00:00:00 IGIHE NETWORK KN KINYARWANDA EN ENGLISH FR FRANCAIS

Paul Kagame, Perezida ubereye Abanyarwanda

Yanditswe na Beatrice Mukamuligo
Kuya 4 June 2024 saa 06:36
Yasuwe :

Ubwanditsi: Ibikubiye muri iyi nkuru ni ibitekerezo bwite by’umwanditsi Beatrice Mukamuligo, umusomyi wa IGIHE.

Mu gihe u Rwanda rwitegura amatora y’Umukuru w’Igihugu ateganyijwe tariki ya 15 Nyakanga 2024, ni ngombwa ko Abanyarwanda bahitamo umukandinda ubikwiye uzayobora u Rwanda mu myaka itanu iri imbere. Perezida Paul Kagame agaragaza ubushobozi bwe budashidikanywaho bw’umwuga ndetse n’ubunararibonye nk’umuyobozi w’icyitegererezo.

Kuva mu 2000, Paul Kagame ari ku ruhembe rw’umuheto, yagaragaje ubunararibonye butangaje n’ubuhanga mu nzego zitandukanye, uhereye ku miyoborere n’iterambere ry’ubukungu kugeza kuri dipolomasi mpuzamahanga. Bigaragazwa n’ibikorwa by’ingenzi byafashije u Rwanda kuba igihugu gifite iterambere ryihuse, aho yagikuye mu icuraburindi akakigeza ku mucyo.

Nk’uwahoze ari Umuyobozi Mukuru w’Ingabo za FPR Inkotanyi, Perezida Kagame yagaragaje ubushobozi bwo gufata ibyemezo bigoye mu bihe bikomeye. Ku buyobozi bwe, Ingabo za RPA zahagaritse Jenoside yakorerwaga Abatutsi mu 1994, hubakwa urufatiro rw’amahoro arambye mu kubaka u Rwanda rwiza. Hashyizweho ingamba zo kubaka igisirikare, polisi n’izindi nzego z’umutekano by’umwuga mu gihugu ndetse n’ahandi ku Isi hatangwa umusanzu wo kugarura amahoro mu gihe bisabwe.

Kagame yashyize mu bikorwa politiki nshya n’amavugurura akomeye yahinduye igihugu mu bukungu n’imibereho myiza bihuriweho na bose ntawe uhejwe. Aha twavuga ko uburezi n’ubuzima byashyizwemo imbaraga hubakwa amashuri n’amavuriro ku buryo byorohereza Abanyarwanda kwiga no kwivuza neza. Ku buzima, hubatswe uruganda rukora imiti n’inkingo “Biontec” ruzafasha Afurika yose kubona inkingo.

Kugira ngo amajyambere dufite ubu agerweho, Kagame yashyize ingufu nyinshi mu kwigisha abaturage gukura amaboko mu mifuka bagakora. Kugira ngo ukore neza, ni uguhindura imitekerereze ukumva ko bishoboka, ukagerageza nta kurambirwa nk’uko ubwe yabivuze agira ati “Urugendo rw’amajyambere rurarushya ariko kutagira amajyambere birica. Tugomba rero kwanga gupfa”.

Ni henshi yagaragaye ahwiturira Abanyarwanda kwigira aho agira ati ”Kuki wakwishimira guhabwa n’undi muntu? Kuki wowe utakura aho akura ibyo aguha? Mu kwihutisha iterambere, hashyizweho serivisi z’ikoranabuhanga: Kuri murandasi na telefoni ngendanwa ni ho dusanga serivisi nyinshi zihuza abaturage n’inzego za Leta mu gusaba no gutanga serivisi.

Mu kwegera abaturage, hashyizweho gahunda y’Umushyikirano aho Abanyarwanda bagaragarizwa gahunda za Guverinoma bagatanga ibitekerezo byubaka. Perezida agira ati “Umushyikirano si ibiganiro gusa, ni urubuga aho abantu bose batanga ibitekerezo uko igihugu gihagaze”. Naho “Rwanda day”, Perezida aha umwanya Abanyarwanda batuye hanze y’u Rwanda wo gutanga ibitekerezo byubaka hareberwa hamwe icyateza imbere igihugu, hatangwa n’ibisubizo ku bibazo bihari. Kuri we, “umuturage ku isonga”. Yagiriye ingendo nyinshi mu ntara no mu turere by’igihugu yumva ibyifuzo by’abaturage akabikemura tutirengajije umuganda akorana n’abaturage.

Ntitwakwirengagiza ibikorwaremezo bitandukanye byubatswe: Imihanda yarakozwe mu turere twose none turahahirana nta nkomyi.

Amashanyarazi n’amazi byashyizwe mu turere twose. Aha Kagame yagize ati ”Gukorera mu biro bifite amashanyarazi njyewe utayangezaho, urakoramo iki?” Bigaragaza ko yifuriza abaturage bose kugerwaho n’ibyangomba byafafasha mu iterambere.

Hubatswe ibibuga by’indege bifasha ingendo zo mu kirere na za sitade zifasha mu mikino n’imyidagaduro ku rwego mpuzamahanga. Amahoteli menshi ndetse n’ibyumba by’inama ku rwego mpuzamahanga byarubatswe ndetse hakiriwe inama nyinshi aha twavugamo inama ya CHOGAM22 yitabiriwe n’ibihugu byinshi.

Mu buhinzi n’ubworozi, abaturage bibumbiye mu makoperative bahabwa ifumbire n’imbuto byongera umusaruro. Mu bworozi gahunda ya “Gira inka munyarwanda” yoroje benshi. Mu kongera agaciro k’ibikomoka ku mata hubatswe inganda zitunganya umusaruro wayo twavugamo uruganda rwa Inyange n’andi makaragiro.

Ku rwego mpuzamahanga, Paul Kagame afatwa nk’umuyobozi wubahwa kandi ufite imbaraga, ufite uruhare rukomeye mu guteza imbere amahoro, umutekano n’iterambere muri Afurika no hanze yayo. Ijwi rye rigera kure mu nama z’akarere no ku rwego mpuzamahanga.

Ibikorwa byagezweho ni byinshi mu myaka 30. Paul Kagame afite ubushobozi bukenewe kugira ngo u Rwanda rurusheho kugira iterambere n’umutekano birambye hasigasirwa ibyagezweho. Ubunararibonye bwe, ubunyangamugayo n’ibitekerezo bisobanutse bituma aba umukandida mwiza wo gukomeza kuyobora u Rwanda mu nzira y’iterambere. Hamwe n’ Abanyarwanda bose, intego ni “Ugusigasira ibyagezweho, bakomeza kubaka kurushaho u Rwanda bifuza”.

Perezida Paul Kagame yongeye kwiyamamariza kuyobora u Rwanda mu matora y'Umukuru w'Igihugu ateganyijwe tariki ya 15 Nyakanga 2024
Ubwo Perezida Kagame yari yasuye abagizwe ingaruka n'ibiza i Rubavu mu 2023
Umuganda watanze umusanzu ukomeye mu kubaka igihugu
Umwanditsi Beatrice Mukamuligo asanga Paul Kagame ari Perezida ubereye Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .