00:00:00 IGIHE NETWORK KN KINYARWANDA EN ENGLISH FR FRANCAIS

Ikinyamakuru cyo muri Afurika y’Epfo cyitwikiriye urupfu rwa Karemangingo mu guharabika u Rwanda

Yanditswe na Albert Rudatsimburwa
Kuya 20 Nzeri 2021 saa 11:18
Yasuwe :
0 0

Ikinyamakuru cyo muri Afurika y’Epfo, Daily Maverick cyatangaje inkuru igamije kugereka ku Rwanda urupfu rwa Revocat Karemangingo, wishwe arasiwe muri Mozambique mu cyumweru gishize.

Inkuru ya Daily Maverick ivuga ko ingabo z’u Rwanda muri Mozambique “ziri gufasha Perezida w’u Rwanda kwikiza abatavuga rumwe na we”. Uwo ni umurongo w’icengezamatwara umaze iminsi ukwirakwizwa mu matsinda y’abarwanya u Rwanda.

Icya mbere umuntu yibaza ni uburyo Peter Fabricius wanditse iyo nkuru, mu munsi umwe gusa yari yamaze kumenya uwishe Karemangingo ndetse agahita abihuza n’ingabo z’u Rwanda ziri muri Mozambique.

Karemangingo yishwe ku mugoroba wo ku wa Mbere w’icyumweru gishize hanyuma ku wa Kabiri inkuru ya Fabricius iba irasohotse.

Uyu Fabricius nta kimenyetso na kimwe agaragaza. Ni ugupfundikapfundika ubundi akarenzaho isesengura rye ribogamye, akabitwikiriza ibirego by’Abanyarwanda bijyanye mu buhungiro basanzwe bavumira ku gahera u Rwanda.

Mu nkuru ye yanashyizemo bimwe mu birego byazamuwe na Michela Wrong, umunyamakuru w’Umwongerezakazi wafashe urwango yanga u Rwanda akaruhinduramo ubucuruzi bushingiye ku bwanditsi bw’ibitabo, ari nako asukiranya inkuru ze mu binyamakuru byo mu Bwongereza zibasira Perezida Kagame.

Inkuru ya Daily Maverick ni ikimenyetso cy’ukwishyira hejuru kw’abazungu bitajya byihishira.

Iyo bigeze kuri Afurika n’Abanyafurika, ntacyo Fabricius na Wrong batakora mu gihe cyose babishaka. Muri iyo nkuru Wrong agira ati “Bigaragara ko ibyumvikanyweho biri kugerwaho. Mozambique ifite inyungu mu Ngabo z’u Rwanda, hanyuma ba maneko b’u Rwanda bagahembwa guhiga abafatwa nk’abanzi b’igihugu.”

Uku kwibasira u Rwanda baruharabika kwirengagiza impamvu ya nyayo yatumye ingabo z’u Rwanda zoherezwa muri Mozambique.

Uyu mwaka ni bwo Mozambique yasabye u Rwanda nk’igihugu cy’ikivandimwe kubafasha guhashya iterabwoba. Ibyihebe byari byamaze kwigarurira bimwe mu bice bya Mozambique, abaturage babaye impunzi mu gihugu cyabo. Ingabo z’u Rwanda n’iza Mozambique zarafatanyije zitsinda ibyihebe, zigarura ituze n’iyubahirizwa ry’amategeko. Abaturage basubiye mu byabo.

Daily Maverick ibyo ntibyitayeho, ahubwo ibihinduramo ko Mozambique yahamagariye u Rwanda kuza gukorera ibyaha ku butaka bwayo.

Ibi binyoma bigamije kuyobya uburari kuko impunzi z’Abanyarwanda muri Mozambique na mbere y’uko ingabo z’u Rwanda zijyayo zaricanaga. Urugero, muri Kanama 2019, abantu bitwaje intwaro bishe barashe Louis Baziga, umucuruzi w’Umunyarwanda wabaga i Maputo. Icyo gihe hari abandi barusimbutse.

Hari umusesenguzi wigeze kuvuga ati “Muri Mozambique hari umubare munini w’abahoze ari Interahamwe n’izindi nzobere mu bwicanyi zagize uruhare muri Jenoside yakorewe Abatutsi, nyuma barahunga.”

Fabricius na Wrong bafite intego imwe banakunze kugaragaza mu byo bamaze igihe bandika: Intego yabo ni ugutera icyuhagiro imitwe y’abagizi ba nabi igamije guhungabanya umutekano wa Leta yemewe n’amategeko y’u Rwanda.

Ni uburyo kandi bwo gutagatifuza imitwe yitwaje intwaro cyangwa uwo ari we wese urwanya u Rwanda barimo nka Kayumba Nyamwasa wa RNC, FLDR n’ibindi byihebe byiyemeje kudurumbanya u Rwanda.

Wrong amaze igihe atangaza ibihuha ku Rwanda, yitwaje ikinyoma cy’uko ngo “FPR ariyo yarashe indege ya Habyarimana, bigatera Jenoside yakorewe Abatutsi.” Amaze igihe akorana n’udutsiko twiyemeje kurwanya u Rwanda, mu migambi mibisha yo gusebya ubuyobozi bw’u Rwanda asubiramo ibinyoma bidafite epfo na ruguru.

Daily Maverick yo nk’ibisanzwe, ihora yiteguye gusamira hejuru no gukwirakwiza ikintu cyose kivuga nabi Leta ya Kigali.

Ubwo Umunyarwanda Camille Nkurunziza yicwaga arashwe muri Cape Town, icyo kinyamakuru ntikigeze gitinzamo, intoki cyahise kizitunga i Kigali, icyo gihe na polisi cyangwa izindi nzego z’iperereza ntacyo zari zakagaragaje. Ubwo Polisi yasohoraga itangazo, yatangaje ko Nkurunziza yazize amasasu yamufashe ubwo Polisi yarasanaga n’abajura bashakaga kwiba imodoka.

Muri abo bagenda bavuga nabi u Rwanda, nta n’umwe wakosoye ibyo yari yavuze mbere y’ibyo iperereza rya Polisi ryagaragaje.

Ntibari kubikora kuko ntabwo icyo bagamije ari ukugaragaza ukuri, icengezamatwara niyo misiyo. Ni nabyo bakoze ku rupfu rwa Karemangingo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .