00:00:00 IGIHE NETWORK KN KINYARWANDA EN ENGLISH FR FRANCAIS

Uko numva umunsi w’Umuganura mu Rwanda rw’ubu

Yanditswe na Kwezi Jean
Kuya 3 Kanama 2021 saa 10:12
Yasuwe :
0 0

Negereye abakuru bo mu myaka yo hambere nshaka kubasobanuza byimbitse ibijyanye n’Umuganura n’uko byagendaga n’umumaro wabyo muri ibyo bihe, nza gusanga ari umuhango wakorwaga n’Abanyarwanda bose mu bice byose by’igihugu, aho babaga basangira umusaruro bejeje.

Icyabaga kigamijwe muri uyu muhango kwari ukuganura no kuganuza Abanyarwanda ibyo bejeje, ni ukuvuga ibyo babaga barahinze bakeza cyangwa baroroye bakagwiza. Buri munyarwanda yaganuzaga icyo yejeje kuva ku muryango abarizwamo kugeza ku baturanyi n’utundi turere bitewe n’uko ibihingwa byeraga mu gace runaka byashobokaga kuba bitera ahandi.

Uyu muganura wabaga ushingiye ku buhinzi n’ubworozi kuko muri ibyo bihe ubukungu bw’Abanyarwanda bwabaga bushingiye cyane kuri icyo cyiciro gusa.

Nafashe umwanya ntekereza kuri uyu muhango, mbihuza n’igihe tugezemo. Nakoze isesengura nsanga u Rwanda rw’igihe turimo ubukungu bwarwo butagishingiye gusa ku buhinzi n’ubworozi ahubwo kubera iterambere n’ubumenyi, ibyiciro by’ubukungu bw’igihugu byariyongereye havumburwa byinshi.

U Rwanda rw’ubu mbona ubukungu bwarwo bugana ku kuba ubushingiye kuri serivisi rutanga haba ku benegihugu ndetse n’abanyamahanga, kugira ngo rube ahantu heza ho gushyira icyicaro cy’ibikorwa n’imishinga itandukanye yakorerwa mu karere k’Afurika y’Iburasirazuba n’iyo hagati.

Kuba u Rwanda ari ahantu heza hizewe ho gushyira icyicaro cy’imishinga itandukanye, ibikorwa na serivisi ntabwo byikoze. Leta y’ubumwe bw’Abanyarwanda yabishyizemo imbaraga n’umuhate kugira ngo bigerweho ari na cyo gituma hakorwa ibishoboka byose kugira ngo habeho kurinda no gusigasira ibyagezweho mu myaka 27 ishize.

Hamwe n’ibyo byose bimaze kugerwaho no kubakwa, narasesenguye nsanga byaba byiza umuganura uhujwe n’ibihe tugezemo hashingiwe kuri bya byiciro bindi by’ubukungu, buri Munyarwanda akaganuza ibyo yagezeho haba ubumenyi yahashye, haba uvumbuzi yakoze, haba ubucuruzi yakoze akabona urwunguko, haba servisi nziza yatanzwe muri buri cyiciro cy’ubuzima bugize igihugu n’iterambere ryacyo hagatangwa umuganura udashingiye gusa ku kurya no kunywa ibyaturutse mu buhinzi n’ubworozi, ahubwo n’ibyaturutse mu zindi serivisi n’ibikorwa biba mu gihugu.

Urugero abarimu n’abanyeshuri muri kaminuza zitandukanye bakaganuza Abanyarwanda ubushakashatsi bakoze ku bintu runaka bijyanye n’ibyo bize cyangwa bigisha. Abaganga runaka baminuje muri uwo mwuga bakadusangiza ku bushakashatsi runaka bw’ibyo bavura cyangwa ibisubizo ku byorezo runaka harimo no kuvumbura imiti n’inkingo. Ba injeniyeri mu ngeri zitandukanye bakatuganuza ku bushakashatsi bakoze muri siyansi na tekinoloji, mu myubakire, mu bijyanye n’isanzure, mu bijyanye n’ibihe n’ibiza karemano, mu bijyanye n’umutekano n’ubusugire ,mu bijyanye n’imibare n’imibanire n’ibindi.

Ibigo bya Leta n’ibyigenga byose ku munsi nk’uyu w’umuganura byajya biganuza Abanyarwanda umusaruro w’ibyagezweho ku maradiyo, amatereviziyo, imbuga nkoranyambaga, mu bitaramo n’ahandi hose hashoboka. Buri Munyarwanda bitewe n’icyo azi cyangwa impano afite, hakabaho uburyo aganuza abandi ku munsi nk’uyu w’Umuganura ku buryo uba umunsi w’agahebuzo mu gihugu.

Gufata amafunguro aturuka ku buhinzi n’ubworozi bikajya biba uburyo bwo gufasha Abanyarwanda, kwicara bagasangira bahana n’ibitekerezo by’iterambere kuri buri cyiciro bitewe n’ibyo umuntu azi.

Umunyarwanda yakagombye kujya areba umuturanyi we icyo yabuze mu gihe cy’umwaka cyamufasha gutera imbere akaba aricyo amuganuza cyaba ari igitekerezo cyangwa ubushobozi runaka nko kumufasha gutekereza umushinga runaka wamuteza imbere.

Tuvuge wenda uturanye n’umuntu ukabona ntiyumva neza gahunda ziriho z’iterambere wowe ubyumva, ukamwegera ukavuga uti “Reka nkuganuze igitekerezo”, ugafata wenda kubyo wejeje ukamusura mu kicara mugasangira nyuma ukamuha igitekerezo cyamufasha kugendana n’abandi mu iterambere.

Ni ukuvuga ngo buri wese uko ashoboye, akajya aganuza undi Munyarwanda mugenzi we icyo afite cyaba igitekerezo cyangwa ubundi bushobozi bufatika.

Nakunze uburyo Leta yacu ishyiraho ingamba zituma nta gihungabana ariyo mpamvu nko ku kijyanye n’icyorezo cya Covid 19, itigeze igira uburangare bwo kuba terera iyo, ahubwo ikajya yashyizeho ingamba zituma Abanyarwanda badapfa ku bwinshi kubera icyo cyorezo.

Nabonye hari bamwe babinenga ariko byaba ari ukureba hafi twiyibagije ko ubukungu bwa mbere u Rwanda rufite ari abaturage barwo kuko ni bo maboko yarwo muri wa mujyo wo kubaka igihugu gishingiye kuri serivisi mu gihe rero bapfa bagashira u Rwanda na rwo rwaba rutakiriho.

U Rwanda si ikirwa kiba ku isi cyonyine tugomba kujya twizera inzego zacu kuko ziba zireberera buri wese ku nyungu rusange.Na none buri muryango ugira uko ushyiraho uburyo bwo kubaho ku mpamvu runaka z’iterambere wifuza, niyo mpamvu nganuza Abanyarwanda(Kuganuza) kuba abantu biga kubaho bishingiye ku ndangagaciro zabo bijyanye n’icyerekezo bafite,dore ko baca umugani mu Kinyarwanda ugira uti “Umugabo arigira yakwibura agapfa’’. Nk’Abanyarwanda, tugomba kwiga kubaho bijyanye n’icyerekezo cyacu cy’iterambere kandi tugashyigikira Leta kuko byinshi bishyirwaho ku nyungu rusange.

Usesenguye neza kuba u Rwanda rugaragara neza muri byinshi muri Afurika na henshi ku isi, bishingiye ku byemezo byagiye bifatwa ku nyungu rusange.

Nkuko nabivuze bijyanye n’ubusesenguzi bwanjye, nasanze u Rwanda ari igihugu gifite intumbero yo gushingira ubukungu bwacyo kuri serivisi nziza mu byiciro bitandukanye by’ubukungu. Aha nta kabuza ko icyerekezo nyacyo ari ukuyingayinga cyangwa kuruta ibihugu nka Singapore na za Hong Kong ubona biteye imbere bishingiye kuri serivisi.

Ndasayuka nganuza Abanyarwanda bose aho bari ku isi kugira urukundo, guhana amahoro buri umwe asigasira umutekano w’undi, dusangira ibyo dufite, dukomeza kunga ubumwe kandi duhuza imbaraga muri byose.

Harakabaho Abanyarwanda,
Umunsi mwiza w’umuganura!

Umuganura ni umunsi ufite igisobanuro gikomeye mu mateka n'ubumwe by'Abanyarwanda

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .