Ibi byabaye ku mukino ufungura iri rushanwa, aho kuri buri ntebe z’abitabiriye hariho agakapu gato karimo utuntu dutandukanye twagenewe abafana nk’impano zo kuba baritabiriye iki gikombe.

Bimwe mu byari birimo harimo umwambaro w’Ikipe y’Igihugu ya Qatar, umwitero cyane wo kwifubika mu gihe cy’imbeho n’ibindi. Ni ibintu byashimishije abitabiriye uyu mukino.

Nubwo Qatar yakiriye Igikombe cy’Isi cya 2022 yatsinzwe na Equateur ibitego 2-0, iba igihugu cya mbere gitsindiwe mu rugo ku mukino ufungura iri rushanwa, ntibyabujije ko abafana bahabwa izo mpano.

Qatar iri mu Itsinda A hamwe n’u Buholandi, Sénégal na Equateur.

Imikino y’Igikombe cy’Isi cy’umupira w’amaguru uyu mwaka iri kubera muri Qatar kuva tariki 20 Ugushyingo kugeza ku wa 18 Ukuboza 2022.

Iyi mikino y’igikombe cy’Isi yitezweho kuzamura ibikorwa bitandukanye nk’ubukerarugendo byo muri iki gihugu cyakiriye binyuze mu kwakira abantu batandukanye bacyitabiriye.

Ku munsi wa mbere gusa ku Kibuga Mpuzamahanga cy’Indege cya Hamad haguye indege 400 zitwaye abanyacyubahiro n’abagenzi baturutse mu bice bitandukanye utibagiwe n’ibihumbi by’abafana, abakinnyi n’abandi bayobozi bitabiriye iyi mikino.

Impano zari zashyizwe kuri buri ntebe

Iyi ni imwe mu mpano zahawe abafana bari bitabiriye umukino ufungura iri rushanwa

Ibi ni bimwe mu byari mu mpano abafana bahawe

Mascot iranga Igikombe cy'Isi cy'uyu mwaka yahawe buri mufana nk'impano