakarengane asubiza uwo musore ati: “Ariko muvandimwe kuva ku mugoroba wanyishyizemo cyane nyamara nta kibi nakoze. Uriya mukobwa namutabaye ari mu byago byashoboraga kumuviramo n’urupfu n’ubwo ibyamubayeho byose ntabyo nari nzi. Niba ari n’inshuti yawe wakagombye kuba unshimira ko nataye n’akazi nkaba nkiri kumukurikirana. Ariko nibaza impamvu muri uko kurota kwe mu ijoro yagendanye ifoto yawe!”

Uwo musore yahise amubaza aho iyo foto iri Kalisa amusubiza ko azayiha uwo yayisanganye mu gihe cyose azamera neza. Bagumye guterana amagambo kugeza ubwo Yvette yasabye Kalisa kureka gushyogozanya n’uwo musore.

Yarahindukiye areba uwo musore aramubwira ati: “Muganza (izina ry’uwo musore), Gaju (izina ry’uwo murwayi) araramuka agize ikibazo gikomeye umenye ko n’aho Imana yakubabarira ariko Isi yo izabikubaza”.

Muganza yegereye Yvette ashaka kumusobanurira byose undi ntiyashaka kubyumva, ati: “Ejo mbere yo kuryama Gaju ntiyigeze agira icyo akoza mu nda, agahinda kamwishe, ambwira ubuhemu wagiye umugirira kenshi, none ukaba ugeze n’aho ufata ifoto imwe ukayishyira mu ma cadres ukayiha abakobwa batatu icyarimwe nyamara ukamubeshya ko ari impano wamugeneye nk’inkoramutima yawe? Buriya se wari uzi ko abo uziha bitazamenyekana? Usobanukiwe ko se baba wenda bataziranye na Gaju? Ibyo wakoze byaramenyekanye di, kandi igihe watesheje Gaju Isi izakikubaza”.

Claire wari usanzwe azi ubucuti Gaju afitanye na Muganza yarasohotse abasanga hanze, asaba Yvette ko yajya mu rugo agategura utuntu tworoshye n’imyenda yo guhindura akazanira Gaju. Yanasabye kandi Kalisa na Muganza ko bagenda ko batazagaruka kureba Gaju ku bitaro ko bazategerza niba bashaka kumusura bakazamusura yavuye mu bitaro.

Muganza utari akireba neza Kalisa, yamubwiye ko agomba kumuha iyo foto ku neza bitaba ibyo bakaba babiri. Kalisa yamubwiye ko adashobora kuyimuha Gaju atavuye mu bitaro ngo amenye impamvu yayigendanaga mu ijoro ko nayishaka azayimwiyakira. Muganza yamubwiye ko agiye ariko bari burebe imbwa n’umugabo.

Muganza yasiganye Kalisa na Yvette. Kalisa yamubajije neza ibya Gaju, amubwira ko uretse kumva ko ngo ifoto Muganza yari yamuhaye ku munsi w’abakundanye yasanze hari n’undi mukobwa baririmbana muri korari mu Kiliziya yayihaye, n’undi w’umucuruzikazi Gaju yagiye guhahiraho imyenda ayisanga muri shop (iduka) ye. Ati “Gaju yaje yarakaye ambwira ibyo gusa ahita ajya kuryama, nongeye kumenya amakuru ye nyabwiwe na Claire ko ari mu bitaro.”

Kalisa na we yasobanuriye Yvette byose kuva bahura kugeza ageze kwa muganga, anamubwira ko Gaju nakira azamumusabira imbabazi kuko yamukanze atazi ikibazo afite. Yvette yamubwiyeko nta kibazo yabigiraho kuko atari azi uko bimeze, kandi anamushimira uburyo yitanze anamusezeranya ko Gaju nakira bazamushimira.

Basezeranyeho Yvette ajya mu rugo naho Kalisa apfa kujya ku kazi gusaba imbabazi z’uko yishe akazi bitamuturutseho. Yageze kuri banki asanga umukoresha we yarakaye n’abakiriya babaye benshi.

Umukoresha we yahise amuhamagara mu biro bikuru. Kalisa ntiyamubeshye amubwira byose kuva batandukana mu nama. Umukoresha we amubajije impamvu atitabye telefoni, Kalisa asanga kubera gukanguka yiruka yayisize mu rugo. Kuko Kalisa yari asanzwe ari umukozi mwiza, umukoresha yaramubabariye ariko amubwira ko ubutaha azajya amenyesha ko hari ikibazo yagize hakiri kare.

Kalisa yagiye yishimye ahita ajya gufasha abandi kuri “guichet” bakira abakiriya vuba vuba, gusa akanyuzamo akibuka ubwiza bwa wa mukobwa yaraye abonye, akibuka ko nta n’umukobwa w’inshuti agira kuko yari atarabishyira muri gahunda; akibuka ubukana bw’umusore Muganza afitiye ifoto akumva biramuyobeye, gusa agatekereza ko abaye Gaju, igihe cye cyaba ari icyo.

Yakoze akazi kugera ku mugoroba ariko utije cyane. Yatashye yihuta ngo noneho ajye kuganira na murumuna we. Nyamara ngo ayawe ntakurara ku mubiri, Muganza bari batandukanye yaritsize yashatse abasore b’intarumikwa bari bamucungiye hafi ya banki kuko yari yumvise ko ariho akora, bamwoma runono kugera ahantu hiberetse bamushokera icyarimwe baramuhondagura baram…

(Biracyaza).

Ibice byabanje:

1.Igice cya mbere: Inkuru ndende: Uburyo ifoto yabahuje kugeza ubwo urukundo rwabo rumenywe n’Isi
2.IFOTO (Igice cya 2): Uburyo ifoto yabahuje kugeza ubwo urukundo rwabo rumenywe n’Isi
3.IFOTO (Igice cya 3): Uburyo ifoto yabahuje kugeza ubwo urukundo rwabo rumenywe n’Isi
4.IFOTO (Igice cya 4): Uburyo ifoto yabahuje kugeza ubwo urukundo rwabo rumenywe n’Isi
5.IFOTO (Igice cya 5): Uburyo ifoto yabahuje kugeza ubwo urukundo rwabo rumenywe n’Isi

Ntugacikwe n’igice cya karindwi cy’iyi nkuru kugirango umenye iherezo rya Kalisa.

Nshimyimana Leonidas


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .