00:00:00 IGIHE NETWORK KN KINYARWANDA EN ENGLISH FR FRANCAIS

Twiganirire nk’Abanyarwanda

Yanditswe na Kwezi Jean
Kuya 23 July 2023 saa 08:36
Yasuwe :

Ubwanditsi: Ibikubiye muri iyi nyandiko, ni ibitekerezo bwite by’umusomyi wa IGIHE, Kwezi Jean Baca.

Baca umugani mu Kinyarwanda ngo ‘’aryoha asubiwemo’’ kandi ngo utazi iyo ava ntamenya iyo ajya’’. Uyu mugani wa nyuma ukaba ugaragaza ko kugira ngo ugere kure mu byo ukora byose ugomba kujya unyuzamo ugasubiza amaso inyuma ugatekereza aho wavuye ariko ntuheranwe naho ukareba iyo ujya.

Nikije ku nyito y’inkuru yanjye ngira nti “Twiganirire nk’abanyarwanda” kuko nzi neza ko kwitwa Umunyarwanda biruta ikindi cyose kuko ariryo pfundo muzi w’inkomoko yabo turi bo uyu munsi ariko muri rusange ikiruta byose turi abantu buntu batandukanye kure cyane n’ibindi binyabuzima kuko twe twahawe kubigenga no kubikoresha uko tubishaka.

Vuba aha ku mbuga nkoranyambaga no mu makuru hatambutse inkuru y’umuryango mugari w’abitwa ‘Abakono’ bihuje batora umutware wabo, nyuma umuryango wa FPR Inkotanyi utambutsa itangazo ryamagana icyo gikorwa kuko kinyuranyije n’ihame ryo kubaka ubumwe bw’abanyarwanda.

Amateka yo gutoteza bamwe mu banyarwanda bitwaga abatutsi kuva mu myaka yakurikiye icyitwa revolusiyo yo mu w’1959 buri wese ukuze arayazi kugeza ku bakiri bato bagomba kugenda basobanurirwa ayo mateka ashaririye yacu nk’abanyarwanda, ariyo yavuyemo Jenoside yakorewe Abatutsi.

Imyaka hafi 29 irashize abitwaga abatutsi basaga miliyoni bishwe,abarokotse baracyafite ibikomere birimo komorwa byaba ibyo ku mutima no ku mubiri. Inkovu ntizirasibangana kandi gukira ibikomere nk’ibyo ni urugendo ari narwo Leta y’ubumwe yiyemeje gufasha abanyarwanda hubakwa ubumwe bushingiye kuri‘’Ndi Umunyarwanda’’ bigomba kurenga aha tukiyumvamo kuba ‘’ Ndi Umuntu’’.

Umuntu w’agaciro ,umuntu wo kubahwa no kubaha ,umuntu wo gukundwa no gukunda ,umuntu wubaka akirinda gusenya ibyagezweho biturutse ku kiguzi cy’amaraso y’abo banyarwanda yasesekaye kuri ubu butaka. Ibitambo byabayeho ntibigomba kuba imfabusa, tugomba kwigira kuri ayo mateka tukubaka u Rwanda rwiza tuzaraga abarimo kuvuka ubu.

Nsubiye gato inyuma rero kuri iryo yimikwa ry’umutware w’abakono byo ubwabyo birasa no gusubira mu njyana yo kubaka andi moko mu banyarwanda byazavamo ko nyuma twazumva Abazigaba, Ababanda, Abaha, Abagesera, Abanyiginya, Abasindi, Abasinga n’abandi bose bishyize hamwe nabo bagatora umutware wabo.

Kera kabaye nibyo byazavamo nka bimwe tujya twumva hafi aha muri Kenya by’amoko ahora ashyamiranye muri politiki mu gushyigikira umukandida runaka, aho bamwe birara mu mihanda bagatwika, bagasenya, bakica ngo ni uko uwatowe atari ubwoko bwabo .

Isi tugezemo nk’Abanyarwanda twakagombye kuba abasirimu mu mitekerereze cyane ko tuzi neza ko amoko nta cyiza yatugezaho. Siniyumvisha ukuntu umuntu udashoboye yahabwa umwanya cyangwa amahirwe runaka kuko ngo aturuka aha cyangwa ari ubwoko ubu! Ibi Leta y’ubumwe igomba kubirwanya ndetse bagatangira gukora igenzura ryimbitse.

Nshimishwa byimazeyo no kubona abana banjye barimo gukurira mu buzima butekanye. Nta n’umwe ndumva ambaza ubwoko bwe, nta n’umwe numva ambwira amagambo nk’ayo twe twabwirwaga cyangwa twigishwaga y’amoko n’amacakubiri ayashingiyeho. Uru nirwo Rwanda twifuza kubamo no kurereramo.

Ubwo nari mu muhango wo kwibuka abahanzi n’abakinnyi bishwe mu w’1994,Minisitiri wa Minisiteri y’Ubumwe Dr. Bizimana Jean Damascène yatuganirije ku mateka y’amatsinda yagiye ashyirwaho mbere y’ishyirwa mu bikorwa rya Jenoside yakorewe Abatutsi. Usanga ariho uwo mugambi wacurirwaga cyangwa ukaba inzira ya bugufi bifashishaga mu icengezamatwara.

Niyo mpamvu aya matsinda atandukanye agenda avuka ari byiza ko agomba kujya asuzumwa hakarebwa intego zayo. Kugeza no mu matsinda aya twita ay’abafana b’amakipe mu byiciro byose bagomba gutozwa kumva agaciro ka Ndi Umunyarwanda kugira ngo ejo n’ejobundi bene ayo matsinda atazatandukira.

Gufana ni uburyo bwo gutera akanyabugabo uwo ukunda mubyo akina ariko si urwitwazo rwo gusenya no kwangiza iby’abandi mutari mu itsinda rimwe. MINUBUMWE n’izindi nzego zifite aho zihurira no kubaka umuco n’indagagaciro z’Umunyarwanda bagomba gushyira imbaraga mu kurwanya inyito ubu zadutse wumvana bamwe na bamwe aho bita bamwe Abakonyine, Abanyamulenge, Abashi ,ukumva rimwe n’ababibwirwa ntacyo bibatwaye ,ariko urebye kure wasanga ari urugendo rwo kuvangura rushobora kuba rwaratangiye bigezo. Hari izindi mvugo n’inyito abarwanya ubutegetsi bw’u Rwanda nabo biharaje bita abandi ngo ni abavantara, ukibaza izo nyito icyo zihatse n’icyo zimaze ukakibura.

Kuba umuntu yaravukiye imahanga mu buhunzi atiteye ahubwo byarakozwe n’ivangura agataha mu gihugu cye, ni gute waba uri umusirimu mu mutwe ukamwita amazina nk’ayo? Dupimirwa ikigero cy’ubwenge n’imikorere yabwo kubyo dukora n’ibyo tuvuga.

Abanyarwanda tugomba kuba abasirimu muri byose,amacakubiri ayo ariyo yose ni ikimenyetso cy’imitekerereze idahwitse. Kuba twagira imiryango tubamo yacu mito kuva kuri ba data na ba mama, ba datawacu na ba masenge, ba mama wacu na babyara bacu n’abandi numva kuri njye nta kibazo, kandi nabwo batora umukuru w’umuryango iyo kenshi uwari mukuru apfuye kugirango abana basigaye ari imfubyi badatatana bakishakamo ubahagarariye.

Ibi navutse nsanga ariko byakorwaga mu miryango mito ya hafi kandi n’ubu birahari ariko nabyo ntawe ukwiriye kubigenderaho kuruta kugendera ku bumwe bwacu nk’abanyarwanda. Dukwiriye kunga ubumwe twese nk’abanyarwanda tugaharanira kugira igihugu cyiza twishimira.

Banyarwanda bene wacu aho muri hose twiyubakemo Ubunyarwanda, tumenye ko turi abantu buntu.

Harakabaho u Rwanda ingobyi iduhetse twese bene Kanyarwanda.

Kwezi Jean, umusomyi wa IGIHE

Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .