Iyi mikino ya nyuma yo mu Itsinda D yabaye kuri uyu wa Gatatu, tariki ya 30 Ugushyingo 2022.

Tunisia yinjiye muri uyu mukino isabwa kuwutsinda ariko igategereza ibiva mu wundi hagati ya Denmark na Australia kugira ngo imenye ko ibona itike yo gukomeza mu mikino ya 1/8.

Yaje kubigeraho ariko ku rundi ruhande Australia na yo yitwara neza bituma izamukana n’u Bufaransa muri iri tsinda.

Tunisia ibifashijwemo na Wahbi Khazri yatsinze u Bufaransa ku gitego cyabonetse ku munota wa 58.

Umutoza wa "Les Bleus", Didier Deschamps, yinjiye mu mukino yabanje hanze abakinnyi be bakomeye barimo Kylian Mbappé na Antoine Griezmann.

Nyuma yo gutsindwa igitego, yabinjije mu kibuga ashaka kwishyura ariko ntiyahiriwe no kubigeraho kuko n’igitego cyinjijwe na Antoine Griezmann ku munota wa 98 [ku wa munani w’inyongera], umusifuzi yifashishije ikoranabuhanga ry’amashusho rizwi nka VAR akerekana ko habayeho kurarira.

Amanota atatu Tunisia yabonye ntacyo yayifashije ariko yatahanye ikuzo ryo gutsinda ikipe ifite Igikombe cy’Isi cya 2018 cyabereye mu Burusiya.

Tunisia yatsinze imikino ibiri muri ine iheruka gukina mu Gikombe cy’Isi, yatsinzwe umwe, inganya undi. Mu yo yatahanyemo amanota atatu harimo uwa Panama mu 2018 n’uw’u Bufaransa muri uyu mwaka.

U Bufaransa bwatsinzwe mu Gikombe cy’Isi bwa mbere kuva mu 2014 ubwo bwakurwagamo n’u Budage bubutsinze igitego 1-0 muri ¼, bishyira iherezo ku mikino icyenda bwari bumaze budatsindwa.

U Bufaransa bwakinaga mu gihe Australia na yo yisobanuraga na Denmark mu wundi mukino.

Australia ibifashijwemo na Mathew Leckie ku munota wa 60, yatsinze igitego cyayihesheje intsinzi y’ingenzi kuko cyatumye ikatisha itike yo gukomeza.

Australia yasoje ku mwanya wa kabiri ifite amanota atandatu, inganya n’u Bufaransa byatandukanyijwe n’ibitego.

U Bufaransa buzakina na Pologne mu gihe Australia izacakirana na Argentine mu mikino ya 1/8 cy’irangiza iteganyijwe mu mpera z’icyumweru.

Tunisia yatsinze u Bufaransa mu mukino utagize icyo uyifasha

Eduardo Camavinga agerageza kwambura umupira Wajdi Kechrida wa Tunisia

Umutoza Didier Deschamps yatsinzwe umukino wa mbere mu Gikombe cy'Isi cya 2022

Rutahizamu w'u Bufaransa Kylian Mbappé usanzwe ukinira Paris St Germain yabanje ku ntebe y'abasimbura

Wahbi Khazri w'imyaka 31 yagoye ab'inyuma b'u Bufaransa

Anis Slimane wa Tunisia acenga myugariro w'u Bufaransa, Axel Disasi

Kylian Mbappé agerageza gucenga myugariro wa Tunisia, Nader Ghandri

Kylian Mbappé yinjiye mu kibuga asimbuye Kingsley Coman

Wahbi Khazri yagize ikibazo cy'imvune yatumye ava mu kibuga

Aissa Laidouni wa Tunisia ahanganiye umupira na Youssouf Fofana w'u Bufaransa

Myugariro w'u Bufaransa, Raphaël Varane ahanganiye umupira na Nader Ghandri wa Tunisia

Abakinnyi ba Tunisia bishimira igitego cyabahesheje intsinzi

Kylian Mbappé w'imyaka 23 yagerageje gushaka igitego cyo kwishyura ariko ab'inyuma ba Tunisia bamubera ibamba

Umukino w'u Bufaransa na Tunisia wari uw'ishiraniro

Antoine Griezmann akimara kwinjira mu kibuga yatsinze igitego ariko umusifuzi avuga ko yari yaraririye

Australia yitwaye neza imbere ya Denmark

Andreas Olsen agerageza kwihutana umupira awukuye mu bakinnyi ba Australia

Christian Eriksen ntiyafashije ikipe ye kwitwara neza mu mukino yatsinzwemo igitego 1-0

Wari umukino w'ishiraniro hagati y'impande zombi