00:00:00 IGIHE NETWORK KN KINYARWANDA EN ENGLISH FR FRANCAIS

Sénégal yakatishije itike ya ⅛ cy’Igikombe cy’Isi, Qatar itaha imbokoboko (Amafoto)

Yanditswe na Iradukunda Olivier
Kuya 29 Ugushyingo 2022 saa 08:42
Yasuwe :

Sénégal yatsinze Equateur ibitego 2-1, iba ikipe ya mbere yo ku Mugabane wa Afurika ikatishije itike yo gukomeza muri 1/8 cy’Igikombe cy’Isi mu gihe Qatar yo yatsinzwe n’u Buholandi ibitego 2-0, iba igihugu cya mbere cyacyakiriye gisezerewe nta nota kibonye.

Imikino ya nyuma mu matsinda yatangiye gukinwa kuri uyu wa Kabiri, tariki ya 29 Ugushyingo 2022.

Sénégal ihanzwe amaso nk’amakiriro ku Banyafurika yitwaye neza itsinda umukino wayihesheje amanota yo gukomeza muri 1/8, icyiciro iherukamo mu 2006.

Les Lions de la Teranga na Equateur zagiye mu kibuga zose zigifite amahirwe yo gukomeza mu kindi cyiciro bitewe n’uko byari bwitware kuri uyu mukino.

Sénégal yatangiye ikina umukino usa n’aho wubakiye mu kibuga hagati kuko ariho Umutoza Aliou Cissé yakinishije abakinnyi batanu, inyuma hari bane naho mu busatirizi yakoreshaga umwe.

Gustavo Julio Alfaro utoza Equateur yakinnye umukino wa ba myugariro bane, abakinnyi bo hagati batatu n’abasatira izamu batatu.

Mu mikinire y’aya makipe, Sénégal ni yo yisanze mu mukino mbere kuko yatangiye kugerageza uburyo imbere y’izamu hakiri kare. Ku munota wa gatanu gusa Idrissa Gueye yasigaranye n’umunyezamu ariko umupira awutera hanze.

Ubundi buryo yabubonye ku munota wa munani, Ismaila Sarr ahereza umupira Boulaye Dia wasigaranye n’umunyezamu Hernan Ismael wa Equateur ariko gushyira mu rucundura biramunanira.

Sénégal nk’ikipe yarifite abakinnyi benshi hagati, yarushije cyane Equateur yari itarinjira mu mukino ku buryo bugaragara, ndetse mu minota 15 ya mbere byashobokaga ko yayibonamo igitego.

Umukino wakomeje kuyoborwa na Sénégal izwi ariko igitego gikomeza kubura. Equateur muri iyi minota yakinaga yirwanaho kuko yifuzaga kunganya gusa kugira ngo ibone itike.

Sénégal yahinduye imikinire yongera imbaraga mu busatirizi, biha umwanya Ismaila Sarr na Iliman Ndiaye yo kugeza imipira myinshi mu rubuga rw’amahina.

Ubu buryo bwabyaye umusaruro kuko Ismaila Sarr yazamukanye umupira ageze mu rubuga rw’amahina, Piero Hincapié aramwitambika umusifuzi Clément Turpin atanga penaliti.

Uyu rutahizamu wo muri Sénégal yahise ayitera neza, yinjiza igitego cya mbere cyashyize igihugu cye imbere ku munota wa 44 w’umukino.

Nyuma y’iki gitego hongeweho iminota itandatu, ariko Equateur ntiyabasha kwishyura, amakipe ajya kuruhuka ari 1-0.

Equateur yatangiye igice cya kabiri yasezerewe mu irushanwa yakoze impinduka ishaka kugaruka mu mukino, ikura mu kibuga Carlos Gruezo na Alan Franco ishyiramo José Cifuentes na Jeremy Sarmiento ngo bajye kuziba icyuho mu kibuga hagati.

Ibi byahise biha umwanya Gonzalo Plata wo kwigira imbere aho ajya gufasha Michael Estrada wisangaga wenyine muri ba myugariro ba Sénégal bayobowe na kapiteni wabo Kalidou Koulibaly na Abdou Diallo.

Sénégal yasubiye inyuma ikina yugarira, inashakisha imipira miremire igana imbere, kuko no mu gihagararo abakinnyi bayo basumbaga aba Equateur.

Iminota 15 ya mbere y’igice cya kabiri yakinwe Equateur yakambitse mu kibuga cya Sénégal, byasabaga umutoza Aliou Cissé kugabanya umuvuduko wayo.

Iyi kipe yari yakomanze imbere y’izamu rya Sénégal, ku munota wa 67 yatsinze igitego ibifashijwemo na Moisés Caicedo, ku mupira yashyize ku mutwe uvuye kuri koruneri yatewe na Felix Torres.

Sénégal yahise ikanguka bwangu ndetse Kapiteni wayo Kalidou Koulibaly ayitsindira igitego cya kabiri ku munota wa 70, ari na cyo cyabaye itandukaniro kuri uyu mukino wagejeje iki gihugu cya Afurika mu mikino ya 1/8.

Les Lions de la Teranga yasoje ku mwanya wa kabiri mu Itsinda A aho ifite amanota atandatu, inyuma y’u Buholandi bufite arindwi. Iyi kipe izahura n’iya mbere mu Itsinda B ririmo u Bwongereza, Wales, Amerika na Iran.

U Buholandi bwasoje imikino yo mu matsinda bwisasira Qatar, bwinjijemo ibitego 2-0 bya Cody Gakpo ku munota wa 26 na Frenkie De Jong ku wa 49.

Qatar yabaye igihugu cya mbere mu mateka cyakiriye Igikombe cy’Isi kigasezererwa nta mukino n’umwe gitsinze [cyatsinzwe imikino yose cyakinnye] cyangwa kinganye mu nshuro 22 kimaze gukinwa.

Abakinnyi 11 Sénégal yabanje mu kibuga
Abakinnyi 11 Equateur yabanje mu kibuga
Ismaila Sarr ni we wafunguye amazamu kuri penaliti yinjije neza
Ismaila Sarr yishimira igitego yatsinze
Kapiteni wa Sénégal, Kalidou Koulibaly, yishimira igitego cya kabiri cyabonetse ku munota wa 70
Ismaila Sarr yagoye ikipe ya Equateur
Kapiteni wa Sénégal, Kalidou Koulibaly, yari afite akanyamuneza nyuma yo guhesha igihugu cye intsinzi
Umutoza Aliou Cissé akomeje kwandika amateka mu gihugu cye cya Sénégal
Kalidou Koulibaly w'imyaka 31 yatsinze igitego cyiza mu mukino wahuje igihugu cye na Equateur
Abakinnyi ba Sénégal bahaye icyubahiro Papa Bouba Diop witabye Imana ku wa 29 Ugushyingo 2020
Enner Valencia, Kapiteni wa Equateur agerageza gutera ishoti riremereye
Abafana ba Equateur ari bafite akanyamuneza umukino ugitangira
Abafana ba Sénégal bari bafite akanyamuneza
Papa Bouba Diop yibutswe muri ubu buryo mbere y'uko umukino wa Sénégal na Equateur utangira
Iyo bafana baba bivuye inyuma
Papa Bouba Diop wambaraga nimero 19 yahawe icyubahiro ku mukino igihugu cye cyaboneyeho itike yo gukina 1/8 cy'Igikombe cy'Isi
Sénégal yakatishije itike ya ⅛ cy’Igikombe cy’Isi, icyiciro yaherukagamo mu 2006 ubwo cyaberaga mu Budage
Kalidou Koulibaly na bagenzi be bishimira igitego cyatumye intsinzi iboneka
Byari ibyishimo by'ikirenga ku bakinnyi ba Sénégal

Qatar yatsindiwe imbere y’abafana ku mukino wa gatatu

Ikipe ya Qatar yasezerewe nta nota na rimwe ibonye
Abakinnyi 11 babanje mu kibuga ku ruhande rw'u Buholandi
Cody Gakpo yishimira igitego yatsinze ku mukino wa Qatar
U Buholandi bwatsinze Qatar ibitego 2-0 mu mukino wa gatatu mu itsinda
Abafana b'u Buholandi bari bafite akanyamuneza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .