Nihavugwe n’ubutwari bw’abarimu bo muri Kaminuza zafunzwe

Yanditswe na Paul Mbaraga
Kuya 14 Nyakanga 2020 saa 09:49
Yasuwe :
0 0

Hari kuvugwa byinshi kuri za Kaminuza zafunzwe ariko umwanya uri guhabwa mwarimu ni agahomamunwa.

Kaminuza zafunzwe zazize imicungire mibi y’umutungo wazo mu gihe abarimu bo bari bahagaze ku ireme ry’uburezi. Uburezi ntabwo ari ubucuruzi, nicyo mwarimu yahagazeho yitangira abana b’u Rwanda ngo batazasohoka bafite ubumenyi bupfubye muri Kaminuza bari bihitiyemo bakahahurira na mwarimu ushinzwe kubungura ubumenyi ntacyo abasabye.

Mu bucuruzi busanzwe, iyo utishimiye icyo warambagije, usanze atari cyo watekerezaga ko cyakugirira akamaro uhita ukirekura nyiracyo akazakigurisha abandi. Mu burezi ikigurwa ni ubwenge budapimwa ku kiro. Ababuhabwa ni abantu utatererana ngo nuko nyiri Kaminuza wabaguhaye ataguhembye kandi ariwe wakira amafaranga abanyeshuri bamuhaye ngo aguhembe. Utagarutse ngo ubigishe, waba ugize uruhare mu kwangiza amahirwe yabo ku ntumbero y’ubuzima bwabo bose, kandi waba uhombeje igihugu na sosiyete nyarwanda muri rusange.

Mfite imyaka 71 ariko sindibagirwa umufurere y’umuyozefiti wanyangiye kwiga mu mwaka wa gatandatu hafi y’iwacu muri 1963 yitwaje ko narengeje imyaka. Icyo gihe nagize amahirwe mbona undi muyobozi w’amashuri muri kilometero 90 uvuye iwacu, ndiga nsinda ikizamini cya Leta nkomeza amashuri ndaminuza.

Iyo bitagenda gutyo, mba narakuze wenda ndi mayibobo cyangwa narashoboye kwirwanaho mu bundi buryo ariko ntabarirwa mu ntiti z’igihugu. Uyu munsi umubyeyi n’umunyeshuri uzi neza ko yatanze amafaranga ye ngo yige azi ko mwarimu azahembwa nyuma, akumva ko atarahembwa kandi yarakomeje kumwigisha, we azamufata nk’intwari.

Nyakubahwa Perezida Kagame yigeze kunenga Abanyarwanda bajya mu tubari cyangwa muri restaurant bakabagaburira ibiboze cyangwa ntibishimire izindi serivisi bakijujuta ariko ejo bagasubirayo. Nibo bahahombera ku mufuka wabo no mu mutwe wabo kuko bahava barakaye aho kuruhuka bagiyeyo bashaka. Bitandukanye n’umunyeshuri wasogongeye ku nyigisho za mwarimu ejo akagaruka n’ejo bundi akagaruka. N’iyo ataje yirwanaho na bagenzi be kugira ngo amenye inyigisho zatanzwe adahari azashobore kujya mu kizamini adategwa. Nuko azi neza ko ya manota ahabwa ari mu bizubaka ejo hazaza he. Ejo najya mu yindi kaminuza nubwo bamunyuza mu kizamini cy’igeragezwa, ashobora kurokoka ntasubizwe inyuma abikesha mwarimu wamusindagije yaje ku kazi n’amaguru cyangwa yaburaye.

Muri kaminuza kandi ntabwo higa ibitambambuga. Mwarimu ageze imbere y’abanyeshuri akarya iminwa, yaseba kandi abanyeshuri ntibakwemera gukomeza kwigishwa na we. Jyewe ubwanjye nigeze gukina ikinamico aho twabaga dufite ibyo twafashe mu mutwe tukabivugira imbere y’abantu. Umukino umwe twashoboraga kuwukina inshuro nyinshi imbere y’abantu batandukanye ariko buri gihe uko nazamukaga ku ruhimbi (scene) bundi bushya ku mukino wisubira, sinaburaga kugira igishyika cy’impungenge ko wenda abantu batari bwishime nkuko ab’ubushize nabashimishije, bigatuma nitegura neza kurushaho.

Imyaka yose maze mu burezi, buri munsi uko ninjiye imbere y’abanyeshuri mba mfite icyo gishyika cyo kugira ngo abanyeshuri banjye dutandukane bumvise ko nabagiriye akamaro.

Biteye isoni kumva umuyobozi wirirwa wicaye mu ifuteyi asoma amadosiye, avuga ngo abarimu bo muri za Kaminuza zafunzwe batanze uburere buciriritse aribo bikokoye bakirihira ayo gutega, bakarya rimwe mu munsi, bakirukanwa mu nzu bacumbitsemo ariko bagaharanira kutaba ibigwari nka ba shebuja, bagakomeza gukurikirana kwigisha abanyeshuri bahawe bitaye kudaseba imbere yabo.

Icyaha ni gatozi, nikibazwe ba nyirabayazana aho gupfobya akazi ka mwarimu. Ahubwo Leta nishyireho ikigega cyo kugoboka abakozi muri za serivisi rusange zifitiye igihugu akamaro kanini (uburezi, ubuvuzi…) kugira ngo nibibaho ko abakoresha ba bihemu, abarimu bagobokwe.

Leta nayo ifite uruhare mu gihombo cy’abarimu bitanze mu gihe yakingiraga ikibaba bene gushinga izo Kaminuza. Umuntu arinda atumbagiza imyenda irimo no gupfobya agaciro k’ifaranga ry’igihugu muri banki Lambert hanyuma ngo yarakurikiranywe, yagiriwe inama, kugeza aho imyenda irenga miliyari n’igice amategeko ahari cyane cyane kuri sheki zitazigamiwe kuki? None mwarimu witanze ngo afashe abana gutera intambwe niwe ubaye igitambo ngo yatanze uburere buciriritse? Wowe wakingiye ikibaba abanyamakosa ni wowe wishe ireme ry’uburezi kandi ushinzwe kuribungabunga.

Ubu se ko uri kubwira abarimu ngo nibihutishe kuzana amanota y’abanyeshuri ngo babategurire ahandi bazajya kwiga, watekereje ku mpamvu ayo manota batayatanze kare nkuko amabwiriza ya Kaminuza abibasaba? Hari abareze ba shebuja mu buyobozi bw’imirimo no mu nkiko bahabwa imishahara yabo, benshi ariko ni abibwiraga ko kwibikaho amanota ariyo ntwaro basigaranye yo kwishyuza imishahara yabo, nyamara nta na kimwe muri kubasezeranya nibatanga ayo manota uretse guhonyora uburenganzira n’ishema ryabo ngo batanze uburere buciriritse mutanabupimye? Erega na MINEDUC ifite uruhare mu guhombya ba Rwiyemezamirimo bashinze zimwe muri za Kaminuza zafunzwe ariko icyo ni ikindi kibazo ntashaka kwinjiramo.

Amategeko yahaga abarimu bo muri za Kaminuza zafunzwe uburenganzira bwo kwishyira hamwe bagasezera icyarimwe ba shebuja muri izo Kaminuza cyane cyane ko bene kuzishinga bafataga icyemezo cyo kutabahemba batabagishije inama. Iyo babikora batyo, Inama nkuru y’amashuri makuru na za Kaminuza (HEC) yari kubita ibigwari bikorera inda zabo gusa. Kuba batarabikoze rero HEC nibafate nk’intwari aho gupfobya ubwitange bwabo.

Paul Mbaraga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .