00:00:00 IGIHE NETWORK KN KINYARWANDA EN ENGLISH FR FRANCAIS

Ubumuntu bwarangaga Abanyarwanda bwagiye he?

Yanditswe na Léana Bisa
Kuya 12 April 2022 saa 05:37
Yasuwe :

Biratangaje kuba wabona umuntu anyagirirwa ku cyapa imodoka zimucaho ntawe umufashije! Biratangaje kubona umuntu ashobora kuburara, akabwirirwa we n’urubyaro rwe kandi aturanye n’abishoboye!

Birababaje kubona umuntu aryamye mu muhanda benshi bakamucaho ntawe umubajije ikibazo afite! Birababaje kubona umubyeyi agwa mu muhanda ntihagire umuhagurutsa cyangwa se umubyeyi utwite akajya mu modoka itwara abagenzi ntihagire umuhagurukira.

Muri iyi minsi usanga abantu bahemukirana cyane. Ubanza koko ibya Bibiliya bitangiye gusohora ko mu minsi y’imperuka ‘Abantu bazaba bikunda cyane’.

Tureke n’abatinya gufasha. Muri iyi minsi hari ubwo uguriza umuntu ababaye, yamara kwijajara ntakwishyure. Ni gake cyane kuri ubona abantu bashishikawe no gusura abandi cyangwa se umuntu wifuza gusurwa.

Ni gake cyane ubona umuntu wibwiriza kugira icyo agufasha utamwinginze, nabwo yabyemera akabikora yinuba. Ni gake cyane usanga abantu barwaza abandi cyangwa bagemurira abandi.

Ntiwabona umuntu ucumbikira undi yaba amuzi cyangwa se atamuzi. Ni gake cyane usanga umuntu agaburira uwaje kumusaba. Muri make benshi bavuga ko ubumuntu mu Banyarwanda bwashize, cyangwa wenda twoye gukabya “bwaragabanyutse cyane”.

Umuco Nyarwanda ugizwe n’indangagaciro zitandukanye kandi kenshi usanga zifite akamaro gakomeye. Iya mbere muri izo ni ubumuntu.

Ubumuntu mu ndimi z’amahanga nk’icyongereza ni ‘Humanity’ mu gifaransa bikaba ‘humanité’. Mu kinyarwanda gisobanuye ni ukugira ‘umutima mwiza’, ndetse byaba bishyitse ku rwego rwo hejuru bikitwa ‘ubupfura’.

Ubumuntu ni ishingiro ry’uburere n’umuco Nyarwanda. Kuva na kera buri mwana w’Umunyarwanda yarerwaga bamutoza mbere ya byose kugira umutima mwiza n’ubupfura aribyo byikubiye mu bumuntu bwa Kinyarwanda.

Bamuciraga imigani myinshi miremire n’imigufi iyigaragiye igaragaza itandukaniro ry’umuntu nyamuntu n’inyamaswa.

Bakagaruka ku kintu cy’ubupfura bavuga ko imfura izira guhemuka. Bati ‘Aho imfura zasezeraniye niho zihurira, ihatanze iyindi irahaborera (irahanyagirirwa), imfura muragendana ntigusige, murasangira ntigucure, muraganira ntikuvemo, waterwa ikagutabara, wapfa ikakurerera".

Umuntu warangwaga n’ubumuntu bavugaga ko yarangwaga n’amahoro, urukundo, ibyishimo, guca bugufi, ubutabera no gukiranuka, kugwa neza, kugira neza aribwo buntu, kwihangana nibindi.

Uwo ni wo muco Nyarwanda, ariko muri iyi minsi bisa nkibyashize mu bantu, kubera iki?

Abantu bababaye nyamwigendaho

Ibihe ku isi bigenda bihinduka ndetse n’abantu bagenda bahinduka. Muri iyi minsi usanga benshi bahugiye mu byabo nta witaye ku wundi kuko buri wese agenda ahura n’ibibazo ku giti cye.

Uko Isi itera imbere usanga buri wese ahugiye mu bibazo bye dore ko banahura na byinshi, ariko ibi ntibikwiriye kuguma uko kuko abantu bahora bakenerana. Iyo ukeneye undi ntiwita ku bibazo afite cyangwa se adafite.

Uburere umwana ahabwa

Byose bihera mu muryango, uburere umwana ahabwa ni ishingiro ya byose. Iyo umwana akuze atozwa kugenda mu nzira imwe niyo azasaza agenderamo. Abazi Bibiliya ibi si bishya.

Nkuko mu Kinyarwanda babivuga “Igiti kigororwa kikiri gito” umwana natozwa kugira neza, kugira urukundo, guca bugufi ndetse no kuba imfura niko azakura ameze.”

Muri iki gihe ubona ibyo byose ababyeyi batabitoza abana, icyo bashyira imbere ni amanota yo mu ishuri ndetse no gukura ku mubiri ariko izi ndangagaciro zo zisa n’iziri gukendera.

Usibye no kutigishwa indangagaciro, usanga umwana w’iki gihe adahanwa, ntabwirwa kandi ntiyumvira utari umubyeyi we kuko aribyo basigaye batozwa.

Guhemukirwa bikabije

Iyo tuvuze ngo nta muntu ukiguriza, ngo nta muntu ugitanga lift (yo mu modoka), nta muntu ugifasha umusabye, ni ibintu bigenda bicika kuko hari benshi babikora bagahemukirwa.

Hari inkuru nyinshi tugenda twumva aho umuntu agirira neza undi akamuhemukira. Abantu benshi muri iki gihe basigaye bagenda birinda kuko babitswemo ubwoba n’abagizi ba nabi.

Hari abatanga lift bikarangira bahuye n’ibyago, ugasanga uyihaye umuntu akwibye ibyo wari ufite mu modoka cyangwa se uyihaye umukobwa akanga gusohoka utamuhaye amafaranga.

Uwo ejo ntiwamubwira ko kugira neza buri gihe ari byiza ngo akumvire nubwo atari igisobanuro cyo kubaho uhemuka.

Nk’Abanyarwanda dukwiye kurangwa n’ubumuntu kubera ko utabufite ntaho aba atandukaniye n’inyamaswa, kandi si ibyo tubwirwa ububi bwo kubura ubumuntu ingaruka zabwo twarazibonye.

Byari bikwiriye ko dusubiza amaso inyuma, tugasubira ku isoko, kuri za ndangangaciro twahoranye , tukazitoza twe ubwacu n’abadukomokaho.

Ubumuntu Indangagaciro ikwiye kuranga buri Munyarwanda wese

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .