Muri iki gihe, Isi yose ihanze amaso Qatar ahari kubera Igikombe cy’Isi kiri gukinwa ku nshuro ya 22.

Muri iyi mikino usangamo abakinnyi n’abatoza bagenda baca uduhigo bitewe n’iyo bakora.

Muri iyi nkuru tugiye kugaruka ku bakinnyi batatu bakuze kurusha abandi bari gukina Igikombe cy’Isi 2022.

Nubwo aba bakinnyi bafatwa nk’abakuze kurusha abandi ariko si bo bafite agahigo ko kwitabira imikino y’Igikombe cy’Isi ari bakuru kurusha abandi.

–  Alfredo Talavera Díaz: Uyu munyezamu wa Mexique ni we mukinnyi ukuze kurusha abandi mu Gikombe cy’Isi.

Uyu mugabo w’imyaka 40 asanzwe akinira Fútbol Club Juárez y’iwabo muri Mexique. Ari gukina Igikombe cy’Isi cya gatatu nyuma ya 2014 na 2018.

Kuva atangiye guhamagarwa mu Ikipe y’Igihugu ya Mexique, amaze kuyikinira imikino 40.

Alfredo Talavera Díaz wa Mexique ni we mukinnyi ukuze kurusha abandi mu Gikombe cy'Isi

–  Atiba Hutchinson: Kapiteni w’Ikipe y’Igihugu ya Canada na Besiktas yo muri Turikiya, ni we mukinnyi wa kabiri ukuze kurusha abandi mu Gikombe cy’Isi kiri kubera muri Qatar.

Uyu mugabo w’imyaka 39 ni Igikombe cy’Isi cya mbere ari gukina ahanini bijyanye n’uko igihugu cye kidakunze kwitabira iyi mikino.

Mu mukino wa kabiri Canada yatsinzwe na Croatie ibitego 4-1, uyu mugabo yabaye umukinnyi wa mbere umaze gukinira igihugu cye imikino 100, aho yatsinze ibitego icyenda.

Atiba Hutchinson w'imyaka 39 ni Kapiteni w’Ikipe y’Igihugu ya Canada

–  Pepe: Kepler Laveran de Lima Ferreira wamenyekanye nka Pepe w’imyaka 39 ni myugariro w’Ikipe y’Igihugu ya Portugal na Porto y’iwabo, amaze gukinira imikino 130 akayitsindira ibitego birindwi.

Pepe ari gukina Igikombe cy’Isi cye cya kane nyuma ya 2010, 2014 na 2018. Uyu mugabo yibukirwa cyane ku mukino wa mbere w’Igikombe cy’Isi cya 2014 ubwo yahabwaga ikarita y’umutuku ku ikosa yakoreye Thomas Müller.

Pepe ari mu bakinnyi bakuze bari gukina Igikombe cy'Isi cya 2022

Muri rusange umukinnyi ukuze kurusha abandi wakinnye Igikombe cy’Isi ni umunyezamu wa Misiri, Essam El-Hadary wagikinnye mu 2018 afite imyaka 45.

Essam El-Hadary ni we mukinnyi wakinnye Igikombe cy'Isi afite imyaka myinshi kurusha abandi