00:00:00 IGIHE NETWORK KN KINYARWANDA EN ENGLISH FR FRANCAIS

#Qatar2022: U Bwongereza bwatangaje abakinnyi 26 buzajyana mu Gikombe cy’Isi

Yanditswe na Iradukunda Olivier
Kuya 11 Ugushyingo 2022 saa 07:33
Yasuwe :

Umutoza w’Ikipe y’Igihugu y’u Bwongereza, Gareth Southgate yahamagaye abakinnyi 26 azifashisha mu mikino y’Igikombe cy’Isi cya 2022, barimo 25 bose bakina muri Shampiyona y’u Bwongereza ’Premier League’.

Urutonde rw’abakinnyi b’u Bwongereza ruriho Jude Bellingham ukinira Borussia Dortmund nk’umukinnyi umwe wenyine gusa udakina mu Bwongereza abandi bose bakina imbere mu gihugu.

Umubare munini w’abakinnyi benshi Southgate yitwaje ni abakina bugarira, aho yahamagaye abakinnyi icyenda bose, abasatira yahamagaye umunani.

Uru rutonde rugitangazwa benshi batunguwe no kurubonaho Jadon Sancho, rutahizamu wa Manchester United, Tammy Araham ukinira ikipe ya AS Roma yo mu Butaliyani.

Abantu benshi bakurikiranira hafi ikipe y’u Bwongereza bari bategereje kumva ko myugariro Harry Maguire azahamagarwa, ariko yaje ku rutonde ndetse Southgate avuga ko atari kumusiga bitewe nuko amenyereye amarushanwa.

Ati “Iyo duhamagara ntabwo tugendera ku buryo abakinnyi bari kwitwara muri icyo gihe, ahubwo hari n’ibindi byinshi kandi by’ingirakamaro birimo kureba uburyo umukinnyi abana n’abandi ndetse n’uburambe mu marushanwa akomeye, ibyo rero Maguire arabifite.”

Iki gihugu kiri mu itsinda rya kabiri hamwe na Leta Zunze Ubumwe za Amerika, Iran na Wales. Umukino wacyo wa mbere kizawukina na Iran, tariki 21 Ugushyingo 2022.

U Bwongereza bumaze kwegukana Igikombe cy’Isi inshuro imwe mu 1966, buri mu bihugu bihabwa amahirwe yo kwitwara neza mu kizabera muri Qatar mu mpera z’uyu mwaka.

Igikombe cy’Isi kigiye gukinwa ku nshuro ya 22, giteganyijwe kuba kuva ku wa 20 Ugushyingo kugeza ku wa 18 Ukuboza 2022. Amakipe y’ibihugu 32 ni yo azitabira iki gikombe kizakinwamo imikino 64, mu gihe cy’ukwezi.

Urutonde rw’abakinnyi 26 u Bwongereza bwahamagaye

Abanyezamu: Jordan Pickford (Everton), Nick Pope (Newcastle), Aaron Ramsdale (Arsenal)

Ba myugariro: Harry Maguire (Man Utd), John Stones (Man City), Kyle Walker (Man City), Luke Shaw (Man Utd), Kieran Trippier (Newcastle), Trent Alexander-Arnold (Liverpool), Eric Dier (Tottenham), Conor Coady (Everton), Ben White (Arsenal)

Abakina hagati:Declan Rice (West Ham), Jude Bellingham (Borussia Dortmund), Jordan Henderson (Liverpool), Mason Mount (Chelsea), Kalvin Phillips (Man City), James Maddison (Leicester), Conor Gallagher (Chelsea)

Ba rutahizamu: Harry Kane (Tottenham) ari nawe kapiteni, Phil Foden (Man City), Raheem Sterling (Chelsea), Marcus Rashford (Man Utd), Bukayo Saka (Arsenal), Jack Grealish (Man City), Callum Wilson (Newcastle).

Ikipe y'igihugu y'u Bwongereza yahamagaye intwaro zayo izajyana mu gikombe cy'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .