00:00:00 IGIHE NETWORK KN KINYARWANDA EN ENGLISH FR FRANCAIS

#Qatar 2022: Ibyihariye ku itsinda ririmo ikipe ihabwa amahirwe yo gutwara igikombe cy’Isi

Yanditswe na Iradukunda Olivier
Kuya 15 Ugushyingo 2022 saa 08:42
Yasuwe :

Mu gihe habura iminsi mike ngo irushanwa ritangire, ibihugu byamaze guhamagara abakinnyi bizaserukana, byizeye ko bashobora kubifasha kugera ku ntsinzi mu gikombe cy’Isi kigiye gukinwa mu bihe bidasanzwe.

Muri iyi nkuru tugiye kugaruka ku byo wamenya ku makipe ari mu itsinda rya Gatatu arimo Argentina, Saudi Arabia, Mexique na Pologne.

Ikipe y’Igihugu ya Argentina ni yo ihabwa amahirwe, abakunzi ba Messi benshi bahanze amaso ko ashobora guhesha ikuzo igihugu cye n’umugabane akomokaho uheruka igikombe cy’Isi mu 2002.

Abasesenguzi ariko ntibarenza ingohe ibindi bihugu biri mu yandi matsinda nabyo byiteguye neza kandi byakora ikinyuranyo muri iki gikombe.

Arabie Saoudite

Ikipe ya Arabie Saoudite yitwa “Green Falcons”, yakinnye umukino wayo wa mbere mu 1957 inganya na Lebanon igitego 1-1.

Intsinzi ikomeye yabonye mu mateka yayo ni iyo mu 2015 ubwo yatsindaga Timor-Leste ibitego 10-0 mu gihe gutsindwa gukomeye ari uko yanyagiwe ibitego 13-0 na United Arab Republic mu 1961.

Iki gihugu kiri ku mwanya wa 51 ku rutonde ngarukakwezi rw’Ishyirahamwe ry’Umupira w’Amaguru ku Isi, FIFA nyamara mu 2004 cyari ku wa 21, ariwo mwanya mwiza cyagize naho umwanya mubi cyagize, ni uwa 126 mu 2012.

Mu kwiyubaka kwayo, Arabie Saoudite yegukanye Igikombe cyo ku Mugabane wa Aziya mu 1984, 1988 no 1996. Iyi kipe kandi yatwaye igikombe cy’Abarabu mu 1998 no mu 2002.

Iki gihugu gitozwa n’uwahoze atoza amakipe menshi muri Afurika, Hervé Renard kuva mu 2019 mu gihe Kapiteni wayo ari Salman Al-Faraj w’imyaka 33, umaze guhamagarwa inshuro 69 mu Ikipe y’Igihugu.

Arabie Saoudite ni ubwa gatandatu igiye gukina Igikombe cy’Isi ariko kure yageze muri iri rushanwa ni muri ⅛ mu 1994. Ahandi hose iyi kipe iviramo mu matsinda. Iki gihugu kizaba kigendera ku bakinnyi nka Mohammed Al-Owais, Salman Mohammed Al-Faraj ba Al-Hilal na Haitham Asiri wa Al-Ahli.

Arabie Saoudite izakina umukino wayo wa mbere w’Igikombe cy’Isi ku wa 22 Ugushyingo icakirana na Argentina, izakurikizaho Pologne ku wa 26 Ugushyingo mbere yo gusoreza ku Mexique ku wa 30 Ugushyingo 2022.

Argentine

Ikipe y’Igihugu ya Argentine yitirirwa ‘The White and Sky Blue’ kubera ko imyambaro yayo isa n’iryo bara. Iyi kipe ya Lionel Scaloni uri kuyitoza kuva mu 2017, iri mu ahabwa amahirwe yo kuyobora itsinda.

Argentine mu mateka yayo yakinnye umukino wa mbere mu 1902 itsinda Uruguay ibitego 6-0, maze mu 1942 ibona intsinzi ikomeye ubwo yanyagiraga Ecuador ibitego 12-0. Iki gihugu na cyo cyatsinzwe ibitego byinshi mu mateka yacyo kuko Czechoslovakia mu 1958, Bolivia mu 2009 na Spain mu 2018 byose byayitsinze 6-1.

Iyi kipe yatwaye Igikombe cy’Isi inshuro ebyiri mu 1978 no 1986, imaze gutsindirwa no ku mukino wa nyuma inshuro eshatu, iheruka ni mu 2014 ubwo yatsindwaga n’u Budage mu gikombe cy’Isi cyabereye muri Brazil.

Argentine iri ku mwanya wa Gatatu ku Isi ku rutonde ngarukakwezi rwa FIFA, umwanya mwiza yagize hari mu 2007 muri 2008 no mu 2017 aho yari iya mbere, ariko mu 1996 yabaye iya 20 ariwo mwanya mubi yagize.

Ni Igikombe cy’Isi cya 17 igiye gukina mu mateka yayo. Iki gihugu kandi kimaze inshuro 15 kitabura itike y’iki gikombe. Kuri ubu cyitabiriye kimaze gutsinda imikino 11, kinganya itandatu mu mikino 17.

Abakinnyi nka Lionel Messi usanzwe ari mu bakinnyi bakomeye muri PSG, Angel Di Maria wa Juventus, Lautaro Martinez wa Inter Milan, Lisandro Martinez wa Manchester United ni bamwe mu bakinnyi, Ikipe y’Igihugu ya Argentina izagenderaho.

Argentina izatangira icakirana na Saudi Arabia ku wa 22 Ugushyingo, ikurikizeho Mexique ku wa 26 Ugushyingo mbere yo guhura na Pologne ku wa 30 Ugushyingo 2022.

Pologne

Ikipe y’Igihugu ya Pologne yitwa ‘The Eagles’ ni imwe mu makipe ahanzwe amaso cyane kubera rutahizamu wayo Robert Lewandowski, kubera ko ariho uyu mugabo agomba kugaragariza ko akeneye gutwara Ballon d’Or yashatse kuva cyera.

Ibi ariko binashimangirwa n’amateka iki gihugu cyakoze mu Gikombe cy’isi kuko cyakora itandukaniro nkuko cyahatanye mu 1974 no 1982, ubwo cyabonaga umwanya wa Gatatu. Ni igihugu nacyo gihabwa amahirwe yo kuba cyarenga amatsinda kuri iyi nshuro.

Umukino wa mbere The Eagles yakinnye nk’Ikipe y’Igihugu yawukinnye yawukinnye mu 1921 iwukina na Hungary. Mu 1948 yatsinzwe na Denmark ibitego 8-0. Intsinzi ikomeye yagize ni ubwo yatsindaga San Marino ibitego 10-0 mu 2009.

Kugeza ubu Pologne iri ku mwanya wa 26 ku Isi. Ni inshuro munani igiye kwitabira Igikombe cy’Isi, igiheruka ni mu 2018 cyabereye mu Burusiya aho yasezerewe mu matsinda. Muri uyu mwaka yabonye itike ikinnye imikino 11, itsinda irindwi, inganya ibiri ndetse itsindwa indi ibiri.

Iyi kipe itozwa na Czesław Michniewicz wafashe iyi kipe muri uyu mwaka wa 2022, izagendera ku bakinnyi nka Robert Lewandowski wa FC Barcelona, Nicola Zalewski wa Roma, Arkadiusz Milik wa Juventus n’abandi aherutse guhamagara bari ku rutonde rwa 26.

Umukino ubanza,Pologne izawukina na Mexique ku wa 22 Ugushyingo, ikurikizeho Saudi Arabia ku wa 26 Ugushyingo, isoreze kuri Argentina ku wa 30 Ugushyingo 2022.

Mexique

Mexique yakinnye umukino wa mbere mu 1923 na Guatemala itsinda ibitego 3-2, maze mu 1987 ibona intsinzi ikomeye mu mateka yayo ubwo yanyagiraga Bahamas ibitego 13-0 ariko na yo mu 1961 u Bwongereza bwayinyagiye ibitego 8-0.

Kugeza ubu Mexique iri ku mwanya wa 13 ku Isi, umwiza yagize hari mu 2004 no mu 2006 ubwo yabaga iya kane, mu gihe umubi ari mu yawugize mu 2015 ubwo yabaga iya 40.

Ni inshuro ya 17 igiye kwitabira Igikombe cy’Isi mu mateka yayo, nyuma yo kucyitabira bwa mbere mu 1930 kigitangira gukinwa. Aho yageze kure muri iri rushanwa ni muri 1/4 mu 1986. Inshuro yakurikiyeho yarahanwe, ariko inshuro zose yagarutse yageze muri ⅛.

Mexique yabonye itike nyuma yo kujya mu gikombe cy’Isi cyo muri Qatar imaze gukina imikino 14, itsindamo imikino umunani, inganyamo imikino ine, ndetse inatsindwa imikino ibiri gusa.

Umunya-Argentine Gerardo Daniel Martino utoza Mexique yanyuze kuva mu 2019, yanyuze muri Argentina muri 2014-2014, azaba yitwaje intwaro zo guhangana n’ikipe yahozemo zirimo; Gerardo Arteaga wa Genk, Jorge Sánchez wa Ajax, Jesús Manuel Corona wa Sevilla, Hirving Lozano wa Napoli n’abandi.

Mexique izakina umukino wa mbere ihura na Pologne tariki ya 22 Ugushyingo, ikurikizeho Argentina ku wa 26 Ugushyingo mu gihe umukino wa nyuma izawukina na Saudi Arabia ku wa 30 Ugushyingo 2022.

Argentine irahabwa amahirwe yo kuyobora itsinda iherereyemo
Arabie Saoudite izakinisha abakinnyi benshi bakina imbere mu gihugu
Pologne iri mu itsinda rya Gatatu izahanganamo na Argentine
Mexique yiteguye kujya mu gikombe cy'Isi cya 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .