00:00:00 IGIHE NETWORK KN KINYARWANDA EN ENGLISH FR FRANCAIS

Icyihishe inyuma y’ibitangazamakuru byo mu Burengerazuba bikomeje kwibasirra u Rwanda

Yanditswe na Gatete Nyiringabo Ruhumuliza
Kuya 7 June 2024 saa 09:32
Yasuwe :

Ubwanditsi: Ibikubiye muri iyi nkuru ni ibitekerezo bwite bw’Umunyamategeko Gatete Nyiringabo Ruhumuliza. Yatambutse bwa mbere mu Cyongereza kuri Aljazeera, ishyirwa mu Kinyarwanda na IGIHE.

Hari umugani wa kinyafurika ugira uti ‘Igiti gifite imbuto nicyo giterwa amabuye’.

Muri iyi minsi ibinyamakuru na za televiziyo byo ku Mugabane w’u Burayi bishishikajwe no gutambutsa inkuru ziharabika igihugu cyanjye u Rwanda, na Guverinoma yacyo.

Izi nkuru zakozwe n’ibinyamakuru mpuzamahanga 17 byishyize hamwe birimo Der Spiegel yo mu Budage, The Guardian yo mu Bwongereza, Le Monde mu Bufaransa, izo nkuru bazita “Rwanda Classified”.

Izi nkuru zose zigenda zishyirwa hanze, zihurira ku kintu kimwe “Burya u Rwanda ntirumeze uko Abanyarwanda baruvuga”.

Zivuga ko u Rwanda atari gihugu cya demokarasi, atari igihugu gifite abaturage buje urugwiro, ahubwo ari igihugu gikandamiza abacyo aho buri wese ahorana ubwoba, abanyamakuru n’abatavuga rumwe na leta bagacecekeshwa , bakanicwa.

Gusa ariko ubu butumwa bukubiye muri izi nkuru buri kure y’ukuri, kandi si ubwa mbere bwumvishwe mu matwi y’Abanyarwanda.

Inkuru nk’izi ngo ziba zigambiriye kugaragaza ‘igice cy’umwijima’ cy’u Rwanda zihora mu bitangazamakuru byo mu Burayi, cyane cyane zigasohorwa iyo amatariki y’ingenzi ku Rwanda yegereje, urugero nko ku ya 07 Mata, aho dutangira iminsi ijana yo Kwibuka Jenoside yakorewe Abatutsi mu 1994.

Izi nkuru zasohowe tukiri mu bihe byo Kwibuka ku Nshuro ya 30, ndetse no mu gihe habura ibyumweru bike ngo twinjire mu matora y’umukuru w’igihugu n’ay’abadepite.

Ubu ntitwatunguwe no kubona itangazamakuru ryo mu Burengerazuba bw’Isi ryarongeye gufata uruhande rubi no gushinja ibibi bidafite aho bishingiye igihugu cyacu.

Icyakora icyadutunguye ni ibi bitero bidasanzwe by’ibi bitangazamakuru byibasiye u Rwanda. Mu minsi ishize twabonye inkuru nyinshi.

Mu gihe intambara zabuze gica zikomeje kujya mbere hirya no hino ku Isi, ibibazo by’ubukungu bikomeje kwibasira imiryango henshi ku Isi, n’ibyago biterwa n’ihindagurika ry’ikirere bihora byiyongera, biratangaje cyane kubona ibitangazamakuru bikomeye byo mu Burengerazuba bw’Isi bifate umwanya ungana gutya bikabogama bishinja amabi guverinoma y’agahugu gato muri Afurika gafite intumbero kandi byinshi byaho bigenda neza.

Ikindi cyadutunguye ni ukubona abanyamakuru benshi bakoze kuri izi nkuru barazishingiye ku buhamya bw’Abanyarwanda bari mu buhungiro barimo n’abashyize mu bikorwa Jenoside yakorewe Abatutsi, abayikoze ndetse n’abayihakana bafite impamvu zihagije yaba izabo ku giti cyabo cyangwa izishingiye kuri politiki zo guharabika guverinoma.

Ikigaragara ni uko iyo mu Burengerazuba, batariyumvisha ukongera kuvuka k’u Rwanda, imbaraga zashyizwe mu kongera kurwubaka nyuma ya Jenoside, ahubwo bagashaka kugaragaza Perezida Kagame nk’umuyobozi udashobotse udashyigikiwe n’abaturage be.

Ikibazo si raporo zabo zinenga u Rwanda mu bitangazamakuru byabo, ahubwo ni ukuba ari ‘izinenga gusa’ kandi zikaba zihora zitavuga neza guverinoma zigashingira gusa ku buhamya bw’abantu baba mu mahanga, baba bafite imigambi mibisha izwi.

Nibyo koko u Rwanda si “shyashya”. Rufite ibibazo byarwo n’imbogamizi zindi nk’indi gihugu icyo ari cyo cyose.

Byongeye kandi, ruracyari guhura n’inzitizi zidasanzwe, nk’igihugu gikomeje guharanira ubwiyunge, gusubira mu buzima busanzwe no gukira nyuma ya Jenoside yakorewe Abatutsi mu 1994, ariko si igihugu kiyobowe n’abicanyi nk’uko ibitangazamakuru byo mu Burengerazuba biba bishaka kubigaragaza.

Kubw’amahirwe ntibigoye kugaragaza ubuhemu bw’ibi bitangazamakuru ku Rwanda. Guverinoma y’u Rwanda ihora ihamagarira abatuye Isi kuza kuhasura [‘Visit Rwanda’], ngo birebere n’amaso yabo ukuri kw’ibihari.

Gahunda yarwo ya Viza n’amategeko avuguruye, binyuze mu miyoborere yuje ubunararibonye y’Urwego rw’Igihugu rw’Iterambere [RDB], biri mu bishaka guhindura u Rwanda igicumbi cy’ubukerarugendo n’ishoramari ku Isi.

Ese igihugu gifite byinshi byo guhisha, aho abaturage bahorana ubwoba bw’ubuyobozi bubakandamiza kandi buhora bubahohotera, cyashyira imbaraga mu gukurura abagisura baturuka ahandi? Ibyo ntibyabaho.

U Rwanda ni kimwe mu bihugu byiyubatse haba muri Afurika no ku Isi yose, nyuma gusa y’imyaka 30 habaye ubwicanyi ndengakamere mu mateka yarwo, aho ubu ari igihugu gishikamye, gifite demokarasi, kandi gutumbiranye icyizere ahazaza.

Ubu intego yarwo y’igihe kirekire ni ukuba kimwe mu bihugu bishikamye ku Mugabane wa Afurika.

Buri mwaka u Rwanda rusurwa n’abakerarugendo babarirwa mu bihumbi, abashoramari n’abanyemari, abanyapolitiki, n’abayobozi bakomeye ku Isi.

Rumaze kwakira amarushanwa akomeye muri siporo, inama mpuzamahanga zitandukanye zirimo iz’ikoranabuhanga n’iz’ishoramari.

Ubu u Rwanda ni iwabo wa za kaminuza n’amashuri makuru mpuzamahanga nka za Carnegie Mellon University, Africa na University of Global Health Equity, ifitanye imikoranire ya hafi na Harvard Medical School.

Ku buyobozi bwa Paul Kagame, u Rwanda rwongeye kwiyubaka ruhinduka igihugu cy’ubucuruzi, ishoramari n’andi mahirwe, ubu akaba ari leta ikora neza ifite inzego zikora neza zirimo iz’ubuvuzi, uburezi n’urw’imiturire rufashwe ukuboko na leta.

U Rwanda rumaze kumenyekana nk’ahazamukira abanyempano kandi bakanahabwa amahirwe yo kwaguka. World Economic Forum, yarushyize ku mwanya wa mbere mu bihugu byo muri Afurika byibikaho abanyempano babyo.

Ubu muri iki gihugu hari abarenga 1,000 batunze miliyoni y’amadorali ya Amerika. Raporo yo mu 2024 y’Ikigo gikora isesengura mu bijyanye n’ishoramari cya Henley & Partners, igaragaza ko uyu mubare uziyongera ku rugero rwa 80% mu myaka icumi iri imbere.

Intego y’ibitangazamakuru byo mu Burengerazuba bw’Isi yo guhindanya isura y’u Rwanda ku mahanga, ntizagerwaho rwose, cyane cyane uko abantu benshi bazarushaho gukomeza kurusura bakibonera ukuri kw’igihugu cyacu n’amaso yabo.

Imiraba ya za raporo zabyo ntizatuma Abanyarwanda batererana Perezida Kagame na guverinoma ye. Kagame yatowe binyuze mu mucyo nk’Umukuru w’u Rwanda kandi hose ahiga abandi bari bahanganye n’amajwi menshi ari hejuru ya 90.

Ni nako azabigenza muri Nyakanga, atari ukubera ko akandamiza abatavuga rumwe n’ubutegetsi ahubwo ari ukubera ko Abanyarwanda bakimufitiye icyizere, hirengagijwe ibyo amahanga amushinja, ahubwo ibi bitero by’ibi bitangazamakuru kuri Perezida bizatuma yigarurira umubare munini w’abamushyigikiye mu Rwanda n’ahandi muri Afurika.

Ubwo hatangiraga gusohorwa izi nkuru zivuga nabi ubuyobozi bw’u Rwanda, mugenzi wanjye w’umunyafurika yanyandikiye ubutumwa ashyenga adushimira Abanyarwanda, “Kubw’ibyo twakoze byose byatumye abakomeye b’Isi basigaye bamara amajoro menshi badasinziriye.”

Ibi bitangazamakuru byibasiye u Rwanda kubera ko bitiyumvisha neza uko iki gihugu gito cyo muri Afurika, cyaciye mu icuraburindi mu myaka mike ishize, kikabasha kwigarurira amahoro, demokarasi n’umutuzo binyuze mu buryo bwacyo bwihariye hamwe na guverinoma bihitiyemo, kikananga kwisanisha n’ishusho y’abo mu Burengerazuba cyangwa guhinduka uko bashaka.

Ibi bitero ariko bizahuza u Rwanda kurushaho.

U Rwanda rwateye intambwe ishimishije ku buyobozi bwa Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .