IFOTO (Igice cya 5): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

IGIHE

Kuya 21 Mata 2015 saa 12:46
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga. mu gice cya kabiri twabagejejeho uko abaganga basanze uwo mwari amerewe, mu gice cya gatanu muramenya abakobwa bavugwa mu gice cya kane baje kureba Kalisa n’icyo bari baje bamushakira.

IGICE CYA GATANU

Kalisa yageze mu rugo yananiwe cyane ahita agwa agacuho wa murumuna we na we aramureka ngo aruhuke. Yicuye saa yine z’amanywa aho kuboneza ajya ku kazi ahita atega ipikipiki yerekeza iy’ibitaro.

Yageze ku marembo y’ivuriro ahasanga abakobwa babiri atazi bari kumwe na wa mushoferi wamucyuye.

Wa mushoferi yamubwiye ko bari baje kumureba mu rugo byihutirwa, ko umurwayi yagaruye ubwenge ariko ko ari gusakuza cyane abaza ifoto. Babanje kwibwirana.Umushoferi we yari yamaze kumenya Kalisa nawe amuzi.

Umushoferi yamusobanuriye ko umwe yitwa Claire ari umuganga ukora aho, n’aho undi na we ko bamubwiye ko yitwa Yvette, ngo akaba abana mu nzu na wa murwayi.

Kalisa yabajije Yvette uko yamenye aho uwo mukobwa ari, amusubiza ko Claire asanzwe azi umurwayi, ko yaje ku kazi mu gitondo akahamusanga agahita amuhamagara.

Icyakora yanamubwiye ko yamenye ko ataraye mu rugo mu ma saa kumi n’imwe ubwo umukozi wabo yabyukaga agasanga inzu irangaye, abona n’icyumba cy’umurwayi kirangaye ntiyamubonamo, batangira kubaririza mu nshuti no kuri telefoni, hanyuma Claire akaba ari we utuma bamenya aho ari.

Kalisa yarinjiye ajyana n’abo bakobwa, abanza kujya kureba wa muganga wabafashije nijoro asanga yitegura gutaha kuko yari yaraye izamu ribi. Umuganga yaramusuhuje bavugana gato, amusobanurira ko ikibazo umurwayi yagize ari uko asanzwe agira indwara yo kurota agakora ibintu asinziriye, akaba yanagenda nk’uko byagenze, ko iyo umuntu afite icyo kibazo bisaba kumuba hafi, kuko uramutse umukanze yashobora no guhita apfa.

Muganga yakomeje amubwira ko kuba bahuye rwose we aba yumva ari gukora ibintu bisanzwe, aba azi n’aho agiye, ariko ko aba asinziriye, bityo kuba yaramukanze ari yo ntandaro yo gushiduka agata ubwenge kubera kwikanga.

Kalisa yarababaye cyane kubera ukuntu yabonaga uwo mukobwa w’ihogoza ufite ikibazo nk’icyo, gusa muganga amubwira ko bishobora gukira. Muganga yahise amusezeraho aragenda anamushimira uburyo yitanze ahita agenda, n’aho Kalisa, Claire na Yvette berekeza mu cyumba bashyizemo umurwayi dore ko nyuma yo kugarura ubwenge bamukuye muri "Urgence" bakamushyira mu kindi cyumba (ariko na cyo cyihariye) aho yasurwa na buri wese. Icyakora n’ubwo yari yagaruye ubwenge, n’uwamubonaga ibyo yavugaga n’uburo yabikoragamo yasaga n’ukirota.

Binjiye mu cyumba umurwayi yari arimo, basanga yicaye ku gitanda. Abakubise amaso ahita abwira Yvette mu ijwi rituje ati: "Yve, sha ya foto sinkiyifite ndizera ko wa mubeshyi yasubiranye ibye. Gusa nawe ubyumve ko abahungu atari abantu kandi ndabazinutswe iteka n’iteka".

Yvette yaramusanze amwiyegamiza mu gituza, agerageza kumubaza ibyamubayeho niba hari ikintu yibuka, aho kumusubiza yitegereje Kalisa mu maso, abaza Yvette uwo ari we.

Mu gihe Yvette ataramusubiza, bahise babona urugi rwikubise hinjira umusore Kalisa yahise amenya kuko yari wa wundi bari baraye bashyamiranye. Wa murwayi yamukubise amaso asa noneho n’ukangutse bya nyabyo.

Mu ijwi rirerire cyane ati va hano wa munyabinyoma we (amarira ahita amwuzura amaso n’ikiniga kiramuganza asa n’ucisha make). Ati gumana ifoto zawe n’abo wirirwa uzinyanyagizamo kandi ntuzongera kumb…Ntabwo ijambo yarirangije kuko yahise a… (Biracyaza).

Ntuzacikwe n’igice cya gatandatu cy’iyi nkuru umenye ibyakurikiye kutarangiza iryo jambo.

Nshimyimana Leonidas


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza