00:00:00 IGIHE NETWORK KN KINYARWANDA EN ENGLISH FR FRANCAIS

#Qatar 2022: Injira mu Itsinda F ririmo igihugu giheruka ku mukino wa nyuma w’Igikombe cy’Isi

Yanditswe na Iradukunda Olivier
Kuya 19 Ugushyingo 2022 saa 07:54
Yasuwe :

Hasigaye umunsi umwe ngo amakipe y’ibihugu 32 atangire urugendo rwo guhatanira Igikombe cy’Isi kigiye gukinwa ku nshuro ya 22.

Igikombe cy’Isi kizabera muri Qatar, kuva ku wa 20 Ugushyingo kugera ku wa 18 Ukuboza 2022.

Muri iyi nkuru, tugiye kugaruka ku byo wamenya ku makipe ari mu Itsinda rya Gatandatu ririmo u Bubiligi, Canada, Croatia na Maroc.

Ikipe y’Igihugu ya Croatia ni yo iheruka ku mukino wa nyuma mu mwaka wa 2018, nubwo itigeze ibona amahirwe yo kwegukana Igikombe cy’Isi cyabereye mu Burusiya icyo gihe.

Croatia yasoje ifite abakunzi benshi, binahesha Kapiteni wayo Luka Modrić igihembo cy’umukinnyi mwiza w’umwaka, Ballon d’Or.

Abakurikiranira hafi iby’umupira w’amaguru bahamya ko iyi kipe igikomeye kandi yakongera igahagama amakipe bahanganye nubwo buri kipe yiteguye kandi ishaka kugera kure hashoboka.

  Canada

Ikipe y’Igihugu ya Canada yitwa “Les Rouges”, yakinnye umukino wayo wa mbere mu 1924 itsindwa na Australia ibitego 3-2. Mu kwiyubaka kwayo, Canada yegukanye Igikombe gihuza amakipe yo muri Amerika yo Hagati n’iya Ruguru mu 1985 no mu 2000.

Intsinzi ikomeye yabonye mu mateka yayo ni iyo mu 2021, itsinda Cayman Islands ibitego 11-0, mu gihe gutsindwa gukomeye ari uko yanyagiwe ibitego 8-0 na Mexique mu 1993.

Iki gihugu kiri ku mwanya wa 44 ku rutonde ngarukakwezi rw’Ishyirahamwe ry’Umupira w’Amaguru ku Isi, FIFA, nyamara mu 1997 cyari ku wa 33, ari wo mwanya mwiza cyagize naho umwanya mubi cyagize, ni uwa 122 mu 2017.

Iki gihugu gitozwa n’Umwongereza John Herdman watoje amakipe y’abagore gusa mbere yo kwerekeza muri iyi kipe mu 2018. Kapiteni wayo ni Atiba Hutchinson w’imyaka 39, ari na we mukinnyi mukuru muri iri tsinda.

Canada ni ubwa Kabiri igiye gukina Igikombe cy’Isi, bwa mbere yakigaragayemo mu 1986. Icyo gihe yaviriyemo mu matsinda kuko nta burambe yari ifite muri iri rushanwa. Iki gihugu kizaba kigendera ku bakinnyi nka Atiba Hutchinson wa Beşiktaş, Stephen Eustáquio wa Porto, Alphonso Davies wa Bayern Munich n’abandi.

Canada izakina umukino wayo wa mbere w’Igikombe cy’Isi ku wa 23 Ugushyingo icakirana n’u Bubiligi, izakurikizaho Croatia ku wa 27 Ugushyingo mbere yo gusoreza kuri Maroc ku wa 1 Ukuboza 2022.

  Maroc

Ikipe y’Igihugu ya Maroc yitirirwa ‘The Atlas Lions’, ifitwe n’umwenegihugu Walid Regragui wahawe kuyitoza uyu mwaka, gusa yayibayemo umutoza wungirije mu 2012. Uyu mutoza kandi yakiniye iyi kipe mu 2001-2009.

Maroc mu mateka yayo yakinnye umukino wa mbere mu 1957 inganya na Iraq ibitego 3-3, maze mu 1961 ibona intsinzi ikomeye ubwo yanyagiraga Arabie Saoudite ibitego 13-1. Iki gihugu na cyo cyatsinzwe ibitego byinshi mu mateka yacyo kuko Hongrie yayitsinze 6-0 mu 1964.

Iyi kipe ntiratwara Igikombe cy’Isi mu nshuro eshanu imaze kucyitabira, imwe gusa ni yo yatsindiwe mu ⅛ mu 1986, izindi nshuro zose iviramo mu matsinda.

Maroc iri ku mwanya wa 22 ku Isi ku rutonde ngarukakwezi rwa FIFA, umwanya mwiza yagize hari mu 1998 aho yari iya 10, ariko mu 2010 yabaye iya 95 ari wo mubi yagize mu mateka yayo.

Iki gihugu kandi kimaze inshuro ebyiri zikurikiranya kitabura itike y’Igikombe cy’Isi. Kuri ubu cyitabiriye kimaze gutsinda imikino irindwi, kinganya umwe, mu mikino umunani cyakinnye.

Abakinnyi nka Yassine Bounou wa Sevilla, Noussair Mazraoui wa Bayern Munich, Hakim Ziyech wa Chelsea, Badr Benoun wa Qatar SC umenyereye ikirere bazakiniraho ni bamwe mu bakinnyi, Maroc izagenderaho.

Maroc izatangira icakirana na Croatia ku wa 23 Ugushyingo, ikurikizeho u Bubiligi ku wa 27 Ugushyingo mbere yo guhura na Canada ku wa 1 Ukuboza 2022.

 U Bubiligi

Ikipe y’Igihugu y’u Bubiligi yitwa ‘The Red Devils’ ihanzwe amaso cyane kubera abakinnyi ifite.

Mu nshuro 21 iki gikombe kimaze gukinwa, inshuro 14 zose u Bubiligi bwabonye itike yo kucyerekezamo. U Bubiligi ntiburabasha kubona umwanya wa mbere muri iki gikombe, umwanya wa hafi bwabonye ni uwa gatatu, hari mu 2018.

Umukino wa mbere ‘The Red Devils’ yakinnye nk’Ikipe y’Igihugu yahuye n’u Bufaransa mu 1904, binganya 3-3. Mu 1909 yatsinzwe n’u Bwongereza ibitego 11-2. Intsinzi ikomeye yagize ni ubwo yatsindaga San Marino ibitego 10-1 mu 2001.

Kugeza ubu u Bubiligi buri ku mwanya wa kabiri ku Isi. Muri uyu mwaka bwabonye itike bukinnye imikino umunani, butsinda itandatu, bunganya ibiri.

Iyi kipe itozwa na Roberto Martínez kuva mu 2016, izagendera ku bakinnyi nka Thibaut Courtois na Eden Hazard wa Real Madrid, Kevin De Bruyne wa Manchester City n’abandi.

Umukino ubanza u Bubiligi buzawukina na Canada ku wa 23 Ugushyingo, ikurikizeho Maroc ku wa 27 Ugushyingo, isoreze kuri Croatia ku wa 1 Ukuboza 2022.

  Croatia

Croatia yakinnye umukino wa mbere mu 1941 n’u Busuwisi buwutsinda ibitego 4-0, maze mu 2016 bwabonye intsinzi ikomeye mu mateka bunyagiye San Marino ibitego 10-0 ariko mu 2018 Espagne yabunyagiye ibitego 6-0.

Kugeza ubu Croatia iri ku mwanya wa 12 ku Isi, umwiza yagize hari mu 1999 ubwo yabaga iya kabiri mu gihe umubi yawugize mu 1994 ubwo yabaga iya 125.

Ni inshuro ya gatanu, Croatia igiye kwitabira Igikombe cy’Isi mu mateka yayo, nyuma yo kwemererwa kuba umunyamuryango wa FIFA mu 1998. Kure yageze ni ku mwanya wa kabiri ubwo yatsindirwaga ku mukino wa nyuma n’u Bufaransa ibitego 4-2 mu Gikombe cy’Isi cyabereye mu Burusiya mu 2018.

Croatia yabonye itike yo kujya mu Gikombe cy’Isi cyo muri Qatar imaze gukina imikino 10, itsindamo irindwi, inganya ibiri, itsindwa umwe gusa.

Zlatko Dalić utoza Croatia yageze muri iyi kipe nk’umutoza mu 2017, amaranye igihe kinini n’abakinnyi be bimuha amahirwe yo kuba yazamuka mu itsinda arimo.

Iki gihugu kigiye kwitabira iyi mikino iri kumwe na Luka Modrić ukinira Real Madrid, Mateo Kovačić wa Chelsea n’abandi.

Croatia izakina umukino wa mbere na Maroc tariki ya 23 Ugushyingo, ikurikizeho Canada ku wa 27 Ugushyingo mu gihe uwa nyuma izacakirana n’u Bubiligi ku wa 1 Ukuboza 2022.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .