00:00:00 IGIHE NETWORK KN KINYARWANDA EN ENGLISH FR FRANCAIS

Anjan Sundaram, igikoresho cy’umugambi wa ba mpatsibihugu

Yanditswe na Mushimire Olivier
Kuya 16 April 2023 saa 02:21
Yasuwe :

Buri mwaka mu gihe cyo kwibuka Jenoside yakorewe Abatutsi mu 1994, Abanyarwanda bahura n’urugomo rudashira rw’abashaka kugerageza guhindura amateka y’igihugu cyabo. Icyaha u Rwanda ruba rushinjwa buri gihe, ni uko rwanze guha urwaho uburengerazuba bw’isi ngo burugenere uko rubaho, bakarwitura kurusuzugura kugeza n’aho bakwena abarokotse Jenoside yakorewe Abatutsi.

Bijyanye n’uru rugomo, abanyamakuru ba The New York Times bitandukanyije n’ubwenge, bafata umwanzuro wo gutangaza igitekerezo Anjan Sundaram yise "Umunyagitugu utagira impuhwe ariko ukunzwe n’Abanyaburayi". Ibyanditswe na Sundaram si igitutsi gusa ku bazize Jenoside, ahubwo ni ukwikoza isoni ku bataremera ko hari igihugu cya Afurika kigendera ku ndangagaciro nziza za kimuntu, Abanyaburayi bibwiraga ko ari bo bonyine babyihariye nubwo byabananiye kubikurikiza.

Nk’umuntu wahawe igihembo cyitiriwe Victoire Ingabire Umuhoza uri mu bashinze umutwe wa RDR washyizweho n’abagize uruhare muri Jenoside bari bihishe mu yahoze ari Zaire, nta kindi Sundaram yakora kitari uguhembera amacakubiri.

Hari aho yavuze kuri Perezida Kagame ko "Ari umuntu wigira intwari ngo yahagaritse Jenoside", aho ashaka guhakana ukuri kwambaye ubusa umuntu wese utekereza neza azi.

Sundaram akomeza ashinja Kagame kuba imbarutso ya Jenoside no kutagira icyakora ngo ayihagarike, ngo kuko ari we utaravugaga rumwe na Guverinoma y’u Rwanda.

Inyandiko ya Sundaram igizwe gusa na ’barambwiye’, abantu atavuga abo aribo kugeza n’aho avuga ngo umwe mu bahoze ari Ambasaderi w’u Rwanda muri Amerika, ngo kuko ubusanzwe "amakuru yizewe ku Rwanda bigoye kuyabona’" None se niba Sundaram nta makuru yizewe afite, ni gute New York Times itinyuka gutambutsa inyandiko ye?

Umwanditsi mukuru w’ikinyamakuru wese utekereza neza, yakabaye yibaza ku mitekerereze y’umunyamakuru nka Sundaram utinyuka guhangara ibyakozwe na Kagame wari umugaba Mukuru w’ingabo zahagaritse Jenoside yakorewe Abatutsi.

Ariko nyine New York Times, guhakana, amacakubiri no gupfonya Jenoside biri mu ntego zayo zo gutesha agaciro umuyobozi wese wa Afurika utemera gupfukamira abo mu burengerazuba bw’isi, uhora ubibutsa kwireba mbere yo kujya guha abandi amasomo.

Sundaram we ni igikoresho cyiza muri uwo mujyo wabo, igihembo cye kikaba kumwamamaza mu minota 15, no kumuha umwanya umunsi umwe wo kuzavuga uburyo ibitekerezo bye byigeze guca muri The New York Times.

Ngibyo ibyo Kagame azira, kuba yaratinyutse guhagarika Jenoside ibihugu nka Leta Zunze Ubumwe za Amerika, u Bwongereza n’u Bufaransa bahakanye mu kanama gashinzwe umutekano ka Loni ko itari kuba mu gihe Abicanyi bari bakajije umurego. Nyamara barangiza ngo Abanyaburayi na Amerika inshingano zabo ni ’ugutabara abari mu kaga’.

U Bubiligi bwahise bucyura ingabo zabwo zari mu butumwa bwa Loni, zisiga ibihumbi by’inzirakarengane mu maboko y’abajenosideri, mu gihe u Bufaransa bwo bwohereje izindi ngabo zo gutabara Leta yakoraga Jenoside ndetse bukomeza no koherereza iyo Leta intwaro no mu gihe abayigize bari mu buhungiro muri Zaire.

Ngizo inkuru Abanyaburayi badashaka ko zigaragara mu bitabo by’amateka, bagatekereza ko bizarangira neza ari uko Kagame atakiri ku butegetsi.

Uko gushaka guhindura amateka y’u Rwanda ntabwo babiterwa n’ubwoba bw’uko ruzabasaba impozamarira nkuko Sundaram abitekereza, kuko ariho ubwenge bwe bugarukira. U Rwanda ntawe rwigeze rusaba impozamarira na nyuma y’uko u Bufaransa bwemere uruhare rwabwo muri Jenoside, nta mafaranga bwasabwe.

Abanyaburayi na Amerika bafite ubwoba bwo gutakaza ikuzo n’icyubahiro bituruka mu kwibwira ko bakura mu guharanira iyubahirizwa ry’uburenganzira bwa muntu na demokarasi. Gutakaza iri kuzo, ni ugutakaza ububasha bwo gutegeka ibindi bihugu no kubigenzura. Kagame kuba yaratabaye ubuzima bwa miliyoni z’abaturage, ni ikosa kuri bo kuko nibo bakabaye babyitirirwa.

Ubwo Perezida Macron yasuraga u Rwanda muri Gicurasi 2021 akemera kandi agasaba imbabazi ku ruhare rw’u Bufaransa muri kimwe mu byaha ndengakamere byabaye mu kinyejana cya 20, Abanyaburayi bo bamusabaga ahubwo kwamagana u Rwanda arushinja ibijyanye n’uburenganzira bwa muntu.

Kuri bo, uruhare rw’u Bufaransa muri Jenoside yakorewe Abatutsi ntacyo byari bibabwiye ahubwo bumvaga ko ari bwo buryo u Bufaransa bukwiriye gukomeza gukoresha mu kwereka u Rwanda ko ari igihangange. Kuri bo bumvaga Macron n’u Bufaransa muri rusange bakwiriye gukomeza kwigisha u Rwanda ibijyanye n’uburenganzira bwa muntu n’imiyoborere myiza.

Byarushijeho kuba bibi ubwo aba banyaburayi bageraga aho bananirwa no kwakira abimukira n’abasaba ubuhungiro, u Rwanda rwaberetse ko rushobora kubafasha. Politiki y’u Bwongereza kuri icyo kibazo, uyu munsi iri kwitirirwa u Rwanda, bya bihugu byamunzwe n’ivangura kugeza ubwo abimukira bafungirwa mu bigo runaka, biri gusabwa kwamagana u Rwanda ngo rudatanga umusanzu warwo kuko rushinjwa kutubahiriza uburenganzira bwa muntu.

Mu yandi magambo, mu gihe ibi bihugu biri gutoteza no kugirira nabi abimukira nta n’isesengura rikozwe, ingingo igezweho iwabo ni uburyo uburenganzira bwa muntu ku gihugu kimwe cyemeye gutanga ubuhungiro kuri abo bafatwa nabo i Burayi, Libya, RDC, Afghanistan n’ahandi.

Kubwa burembe hari aho Sundaram agera aho akemera ko Kagame ‘ari umwizerwa’ ari nayo mpamvu ibihugu by’i Burayi bimusaba kubafasha gukemura ibibazo byabananiye gushakira igisubizo ariko kubera ko batemera ukuri kuriho, amakosa yabo niyo begeka ku Rwanda.

Nyuma y’ibyo byose, Sundaram akomeza kugaragaza ubwenge bwe buke, aho avuga ko Kagame yagize amahirwe yo kugirirwa impuhwe n’Abanyaburayi. Ibi ni ya myumvire y’ubwirasi, yo kumva ko ubukire buguha icyo ushaka cyose, kurusha indangaciro nzima.

Ahubwo Abanyaburayi bakabaye aribo banyamahirwe ko umwe mu baharaniye ubwigenge bwa Afurika yemera gukorana nabo yirengagije ibyaha ndengakamere bakoreye Afurika.

Ibi byaha niryo pfunwe rihora rituma Abanyaburayi bashakisha ahari inkuru ‘zigaragaza ibyagezweho muri Afurika’ nkuko Sundaram abivuga, kubera ko nyine umujura ruharwa ahora agerageza guhisha ibyaha bye.

U Rwanda si ubwihisho bw’abajura, ntabwo ibyo rwagezeho bigamije gushimishisha abanyaburayi. Ntabwo ibituma Kagame aba intangarugero ari impuhwe z’u Bwongereza cyangwa ibindi bihugu by’i Burayi nk’uko Sunadaram abitekereza, abikesha icyizere abaturage be bamufitiye.

Kagame nk’umuntu wabaye mu buzima bw’ubuhunzi, ikimuraje ishinga ni ubuzima bwiza bw’abimukira. Muri ubwo bugiraneza, aboneraho no gufasha abayobozi badashoboye b’Abanyaburayi kubonera ibisubizo ibibazo byananiranye, bakabyifashisha kugira ngo bagume ku butegetsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .