IFOTO (Igice cya 3): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

IGIHE

Kuya 25 Werurwe 2015 saa 10:32
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga. Mu gice cya kabiri twabagejejeho uko abaganga basanze uwo mwari amerewe, mu gice cya gatatu murasangamo ibyakurikiyeho.

IGICE CYA GATATU

Kalisa we ibyo gutaha ntibyari bimushishikaje ahubwo agumya gushimikira muganga amubaza uko umuntu yazanye ameze. Muganga yamusubije mu ijwi ridatomoye neza bituma habaho akaganiro gato hagati yabo:

Muganga: Kali, umurwayi wawe yagize ikibazo cyo guta ubwenge, bituma anagira ikibazo mu kubona umwuka uhagije wo guhumeka. Icyakora ntugire impungenge kuko twamushyize mu byuma bimufasha gukuhumeka, kandi twizeye ko bidatinze aza kuba yagaruye ubwenge.

Kalisa: Ahuuuu, urakoze muga, urakoze rwose kundema agatima. None se Muga, uriya mukobwa wabonye ari umuntu cyangwa…?

Muganga (yumiwe amuce mu ijambo) : Uuh, Kali, none se ko ari wowe waduhamagaye, ntabwo watabarije umuntu ? None se ntumuzi?

Kalisa: Muga, rwose uriya mukobwa twahuriye mu nzira saa sita z’ijoro. Nari nakererewe mu nama ku kazi, ntaha nkubitana na we agenda, mwikangamo umuzimu, nsohoye ijwi mbona arashigutse mu kanya nk’ako guhumbya ahita amera kuriya. Ntakintu na kimwe twavuganye, sinzi ngo ni muntu ki, ni uwahe, mbese ubu nayobewe.

Muganga : N’ubwo hari ibyo wangije utabizi, ariko wakoze cyane Kali. Uriya mukobwa ni umunyamahirwe kuko iri joro byashobokaga cyane kuba yabura ubuzima bwe.

Kalisa: None se muga, ubundi mwasanze uko guta ubwenge no kubura umwuka byatewe n’iki?

Muganga: Biriya ni ibyatewe n’impamvu nyinshi dukurikije ibyo wari watubwiye tuza kumutwara, hakiyongeraho n’isuzuma twakoze. Icyo wamenya ni uko uriya muk… (atararangiza telefoni irasona ajya ku ruhande aritaba arangiza kuvugana n’uwari umuhamagaye).

Kali hari indi nkomere igejejwe hano kandi ngo irarembye, reka nge kureba uko bimeze uwo mushoferi nakugeze mu rugo atebuke, ejo mu gitondo uzagaruke urebe uko umurwayi ameze nange ngusobanurire neza (abivuga arenga).

Kalisa (avuga cyane): None se ko n’iwabo ntahazi, nkaba ntamuzi nta n’umuntu we nzi ngo azaze kumureba, kandi ejo akaba ari akazi, (yivugishe) reka ntahe wenda nzaka uruhushya nyarukireyo gusa...

Kalisa yahise ajyana n’umushoferi berekeza ku modoka. Bakigenda hirya haturuka umusore wirukanka cyane yahagira. Kubera ubwira uwo musore yari afite yahutaje Kalisa agwa nk’ iriya maze mu kwiramira ya cadre irimo ifoto yari agifite mu ntoki ira…

(Biracyaza).

Ntuzacikwe n’igice cya kane cy’iyi nkuru ngo umenye iby’iyi foto.

Nshimyimana Leonidas


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .