Isaha yo gusoma, umusemburo w’iterambere twifuza

Yanditswe na Hategekimana Richard
Kuya 4 Kanama 2020 saa 10:33
Yasuwe :
0 0

Ku Isi hose, iterambere ry’Imiyoborere myiza, ubukungu, ubutabera ndetse n’imibereho myiza by’abaturage bishingira ku bumenyi bw’abaturage bakomora mu gusoma ibitabo.

Gahunda ya Leta y’u Rwanda (2017-2024), mu nkingi y’iterambere ry’ubukungu (Economic Transformation), bigaragara ko Ubukungu bw’u Rwanda bugomba kugerwaho bushingiye ku bumenyi bw’Abaturage (Economy Based Knowledge).

Ubumenyi ndetse n’ubuhanga bukomoka mu gukora ubushakashatsi no gusoma, haba ibitabo bivuga ku miyoborere myiza, ibitabo bivuga ku iterambere ry’ubukungu, ibitabo bivuga ku mibereho myiza, siyansi, ubutabera n’ibindi.

Byakunze kuvugwa kenshi ko ushaka guhisha umunyafurika amuhisha mu gitabo kuko ababivugaga bazi ko ariyo soko y’ubwenge n’ubumenyi biganisha ku iterambere.

Iryo curaburindi ry’ubujiji abanyarwanda dutangiye kurivamo ariko ni byiza ko kurivamo neza turushaho guteza imbere umuco wo gusoma mu nzego zose.

Kugira ngo ibi bigerweho ni byiza ko mu nzego z’abikorera bashyiraho isaha yo gusoma ibitabo (Reading Hour), mu madini bashyiraho isaha yo gusoma, mu nzego za Leta hashyirwaho isaha yo gusoma nk’uko habaho buri wa gatanu amasaha ya siporo. Ni byiza cyane kugira isaha yo gusoma ibitabo ku bakozi bose.

Nigeze kugirana ikiganiro n’umukozi umwe arambwira ati:"Buri wa gatanu nyuma ya saa sita twakoraga siporo tugahagarika akazi ariko ubu kubera COVID-19 nta siporo igikorwa ariko iyo tuza kuba dufite isaha yo gusoma mu kazi twese tukajya mu isomer byagira umumaro cyane kandi bigatuma dukomeza gutanga umusaruro ndetse mwinshi mu kazi."

Ibihugu byateye imbere abaturage baho barangwa no gusoma ibitabo bityo bikanafasha kwihuta mu iterambere.

Birakwiriye ko uwo muco ukwira hose niba koko turajwe ishinga n’iterambere. Uzasanga aho intiti ziteraniye zihigana umubarer w’ibitabo zasomye n’ibyo zasomye. Abize Kaminuza barabizi, icyo ugiye kuvuga cyose uba ugomba kubanza kuvuga icyo abandi bakivuzeho kugira ngo bagihe agaciro.

Nyakubahwa Perezida wa Repubulika, Isoko Abanyarwanda tuvomaho iteka adutoza ko dukwiriye kurangwa no gusoma ndetse no kwandika ibitabo byose bigamije iterambere rirambye ry’u Rwanda.

Twese, dufatanye kwimakaza uyu muco mwiza wo kwandika ndetse no gusoma ibitabo bityo twiyubakire u Rwanda rwacu ndetse n’Afurika.

Byaba byiza kurushaho, mu ngengo y’imari ya buri kigo haba icya Leta, Imiryango Nyarwanda Itari Leta, Abikorera ndetse n’abantu ku giti cyabo iteka bateganya amafaranga yo kugura ibitabo,ibi bikaba umuco nkuko abenshi usanga bafite ifatabuguzi rya buri kwezi ry’ibinyamakuru.

Mu gihugu cya Singapore, abaturage benshi barangwa n’uyu muco wo gusoma ndetse no kwandika ibitabo, byabafashije kwihuta mu iterambere.

Tugure ibitabo cyane cyane ibyanditswe n’Abanyarwanda dukomere ku ndangagaciro na Kirazira z’umuco Nyarwanda. U Rwanda ni jyewe na we tugomba kurwubaka.

INKOTANYI zatwubakiye Umusingi ukomeye tuwubakireho ibikorwa byinshi byiza bishingiye ku bumenyi dukura mu bitabo.

Dusome ibitabo bivuga amateka y’u Rwanda, ibitabo bidusubiza ku isooko, ibitabo bidufasha gutegura neza imishinga yubaka u Rwanda, ibitabo bitoza Urubyiruko n’abategarugori gukunda u Rwanda na bene Kanyarwanda n’ibindi bitabo byiza bibereye Intore z’u Rwanda.

Isaha yo gusoma ibitabo ibaye ihame mu bakozi bose byafasha kwihutisha iterambere twifuza ndetse bikadufasha kugera ku cyerekezo cya 2050 ndetse n’icy’Afurika cya 2063.

HATEGEKIMANA Richard,
Umuyobozi w’Urugaga rw’Abanditsi mu Rwanda,
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .