00:00:00 IGIHE NETWORK KN KINYARWANDA EN ENGLISH FR FRANCAIS

Abajenosideri n’abimitse ingengabitekerezo y’amacakubiri nibirindwe nk’icyorezo cyica

Yanditswe na Karangwa Sewase
Kuya 17 Gicurasi 2021 saa 11:47
Yasuwe :
0 0

U Rwanda ni igihugu gifite amahoro asesuye akaba ikiguzi kinini cyishyuwe n’abari urubyiruko. U Rwanda rworetswe n’ingengabitekerezo ya Jenoside, ivangura n’amacakubiri. Ingabo zari iza RPA zibohora u Rwanda, zihagarika Jenoside yakorerwaga Abatutsi mu 1994, u Rwanda rwongera gutahwamo ituze n’umutima w’u Rwanda wunga bene rwo.

Ntawe ukwiye kwifatanya n’abishoye muri Jenoside yakorewe Abatutsi mu 1994. Mu Rwanda, urubyiruko ruri hejuru ya 60%, nirwo rwibasirwa cyane n’abashaka kuyobya intekerezo zabo cyane ko nabo bazi ko ari amaboko y’igihugu.

Ni ejo h’u Rwanda, ni amizero yo kuramuka kwarwo, ni abayobozi b’uyu munsi n’ejo, ni ababyeyi b’u Rwanda, bakaba inkingi ya mwamba yarwo. Ni mbaraga z’u Rwanda, nibo bazabazwa u Rwanda.

Mu buzima ntawe utagira ikimwaro iyo atsinzwe, yewe n’iyo ibyo atsinzwemo byari bibi, azongwa n’ikimwaro. Ni yo mpamvu n’abahekuye u Rwanda, ubwo bishoroga muri Jenoside yakorewe Abatutsi mu 1994 bifuza kugira uwo basangira icyo cyaha cy’indengakamere.

Abakoze jenoside umubare munini bari urubyiruko, bimitse ingengabitekerezo ya jenoside n’amacakubiri, maze mu 1994 bishora muri Jenoside yakorewe Abatutsi. Ubu abo bose buzuye ikimwaro kimunga intekerezo zabo aho bari hose.

Iki kimwaro cyuzuye igisebo, bagiterwa n’uko bishoye mu migambi mibisha, batsindwa n’Inkotanyi zari mu Ngabo za RPA, zari zishamikiye ku Muryango wa FPR, kandi bari urubyiruko nkabo gusa bo bafite icyerekezo kizima na gahunda ihamye yo kubaka Igihugu.

Inkotanyi zabatsinze, zashyizeho inzego n’ubuyobozi buhamye, zikuraho ubutegetsi bubi. Ubwo bagarukaga ari abacengezi, mu gihe gito basanze Abanyarwanda basobetse ubumwe, maze batsindwa burundu, bajyana n’ingengabitekerezo y’amacakubiri na jenoside. Iyi niyo soko y’ikimwaro gikabije interahamwe n’abagize uruhare muri Jenoside yakorewe Abatutsi bahorana.

Abakoze Jenoside n’ababafasha bafite ikimwaro, intekerezo zicuramye zubakiye ku ngengabitekerezo ya Jenoside n’amacakubiri ziracyimitswe ziracyaganje muri bo. Baracyari abagaragu ba Hutu power, aho abahezanguni biyumvamo ubuhutu, bumva ko ari bo batura mu Rwanda bonyine kandi bakaruturamo nta Mututsi ururimo.

Iyi ngengabitekerezo ya Jenoside n’amacakubiri ikomeje kuboneka muri bamwe mu Banyarwanda baba mu mahanga, harimo abakizererezwa n’ikinyoma cy’uko mu Rwanda nta mahoro ahari, ababaye mu muhanga ku bwo gushakira indamu n’indonke mu kwiyita impunzi za politike n’abakomeje kwihisha ubutabera kubera ko bavuye mu Rwanda baruhekuye.

Aha harimo kandi n’abakomoka ku bagize urahare muri Jenoside, bakoreshwa na bene wabo ndetse n’ababyeyi babo kugira ngo bakomeze bahakane, banapfobye Jenoside yakorewe Abatutsi mu 1994.

Abakoze Jenoside buzuye ikimwaro. Imigambi mibisha yabo yo gushyira mu bikorwa ingengabitekerezo ya “Hutu Power” yaratsinzwe kubera ko Inkotanyi zahagaritse Jenoside, maze zigarura u Rwanda interahamwe zari zimaze kugira itongo.

Interahamwe zatwaye Abanyarwanda mu nkambi zo muri Repubulika Iharanira Demokarasi ya Congo, zibafata bugwate, mu 1996, Ingabo z’u Rwanda zabohoje izo mpunzi maze zigarurwa mu Rwanda, zituzwa mu gihugu cyunga Abanyarwanda, cyifashishije Politike y’Ubumwe n’Ubwiyunge ya Leta y’Ubumwe bw’Abanyarwanda.

Guhera muri Nyakanga 1994, abagize uruhare muri Jenoside yakorewe Abatutsi mu 1994, bakurikiranywe n’amategeko y’u Rwanda n’amategeko mpuzamahanga, abatarafunzwe, bihishe mu mahanga, abandi baba mu mashyamba ya Congo, mu mitwe y’iterabwoba, bafite gahunda yo gukomeza umugambi mubisha wo kubuza amahoro u Rwanda.

Aba bose amajwi yabo bishe arabahamagara, bahungabanye intekerezo na roho, ntibariho, babayeho nabi. Mu miterere ya muntu, abananiwe ubunyangamugayo, bakunda ko basangira umubabaro n’ikimwaro n’abandi ndetse n’iyo babona utarafatanyije nabo mu bibi bakoze baba bumva waba umwe muri bo, bikarushaho kubanezeza cyane iyo nawe wakoze icyaha nk’icyabo.

Abahakana, bakanapfobye Jenoside ntibakwiye ijambo. Abakora Jenoside, bayikora, banateganya n’uko bazayipfobya, bakanayihakana, niyo mpamvu abategetsi bayishoyemo umubare munini w’abayikora ku buryo hari n’abibwiraga ko kubera ko ikozwe n’abantu benshi amategeko atabakurikirana.

Ubu amategeko arabakurikiranye aho bari hose. Hari abakiruka mu mashyamba, basaziyemo, hari abafunze basaziye muri Gereza, hari n’abari mu mahanga, basaziyeyo, ariko icyaha bakoze cyo ntigisaza, bashaje nabi kubera ko ibiganza byabo birimo amaraso.

Bari kure y’imiryango bakomokamo, ababyaye ntibashobora kurera abana babo, abatarashyingiwe ntibazamenya icyanga cy’ubukwe n’ubuzima, ntibabona icyerekezo cy’ubuzima. Iminsi yabo ihora yijimye kubera ubuhemu bumunga umutima wabo, kwicuza bitagira igaruriro, ipfunwe no kwiyanga, kwifuza urupfu ntibarubone. Imitima yabo yabaye akahebwe, ubuzima bwabo burangwa no gutekereza nabi bakarota nabi.

Abashakira ineza u Rwanda, ntibakwiye gutwaza aba barukarabankaba umutwaro w’icyaha bakoreye u Rwanda, ubwo bicaga inzirakarengane z’Abatutsi. Abakunzi b’u Rwanda ntibakwiye kuyobywa n’abayobye ngo na bo bayobe ahari urumuri, rwacanywe n’ubuyobozi bwiza bwunga. Ntibakwiye gutekereza nabi ngo barote nabi, mu gihe hari isoko iva ku buyobozi buzira amacakubiri n’ingengabitekerezo ya Jenoside, ntibakwiye kuba ba bangamwabo, Igihugu kigabura amahoro n’umutuzo gisendereye amahirwe.

Abato batari gito b’u Rwanda, ntibazahumwe n’igihu kibazitira kureba imbere, ngo basaye mu macakubiri n’ingengabitekerezo ya Jenoside. Nibiyambure abashaka kubagira abafatanyacyaha, babatoza guhakana no gupfobya Jenoside yakorewe Abatutsi mu 1994, ngo bazaryozwe ibingana n’ibyo abakoze jenoside, babazwa n’itegeko.

Ni bime amatwi, ababyeyi gito bababibamo ivangura iryari ryo ryose. Nibitandukanye n’abimitse inabi yo guhemukira u Rwanda. Ni biremere u Rwanda bazabamo, banezerewe, badashyamirana, basabana, bagabirana mu bufatanye. Niko kuba umuntu. Ineza niganze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .