00:00:00 IGIHE NETWORK KN KINYARWANDA EN ENGLISH FR FRANCAIS

Ivumburamatsiko ku mibereho y’Igisiga cyitwa Samusure

Yanditswe na Nzabonimpa Jean Baptiste
Kuya 10 Gicurasi 2021 saa 07:58
Yasuwe :
0 0

U Rwanda uwavuga ko ari igihugu cyatatswe ibyiza na Rurema ntabwo yaba akabije. Nawe se reba imisozi myiza, imirambi, ibirunga, ibiyaga, inzuzi n’imigezi, ibibaya n’amashyamba kimeza ahantu hose n’ibindi byiza nyaburanga bitandukanye.

Ntabwo ari ibyo gusa ahubwo iki gihugu gifite amoko menshi atandukanye y’ibiguruka harimo ibisiga, inyoni, ibinyugunyugu, amavubi, inzuki n’ibindi.

Buriya inyoni n’ibisiga tubona mu kirere biguruka n’ibyo tutabasha kubona kuko tudakunze gusura aho byibera kuko hari ibiba mu mashyamba kimeza, ibiba mu bishanga n’ahandi, ariko burya buri bwoko buba bufite umwihariko mu miterere n’imibereho yabwo ya buri munsi.

Uwavuga igisiga cyitwa Samusure nubwo waba utakiziho byinshi ariko hari amakuru yacyo azwi. Abana bato bakunda kukibaza niba bazapfa cyangwa bazarama. Iyo kirebye hejuru abana barishima bavuga ko bazarama ariko iyo kirebye hasi barababara ngo bazapfa.

Iki gisiga gifite amababa hafi ya yose ajya gusa n’umukara uretse ko agira uturongo tw’umweru ku mirizo. Amaguru ya Samusure ni umweru kandi iyo iguruka ubona utubara tw’umweru mu mababa.

Samusure y’ingore rimwe na rimwe ishobobora kugira amaguru ahinduka ikigina bigaterwa n’imyaka iba igezemo. Ubusanzwe Samusure bayita Samusure wa Rusunzu bitewe n’isunzu riri ku mutwe wayo.

Ingabo n’ingore zose zigira isunzu uretse ko iry’ingore riba ari rito. Amaso ya Samusure aba ari umuhondo wa zahabu. Iyo Samusure ikiri nto iba ijya gusa n’igisiga gikuze ariko amababa y’intoya aba atijimye cyane kandi n’isunzu riba ari rigufi.

Igisiga cya Samusure gishobora kugira uburebure buri hagati ya santimetero 53-58. Ingabo ishobora gupima uburemere buri hagati ya garama 912 na kilogarama 1.3, naho ingore igapima kilogarama ziri hagati ya 1.3 na 1.5.

-  Ibitunga Samusure

Ubusanzwe igisiga cya Samusure ntigikunda kugenda kiguruka mu gihe kirimo guhiga, ahubwo kijya ahantu hamwe kigatuza ubundi cyabona umuhigo kikamanuka kikawucakira.

Samusure ikunda kurya imbeba, utunyoni duto, imiserebanya, ibiburangoro n’amafi, uretse ko kandi ishobora no kurya inkeri n’imizabibu byo ku gasozi.

-  Imyororokere ya Samusure

Samusure y’ingabo n’iy’ingore zikora umuryango urangwa no kudacana inyuma kandi igihe icyo ari cyo cyose mu mwaka iyo zibishatse zitera amagi. Iyo zishatse gutera amagi zubaka icyari hejuru mu giti hagati ya metero 7-45 uvuye ku butaka. Iyo ingore imaze kubangurirwa itera amagi nibura abiri cyangwa igi rimwe.

Ingore yonyine ni yo igira uruhare mu kurarira ariko muri icyo gihe ingabo ni yo ifata inshingano zo kuyigaburira. Gusa rimwe na rimwe ingore ishobora kujya gushaka ibyo kurya. Igihe cyo kurarira ni iminsi 42. Igitangaje ni uko iyo yateye amagi abiri igihe cyo guturaga igi rimwe n’irindi kiba kirimo ikinyuranyo cy’iminsi 15. Umushwi cyangwa imishwi iba imaze gukura mu minsi 53 ariko ikagumana n’ababyeyi bayo hagati y’amezi abiri cyangwa atatu kugira ngo ibone kwigenga.

Ibisiga bya Samusure bikuze nubwo bidafite ibindi bikunda kubirya ariko imishwi yazo iyo ikiri mu cyari inkende zirayirya. Ntabwo ari ibyo gusa kuko n’amagi ya Samusure hari ubwoko bw’injangwe zo ku gasozi zikunda kuyarya.

Igisiga cya Samusure ntigikunda kugenda kiguruka mu gihe kirimo guhiga ahubwo kijya ahantu hamwe kigatuza ubundi cyabona umuhigo kikawucakira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .