00:00:00 IGIHE NETWORK KN KINYARWANDA EN ENGLISH FR FRANCAIS

Gusubika CHOGM si igihombo ku Rwanda!

Yanditswe na Kayonga J.
Kuya 13 Gicurasi 2021 saa 07:25
Yasuwe :
0 0

Ijoro ry’uwa Gatanu ushize, nta kabuza ko hari benshi ryasize batagohetse batekereza ku gihombo basigiwe n’imyiteguro bakoze bategereje inama ihuza abakuru b’ibihugu na za Guverinoma bo muri Commonwealth, yari iteganyijwe kubera mu Rwanda muri Kamena uyu mwaka.

Isubikwa ry’iyi nama ku nshuro ya kabiri, ryaje ari inkuru itanyura amatwi ya benshi dore ko nk’abashoramari, yari amahirwe akomeye yo kongera kubyutsa umutwe nyuma y’umwaka urenga ubucuruzi bwabo buguye hasi kubera ingaruka z’icyorezo cya COVID-19. No ku batari abashoramari kandi, byari amahirwe akomeye kuko burya iyo mugenzi wawe yariye, iyo yungutse mu buryo bumwe cyangwa ubundi nawe uba wungutse.

Hari abo nabonye bishimira ko iyo nama itakibaye, kandi ugasanga harimo n’Abanyarwanda, ariko abo nabo nta kibazo, ba bangamwabo bahozeho kandi bazahoraho! Hari abandi nakwita ko batekereza hafi, bishimiye ko inama isubitswe kuko ngo ingamba zari zarafashwe zo kwirinda icyorezo no gusigasira umutekano ngo iyo nama ibe mu mutuzo, ngo zababangamiye! Abo nabo bahozeho, wenda ntibarabona aho umutekano wabuze uko biba bimeze cyangwa se barabyirengiza.

Igishimishije ni uko mu itangazo risubika iyo nama, hagaragajwe impamvu kandi yumvikana, ko inama isubitswe kubera icyorezo cya COVID-19 gikomeje gukaza umurego. Ukurikije aho imyiteguro yari igeze, birumvikana ko ku mpande zombi, haba u Rwanda n’Ubunyamabanga bwa Commonwealth, byagoranye gufata icyemezo nk’icyo cyo gusubika inama ibura ukwezi kumwe ngo ibe, nyuma y’iminsi batangaza ko nta gisibya izaba.

Perezida Paul Kagame yabigarutseho mu itangazo ryasohowe na Commonwealth , ati “Umwanzuro wo gusubika iyi nama ku nshuro ya kabiri ntabwo wafashwe mu buryo bworoshye. Ubuzima n’imibereho myiza y’abaturage ba Commonwealth ni ingenzi muri ibi bihe bikomeye. Duhaye ikaze umuryango mugari wa Commonwealth i Kigali mu gihe nyacyo.”

CHOGM ntiyahagaritswe, yarasubitswe igihe icyorezo kizacogorera izaba kandi izabera i Kigali. Ariko icyo si cyo kibazo, ahubwo ikibazo ni abatumva neza impamvu yo gusubikwa kwayo n’inyungu u Rwanda rubifitemo kurusha igihombo.

Hirya no hino ku Isi hari kuvugwa ubwoko bushya bwa COVID-19 kandi bwandura vuba kurusha ubusanzwe ku buryo n’ibihugu byitwa ko byishoboye, ibyinshi byatangiye kudagadwa ko nta gikozwe bishobora kwisanga mu nkundura mbi y’icyorezo nk’iyabayeho mu gihembwe cya mbere n’icya kabiri cy’umwaka ushize.

Ubwoko bushya bwa COVID-19 buhangayikishije Isi cyane, ni ubwagaragaye mu Bwongereza (buzwi nka B.1.1.7), ubwagaragaye muri Afurika y’Epfo (B.1.351) n’uburi guca ibintu mu Buhinde (B.1.617.2).

Ibi bihugu byose uko ari bitatu, ni abanyamuryango ba Commonwealth, bivuze ko hari abashyitsi runaka batari bake bagombaga kubiturukamo bitabiriye inama mu Rwanda. Kugeza ubu uretse ubwoko bwo muri Afurika y’Epfo n’ubwo mu Bwongereza bwabonetse mu Rwanda muri Werurwe, nta bundi burahaboneka.

Bumaze kuhaboneka, Minisiteri y’Ubuzima yahumurije Abanyarwanda ko ababonetseho ubwoko bushya batahuriwe ku Kibuga cy’Indege bagahita bashyirwa ahantu hihariye, bivuze ko nta byago byo kubukwirakwiza mu baturage byari bihari. Ni nako byagenze kuko iyo buza gukwirakwira, twari kuba tuvuga inkuru itandukanye n’iyi uyu munsi!

Nubwo kwipimisha COVID-19 byari kuba ingenzi cyane ku bazitabira inama ya CHOGM, ntabwo ubwabyo ari urukingo rw’uko nta wakwinjiza bumwe muri ubwo bwoko bushya bwa COVID-19 mu gihugu, kuko kugeza n’ubu hari abashobora kwandura ntibagaragaze ibimenyetso ariko bakanduza. Ikindi ni uko umuntu ashobora no kuyandura ari mu ndege yaraye yipimishije. Ikindi kandi, si ibihugu byose bifite ubushobozi bwo kubona ubwo bwoko bwose bushya bwa COVID-19.

Ngaho mwibaze hagize umwe, babiri, batatu cyangwe benshi binjirana iyo virusi yandura mu buryo bwihuse, ikagera mu Rwanda mu gihugu gituwe n’abasaga miliyoni 12, kikaba mu bya mbere bifite ubucucike bukabije ku Isi?

Ibikomere bya Guma mu rugo yamaze hafi amezi abiri umwaka ushize, biracyari bibisi mu buzima n’imitima by’abanyarwanda benshi, ese ni nde wakwifuza ko ubuzima bwongera gufungwa kuriya, tukongera gufungirwa mu nzu ntawe utarabuka, ntawe usura mugenzi we, ntawe ukora ubukwe kubera gusa kurangamira amadolari y’abanyamahanga azakomeza gukenerwa na nyuma y’icyorezo?

N’ibihugu byishoboye birabogoza. Nk’u Buhinde bwa gatatu mu bukungu ku Isi, kuri iki Cyumweru bwatangaje ko abantu ibihumbi 400 (Akarere kose ko mu Rwanda) banduye Covid-19, mu gihe abandi bagera ku bihumbi bine (Akagari ko mu Rwanda) bapfuye mu masaha 24 gusa. Ikirenzeho, ni uko ubushakashatsi butaragaragaza neza ubushobozi bw’inkingo zimaze gukorwa mu guhangana n’ubu bwoko bushya bw’icyorezo. Gusa n’iyo bwaboneka, ntacyo byafasha cyane ku Rwanda rumaze gukingira ibihumbi 300 muri miliyoni 12. Urukingo rwa mbere ni ukwirinda.

Niba u Buhinde bwananiwe kugenzura icyorezo n’ubushobozi bufite, u Bwongereza bukaba bwahangayitse buri mu bihugu byihagazeho, byagenda bite mu gihe ubwoko bushya nk’ubwo bwandura ku kigero cyo hejuru, bwaba bugeze mu gihugu nk’u Rwanda? Igisubizo cyonyine gishoboka ni Guma mu rugo. Bibayeho ko mu Rwanda handura abantu ibihumbi 400 ku munsi, bivuze ko mu kwezi kumwe igihugu cyose cyaba cyanduye Covid-19.

Amavuriro yose yafunga imiryango mu kuvura izindi ndwara akita gusa ku barwayi ba Covid-19, abakozi bita ku barwayi baba ingume abapfa bakiyongera, imiti n’ibikoresho byo kwa muganga byabura, ubucuruzi bwahagarara, ubuzima bwaba bubi kurusha Guma mu rugo twabonye ubushize, ya madolari yo muri CHOGM ntacyo yaba akitumariye.

Aho kwirukira amafaranga n’inyungu z’ubukungu cyangwa ibindi mu nama nka CHOGM izitabirwa n’abarenga ibihumbi umunani ukirengagiza ubuzima, bwa miliyoni 12 (ubwo ntidushyizemo ibyago ku bakwitabira inama n’isura y’igihugu), ubuyobozi bwafashe icyemezo cyiza cyo kuyisubika kuko umugani w’Umuvugizi wa Polisi y’u Rwanda CP John Bosco Kabera “Iminsi mikuru na Noheli bizahoraho”, nakongeraho nti “Inama zizahoraho” ariko twe tubaho rimwe, iyo upfuye cyangwa umugaye biba birangiye.

Icyo kwishimira ni uko ibikorwa remezo byubatswe mu kwitegura CHOGM ntaho byagiye, imihanda yubatswe Abanyarwanda bazakomeza kuyikoresha mu nyungu zabo, hoteli zubatswe zizakomeza gukoreshwa, amatungo tworoye n’imyaka twahinze twanabigurisha ahandi, igihombo si cyinshi nk’inyungu iyo amahitamo ari ‘urupfu cyangwa ubuzima’.

Byaba byiza kurindira icyorezo kikagenza make inama ikazaba mu mutuzo aho gushyuhaguzwa bikarangira duhiye. Erega n’abo banyamahanga nta bwisanzure bagira mu gihe baza bazi ko hanze icyorezo kimeze nabi. Niba yaje afite gahunda yo gusura ingagi mu Birunga ntiyaba akigiyeyo, niba yari gutembera agahaha imyenda y’ibitenge mu isoko rya Kimironko cyangwa imineke ntabyo yakora. Niba yashoboraga gutega umumotari cyangwa Taxi Voiture mu mujyi, ntabyo yaba agikoze.

Umunyarwanda yaciye umugani ngo ‘wirukira byinshi ukabura na duke wari ufite’ nyamara ‘buhoro buhoro ari rwo rugendo’.

Ibendera rya Commonwealth ubwo ryazamurwaga i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .