00:00:00 IGIHE NETWORK KN KINYARWANDA EN ENGLISH FR FRANCAIS

Ku Gisimenti barabatashya cyane!

Yanditswe na Kwezi Jean
Kuya 10 May 2022 saa 04:57
Yasuwe :

Baca umugani mu Kinyarwanda ngo ijisho rya mukuru ntirizinduka gusa ahubwo riba ryagiye kureba. Nguko uko nanjye nafashe icyemezo cyo kujya gusura ku Gisimenti naherukaga kera mbere y’icyorezo cya covid 19.

Mfasha rero usome inyuguti ku yindi dutemberane aha hantu havugwa byinshi na we waba warumvise.

Ndi mu modoka irimo kugenda ku muvuduko wateganijwe,ndi mu muhanda wa Rubavu-Kigali, ni mu ijoro ahagana saa mbili n’igice. Ngeze ahitwa Shyorongi hejuru aho nitegeye neza umujyi wa Kigali ubwirwa n’urujeje rw’amatara yo ku mazu no ku mihanda, kubirebera mu mpinga z’iyo misozi bibereye ijisho.

Mvuye mu kazi kanjye ariko amatsiko menshi nyafitiye kugera ku Gisimenti nsanzwe nzi kuva kera. Uko hagenda hahinduka umunsi ku wundi nzi kuhagereranya n’ibihe byashize, kandi si Gisimenti gusa ahubwo iterambere ry’u Rwanda muri rusange ndaribona mu myaka 28 nyuma ya Jenoside yakorewewe abatutsi.

Ngeze muri Gare ya Nyabugogo, imodoka irahagarara, shoferi afungura umukandara yari yambaye aratureba abagenzi twese ati ’’Mugire ijoro ryiza’’.

Bamwe mu bagenzi nanjye ndimo turamushimira kuko yadutwaye neza . Burya gushimira byakabaye umuco kuri buri wese uguhaye serivisi nziza. Mu gihe servisi ari mbi nabwo ukamukebura mu kinyabupfura.

Mvuye mu modoka mpitamo gufata moto kuko burya ziranyaruka . Byose ndabiterwa n’amashyushyu yo kugera ku Gisimenti hakiri kare. Moto ndayibonye ,umumotari ashyiraho mubazi ubundi turahaguruka bidatinze mu minota 30 twari dusesekaye ku Gisimenti iwabo w’ibirori.

Nkwibutse ko turi muri Weekend. Buri ntambwe nateraga imbere ya buri kabari hamwe hasanzwe ari imihanda inyura muri ako gace bahindura aho kwicara, hari hateguwe neza buri wese uko ashoboye.

Abakiliya nabo bicaye barimo gusangira, bamwe baseka abandi babyina injyana zumvikaniraga mu ndangururamajwi ziba ziteretse imbere ya buri muryango.

Bimwe by’ab’ubu, hari hahiye koko! Bivuze ngo abantu bariho banywa ubona bishimye cyane bizihiwe rwose . Hirya gato numvise bacuranga birimo kuba(Live) indirimbo z’ivugabutumwa(Gospel), mba ninyabijeyo ngo nanjye mfatanye nabo guhimbaza Imana yadufashije mu bihe bitambutse bitari byoroshye by’icyorezo cya Covid 19.

Ngeze muri ako kabari nsanga ibintu byashyushye, indirimbo n’izo guhimbaza Imana dusanzwe tuzi mu nsengero, itandukaniro ryari rihari gusa n’uko nta bashumba nabonaga. Gusa nabonaga abo nagereranya nk’abadiyakoni mu rusengero, abasore n’inkumi barimo gutanga ibinyobwa n’ibiribwa, abandi barimo kwandurura amacupa ari nako bakira abantu barimo kugenda baza.

Imbyino z’Imana zarabyinwe karahava , bamwe bikura amakoti kuko icyunzwe cyashokaga ku maso yabo. Biragoye kumenya niba abazibyinaga bahimbawe barakiriye agakiza cyangwa niba aribyo twita gukorwaho byabateraga kuryoherwa cyangwa niba ari imbaraga z’agasembuye zabakoreshaga.

Muri rusange bari bahuriye ku kintu kimwe ‘’Umunezero’’. Kera kabaye injyana zarahindutse ntangira kurushaho kumva ko aho ndi atari mu rusengero kuko bahise bakubitamo injyana za Lucky Dube, nuko Reggae irabyinwa kugeza ubwo abacuranzi bahinduye batwinjiza mu njyana ya karahanyuze.

Bongeyemo injyana gakondo za Kinyarwanda zakunzwe zaje zunganirwa n’injyana za Lumba zo hakurya mu baturanyi b’ i Congo . Agafanta nanywaga gashizemo narasohotse nkomeza no mu bindi bice byose, gahunda ni imwe, kuryohereza abagana aka gace.

Nagendaga mpura cyane cyane n’abasore n’inkumi batandukanye baje kuryoshya. Iri naryo n’ijambo rigezweho rivuga kwishimisha.

Nifuzaga kumenya byimbitse niba ibivugwa ku Gisimenti by’ubusambanyi bukabije kandi bubera mu ruhame ari ukuri. Ku bw’amahirwe nahavuye ntabyo ijisho ryanjye ribonye gusa hafi aho hari amacumbi menshi atandukanye, ahari ubanza wenda abakora ibikorwa by’ishimishamubiri ariho babikorera.

Icyo nabonye kigomba kwitabwaho mu rwego rwo kugira ngo aka gace gakomeze kuba ahantu heza habereye ibirori ku Banyarwanda n’abanyamahanga bahasura, ni ukonoza uburyo imiziki yaho ihacurangirwa byakorwa ariko bikagira umurongo ufatika bikorwamo kuko nkuko nabivuze, uko ugenda utera intambwe imbere y’umuryango wa buri Kabari wumva hari imiziki bazamuye kugera hejuru itandukanye kandi byegeranye cyane noneho kumenya guhitamo injyana ukurikirana bikagorana.

Bishoboka hatekerezwa uburyo abacururiza muri kariya gace bajya bashaka umushyusharugamba umwe mu muziki (DJ) ususurutsa buri gace nibura muri metero nka Magana abiri.

Ubwo naganiraga n’inshuti yanjye twahasohokeye undi munsi, nasanze na we afite icyo cyifuzo cy’uko ahubwo hakwiriye kubaho uburyo bwo gushaka indangururamajwi zizengurutswa kariya gace, noneho hakaba abashyushyarugamba(DJs) batandukanye bazajya basusurutsa abasohokera Gisimenti, kuburyo aho waba wicaye hose umuziki wakugeraho kandi ukakuryohera.

Abatanga serivisi ahantu nk’aha hahurira abantu benshi bagomba kuba bakorana umwete kandi bafite indangagaciro zikwiriye zo kwakira ababagana neza. Ahantu nk’aha hahurira abantu benshi niho hari isura y’igihugu mu kwakira abantu baba abanyagihugu cyangwa abanyamahanga , hagomba rero kwitabwaho cyane.

Mu gihe twitegura abashyitsi b’Imena bagenda batugana cyane cyane aba bazaza muri CHOGM mu kwezi gutaha ,r eka bazasange ibintu ari uburyohe.

Ku Gisimenti haragendwa kandi ni iwabo w’ibirori byuje amafunguro n’ibinyobwa biherekejwe n’injyana z’indirimbo z’iyo n’ino, byose bitera akanyamuneza no kuruhura abahagenda.

Ni mwakire intashyo za benedata na bashiki bacu basohokera ku Gisimenti.

Ku Gisementi haragendwa ku bato n'abakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .