00:00:00 IGIHE NETWORK KN KINYARWANDA EN ENGLISH FR FRANCAIS

Byashoboka ko inkiko nyafurika zikora Kinyafurika? Ndi gusubiza Maina Kiai

Yanditswe na Mushimire Olivier
Kuya 9 March 2022 saa 07:16
Yasuwe :

Bishoboka bite ko umuntu avuga ko ari kuganira Kinyafurika kandi ingero atanga n’uburyo asobanuramo ari ibinyaburayi? Iki kibazo cyanze kumva mu mutwe guhera ubwo nasomaga inkuru yanditswe na Maina Kiai yise “Rwanda gets free pass at African Court” (u Rwanda ntawe uruvuga mu nkiko zo muri Afurika). Ni inkuru yatambutse ku rubuga africanarguments.org.

Ibitekerezo Umunya-Kenya Kiai atanga n’ibimenyetso bye, bihabanye n’imiterere y’u Rwanda, bigahabana n’ukuri k’ubuzima abaturage yitwa ko ari kurengera babayemo. Dore impamvu:

Ku batabimenyereye, Kiai ni wa muntu uhora usubiramo ibirego bidafite ishingiro by’uko mu Rwanda hari icyitwa ‘ubwoba’. Nk’uko bizwi neza, ni imvugo yadukanywe n’Umuryango Amnesty International ubwo hitegurwaga amatora ya Perezida mu 2017. Ni ibintu byasamiwe hejuru n’ibinyamakuru bitandukanye nta kubanza gushungura na guke.

Ukuri ni uko ariyo matora ya mbere yakozwe mu mahoro no mu mucyo muri Afurika y’Iburasirazuba ariko nyine ntacyo byari bibwiye haba Amnesty International cyangwa Kiai. Ntawe byatangaza.

Buri gihe iyo muri Afurika habaye amatora mu mahoro by’umwihariko mu bihugu nk’u Rwanda abatabyishimiye baba barekereje ibibi kubera kutagendera ku mahame yashyizwe n’abanyaburayi, ubwo butwari Abanyafurika bagize buhindurwamo ubwoba, bigakorwa n’abagamije gushimisha abanyaburayi. Byarabaye muri Kenya ubwo aba- Home Guards bari basumbirijwe n’ubutaneshwa bw’aba Mau Mau, barwaniraga ukwishyira ukizana kw’abaturage.

Nubwo u Rwanda rutemera imiyoborere y’agahato rushyizweho n’amahanga n’abumva ko demokarasi ari ikintu kigomba kuva hanze, ntibivuze ko u Rwanda bihora ari mahwi. Niyo mpamvu buri mwaka Abanyarwanda biha imihigo haba ku rwego rw’igihugu n’uturere, umwaka washira bakagenzura uko besheje iyo mihigo.

Ibibazo byose bahura nabyo mu ishyirwa mu bikorwa ry’imihigo, nibura baba babizi ko byose bigamije ineza yabo. Byashoboka ko uwo muhate wo kubazwa inshingano aho kuba uw’ubwoba ari wo utuma nta kavuyo kaba mu matora nk’uko bigenda ahandi mu matora.

Kiai yashoboraga kubyumva iyo ataba agamije kwigaragaza neza mu Banyaburayi akoresheje kubogama asanganywe.

Uyu mugabo hari aho avuga ko “Guverinoma ifite politiki n’imigirire byo guhanisha amategeko abatumvikana nayo, bikaba byaramize abatavuga rumwe nayo bikanatera ubwoba abaturage no hanze y’igihugu”. Mu gushimangira ingingo ze, Kiai yifashisha umuryango utemewe ‘Freedom House’, akongeraho ‘Human Rights Watch’ yabaswe na ruswa n’imikorere mibi mu gihe cyose imaze iyobowe na Ken Roth.

Iyi Freedom House niyo yigeze kugira umwere Paul Rusesabagina wahamijwe ibyaha by’iterabwoba, ikemeza ko RNC ari ntamakemwa nyuma ya raporo ya Loni iyishinja uruhare mu bibera mu Burasirazuba bwa Congo yasohotse mu 2018. Freedom House ivuga ibidafitiwe gihamya by’uko abatavuga rumwe na Leta y’u Rwanda i Burayi babayeho bihisha, nyamara nta na kimwe bagaragariza gihamya.

Uwo batanzeho urugero ko abayeho yihishe ngo aticwa, byaje kugaragara ko yahamijwe ibyaha mu Bwongereza. Bari bagamije kwerekana ko abantu bafite uruhare mu guteza imvururu mu karere k’ibiyaga bigari, aribo Leta y’u Rwanda ikwiriye kwemera nk’abatavuga rumwe nayo.

None se niba koko uyu muryango utabogama, wavuga ute ko umuntu wahamijwe iterabwoba ari we utinyuka ukavuga ko yakorewe ‘ihohoterwa ndengamipaka?”. Ni ibyo kwibazwaho icyo Freedom House igambiriye n’uburyo umuntu nka Kiai wigaragaza nk’uzi neza u Rwanda, ashobora gutwarwa n’ibinyoma nk’ibyo.

Ikintu giteye kwibaza mu nkuru ya Kiai, ni uburyo asesenguramo imikorere y’Urukiko rwa Afurika rw’Uburenganzira bwa muntu. Uburyo abisesenguramo nibwo bugaragaza uburyo ahubwo ashaka kuvangavanga.

Hari aho avuga ati “Umwanzuro wo kudakorana n’urwo rukiko nubwo udatangaje, wabaye ibyago ku Banyarwanda bashaka guhangana na Guverinoma ngo bahabwe ubutabera.” Kiai ntagaragaza uburyo byahindukira, uru rukiko rugatinya kugira icyo rukora ku Rwanda. Ubusanzwe abacamanza bitwara uko bashatse k’uwo ari we wese, na za Guverinoma zanze gukorana n’urukiko ntibazirebera izuba. Ikindi wakwibaza, bishoboka bite ko u Rwanda rwavuga rikijyana mu rukiko rwagaragaje ko rutemera? Ntabwo byumvikana.

Ndakeka ko Kiai agifite byinshi byo kwiga. Umwanzuro w’u Rwanda wo kwivana mu masezerano yemereraga abanyarwanda gutanga ibirego muri urwo rukiko ntabwo waje nk’impanuka, ushingiye ku manza ebyiri zirimo urwa Ingabire Victoire Umuhoza n’urwa Léon Mugesera.

Mu rubanza rwa mbere, urukiko rwavuze ko u Rwanda rwahonyoye uburenganzirwa bwa Victoire Ingabire bwo gutanga ibitekerezo. Ntabwo urukiko rwahakanye ko Ingabire Victoire yakoze icyaha cyo gupfobya Jenoside, ahubwo rwatsimbaraye ku kumvikanisha ko igihano yahawe kitajyanye n’ubukana bw’icyaha, ibyo ubwabyo bigahita bitesha agaciro ibyo kuvuga ko uburenganzira bwe bwo gutanga ibitekerezo bwahonyowe.

Ibyo nibyo Kiai n’abatambutsa inkuru kuri African Arguments basa nk’abamize bunguri, nta gutekereza ku mikorere ya sosiyete za Kinyafurika, tureke iza Kinyafurika ahubwo n’izo muri Kenya iwabo.

Uyu mwanzuro w’urukiko utandukanye n’uw’abanyarwanda bibuka neza icyabaye ubwo Amerika yangaga ko hafungwa radiyo RTLM, ivuga ko byaba ari ukuniga ubwisanzure bwo gutanga ibitekerezo muri Jenoside yakorewe Abatutsi mu 1994.

Mu kongera umunyu mu gisebe, rwa rukiko twavugaga ntirwagarukiye aho, maze rwemeza ko Leon Mugesera wahamijwe ibyaha bya Jenoside, adafashwe neza na Leta y’u Rwanda kuko adahabwa ifunguro ririho imbuto n’umugati uhagije.

Reka tube dushyize ku ruhande ibyavuzwe na Mugesera nubwo nabyo atari byo, ahubwo tujye ku cyatumye urukiko rujya guha agaciro ubusabe bwe, ibyo ubwabyo bikwereka ko ruriya rukiko rwari rwamaze gutsindwa mu nshingano zarwo z’ibanze zo kurinda ubuzima n’igitinyiro cy’ubuzima bw’Abanyafurika.

Icya mbere, byakozwe ubwo urukiko rwemezaga ko gupfobya Jenoside yahitanye ubuzima bw’abasaga miliyoni mu mezi atatu gusa, byakozwe na Victoire Ingabire bitari bikwiriye guhanwa. Ubwa kabiri ni igihe bemeraga ko umwe mu bacurabwenge ba Jenoside, arega yinubira gufatwa nabi kuko umugati bamuha udahagije, utameze nk’uwo yaryaga muri Canada ataratabwa muri yombi. Ndakeka ko inkuru itaha ya Kiai izaba itubwira uburyo u Rwanda rukwiriye guhaha imigati iturutse muri Canada!

Iyo iyo myanzuro ifatirwa mu nkiko z’Abanyaburayi ntawe byari gutungura ariko ni igitutsi ku Banyafurika kuba byarakorewe mu rukiko nyafurika. Nubwo bimeze bityo, urwo nirwo rukiko Kiai avuga ko rutinya ‘u Rwanda’.

Ukuri guhari ni uko Kiai ari kugerageza kwigarurira itangazamakuru kuko yabuze ibindi bimenyetso, ahubwo agakwirakwiza ibinyoma byahimbwe n’ingirwa miryango mpuzamahanga yiyita ko irengera uburenganzira bwa muntu, ikagenda ibeshya ko u Rwanda rushyira igitutu ku nkiko zo mu mahanga.

Nguko uko vuba aha bamwe biyita ko batavuga rumwe n’u Rwanda babigenje ubwo urukiko rwo mu Bufaransa rwahagarikaga burundu urubanza ku ihanurwa ry’indege yari itwaye Juvenal Habyarimana wahoze ari Perezida. Akenshi iyo ukuri kuje kutari mu ruhande rw’umuntu, biramworohera gushakisha indi nyito n’impamvu, aho gusesengura.

Mu gihe abanyafurika tugitegereje amahame yacu bwite asobajura icyo ubwisanzure bwo gutanga ibitekerezo aricyo, ubutabera na demokarasi, ba Homes Guards bakorera gashakabuhake bazakomeza gushyashyariza bitwa ko batuvugira.

Ahakorera urukiko nyafurika rw'Uburenganzira bwa muntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .