00:00:00 IGIHE NETWORK KN KINYARWANDA EN ENGLISH FR FRANCAIS

Uruguay yatsindiye Ghana mu marira, Koreya y’Epfo ihangamura Portugal (Amafoto)

Yanditswe na Iradukunda Olivier
Kuya 2 Ukuboza 2022 saa 08:30
Yasuwe :

Imikino mu Itsinda rya munani mu y’Igikombe cy’Isi yarangiye Ghana yongeye gusuzugurika imbere ya Uruguay, Koreya y’Epfo itungura Portugal irayitsinda birangira zikomezanyije muri ⅛.

Umukino wa Ghana na Uruguay watangiye nyuma y’inkundura y’amagambo ashingiye ku mateka ibihugu byombi bifitanye kuko byahuriye mu Gikombe cy’Isi cya 2010 cyabereye muri Afurika y’Epfo mu 2010 warangiye, Abanyafurika basezerewe kuri penaliti.

Nyuma y’imyaka 12 Luis Suarez akuyemo igitego cya Ghana cyayibujije itike yo kujya muri ¼, ni we wari kapiteni muri uyu mukino watangiranye ishyaka ryo hejuru.

Ku munota wa karindwi, Suarez agikora ku mupira abafana biganjemo aba Ghana bari Al Janoub Stadium muri bahise bamukomera, mu majwi yo hejuru.

Mu minota 10 y’igice cya mbere nta kipe n’imwe yigeze ibona uburyo bwavamo igitego ariko Uruguay binyuze kuri Darwin Nunez yakinaga imipira miremire ishaka kwinjira mu izamu rya Ghana ariko ba myugariro bayo bayobowe na Mohammed Salisu bakamubera ibamba.

Ghana na yo yanyuzagamo igasatira izamu rya Uruguay binyuze ku bakinnyi bayo barimo Jordan Ayew ariko nta buryo bufatika yabonye.

Ku munota wa 16, nib wo Jordan Ayew yateye ishoti rikomeye, umupira ukurwamo na Sergio Rochet Alvarez ariko Mohammed Kudus ashatse kuwusonga mu izamu umunyezamu amukoraho hatangwa penaliti yatewe na André Ayew Dede, ishyikira mu biganza bye.

Amateka yisubiyemo kuko penaliti ya Ghana mu 2010, yatewe na Asamoah Gyan yayikubise umutambiko w’izamu, umupira ujya hanze.

Darwin Nunez wari mwiza muri uyu mukino yazamukanye umupira awuteye mu izamu, Mohammed Salisu arahagoboka. Iki gitutu cyakomeje gushyirwa kuri Ghana ndetse inacika intege.

Guhagarara nabi kwa ba myugariro ba Ghana bari beza mu minota ya mbere, byatumye Luis Suarez atanga undi mupira mu rubuga rw’amahina, Giorgian de Arrascaeta ashyiramo igitego cya mbere ku munota wa 26 w’umukino.

Ghana yavuye mu mukino byatumye nyuma y’iminota itanu gusa Suarez yongera gutanga undi mupira kuri Giorgian de Arrascaeta, na we awushyira mu izamu bitamugoye.

Uku ni nako igice cya mbere cy’umukino cyarangiye Ghana itarabasha kugaruka mu mukino ngo ishake uko yishyura ibitego yatsinzwe.

Mu ntangiriro z’igice cya kabiri yakoze impinduka, abavandimwe babiri Andre Ayew na Jordan Ayew, baha umwanya Osman Bukari na Kamaldeen Sulemana.

Izi mpinduka zongereye imbaraga Ghana ku buryo yatangiye isatira cyane ikaza no kubona amahirwe ku munota wa 48. Ubu buryo bwabonywe na Mohammed Kudus ariko umunyezamu Sergio Rochet amubuza gutsinda.

Abakinnyi bakinaga basigara inyuma muri Ghana begeye imbere harimo Alidu Seidu na Rahman Baba, bifashishwaga ahanini banyuza imipira mu mpande, bayisunikira Inaki Williams na Kamal-Deen.

Ku munota wa 56 Ghana yabonye uburyo bukomeye ariko Kamaldeen Sulemana ariko agiye gutera mu izamu agongana n’umunyezamu Sergio Rochet Alvarez.

Uku gusatira cyane kwa Ghana kwatumye abakinnyi ba Uruguay bashyuha mu mutwe, aho Luis Suarez yateranaga amagambo na Mohammed Salisu. Ibi byaje gutuma uyu Munya-Uruguay ahabwa ikarita y’umuhondo.

Mu mikino 16 Suarez amaze gukina yahawe amakarita abiri gusa. Ayo makarita yose yayaherewe ku mikino ya Ghana. Mu 2010 yahawe itukura, mu 2022 ahabwa iy’umuhondo.

Iyi karita yahawe yatumye umutoza wa Uruguay, Diego Alonso amusimbuza Edinson Cavani.

Cavani amaze kujya mu kibuga yatangiye gukoresha imipira miremire igana mu rubuga rw’amahina, ariko yabonye uburyo bumwe gusa Lawrence Ati-Zigi wa Ghana awukuramo nubwo wamugoye.

Ghana nubwo yashakaga kwishyura ariko yatakazaga imipira ya hato na hato by’umwihariko hagati mu kibuga cyane ko na Thomas Partey yasaga n’uwananiwe.

Amakipe yombi ageze mu minota ya nyuma, Uruguay yacitse intege imaze kumenya ko hakurya mu wundi mukino Koreya y’Epfo yamaze gutsinda Portugal ibitego 2-1.

Byasabaga ko Uruguay ishaka igitego cya gatatu kugira ngo yizere kuzamuka muri ⅛, ariko ntibyakunze no mu minota umunani yongewe ku mukino.

  Koreya y’Epfo yatunguye Isi

Koreya y’Epfo itarahabwaga amahirwe muri iri tsinda, yatsinze Portugal ibitego 2-1 mu mukino wa gatatu wahuje amakipe yombi.

Koreya y’Epfo yasabwaga gutsinda kugira ngo ikomeze mu cyiciro gikurikira ndetse yabigezeho.

Uyu mukino wafunguwe n’igitego cya Portugal cyagiyemo hakiri kare ku munota wa cyenda gitsinzwe na Ricardo Horta, ariko Koreya y’Epfo iza kucyishyura ku munota wa Kim Young-gwon ku munota wa 27.

Amakipe yombi yasatiranye cyane kugeza mu minota ya nyuma. Mu nyongera ku munota wayo wa mbere, Son Heung-min yahereje umupira Hwang Hee-chan ashyiramo igitego cya kabiri cyafunguriye igihugu cyabo inzira igana muri 1/8.

Koreya y’Epfo ni ubwa gatatu igeze mu mikino ya 1/8 nyuma yo kubigeraho mu 2002 na 2010.

Imikino yo mu itsinda H yarangiye Portugal ikomeje kuriyobora n’amanota atandatu, ikurikirwa na Koreya y’Epfo, inganya amanota ane na Uruguay [byatandukanyijwe n’ibitego byinjije] na Ghana yacyuye atatu.

Koreya y’Epfo yafatwaga nk’insina ngufi yakomeje muri 1/8


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .