00:00:00 IGIHE NETWORK KN KINYARWANDA EN ENGLISH FR FRANCAIS

Kera kabaye, Sepp Blatter yemeye amakosa mu guha Qatar kwakira Igikombe cy’Isi

Yanditswe na Iradukunda Olivier
Kuya 8 Ugushyingo 2022 saa 12:45
Yasuwe :

Sepp Blatter wahoze ari Perezida wa FIFA, avuga ko ari kwicuza ku hantu hatoranijwe ho kwakirira Igikombe cy’Isi cya 2022. Guhitamo Qatar itavugwaho rumwe ku burenganzira bwa muntu ndetse n’ibibazo by’ikirere cyayo byari ikibazo.

Hashize igihe gito urukiko rwo mu Busuwisi rugize abere Sepp Blatter wahoze ayobora Ishyirahamwe ry’Umupira w’amaguru ku Isi (FIFA) na Michel Platini wahoze ayobora Ishyirahamwe ry’umupira w’amaguru mu Burayi (UEFA) baregwaga ibyaha bya ruswa.

Mu mikorere ya FIFA icyo gihe havugwagamo ibyaha bya ruswa ihabwa abayobozi bayo ngo bemerere ibihugu runaka kwakira igikombe cy’Isi. Blatter akimara gutorerwa manda ya Gatanu hashize iminsi mike abayobzi 11 bahise batabwa muri yombi.

Aba bose na we arimo bakomeje kubihakana bivuye inyuma ko nta bimenyetso bihari bibashinja, ariko kuri iyi nshuro Sepp Blatter yemeye ko umwanzuro wo guha Qatar kwakira igikombe cy’Isi utari amahitamo meza nk’uko yabitangarije ibiro ntaramakuru bikorera mu Bubiligi BELGA.

Ati “"Umupira w’amaguru ndetse n’Igikombe cy’Isi ni ibikorwa binini kuri bo, nk’agahugu gato. Byari amahitamo adakwiriye kandi icyo gihe nari Perezida wa FIFA ndanabishinjwa. Mu ntangiriro, komite Nyobozi yifuje kutakibaha, Amerika ikakira icya 2018, nuko u Burusiya na bwo bukakira icya 2022.”

"Ibi byari kuba amahitamo meza ndetse no mu mutekano w’ibihugu byombi, byari kugira icyo byongera ku mahoro kuko bari kubitegura bakurikiranye. Ariko icyo gihe amajwi menshi kandi y’ingenzi yahise yerekeza kuri Qatar.”

Imiryango myinshi itegamiye kuri Leta ikomeza kunenga iki gihugu kuba kitubahiriza uburenganzira bw’ibanze bwa muntu, cyane cyane ubw’abagore,ibibazo by’abakozi n’abimukira muri iki gihugu.

Imihindagurikire y’ikirere cya Qatar cyane cyane ubushyuhe buri hejuru cyane, biri mu bituma benshi bavuga ko iki gihugu kitari gikwiriye kwakira iki Gikombe cy’Isi cya 2022. Iyi ni na yo mpamvu cyigijwe inyuma kikaba mu mpera z’umwaka kandi gisanzwe kiba mu mpeshyi.

Igikombe cy’Isi kizatangira kuva ku itariki ya 20 Ugushyingo 2022 kugeza tariki ya 18 Ukuboza 2022.

Sepp Blatter yemeye ko habayeho amakosa mu guha Qatar kwakira Igikombe cy'Isi
Guha Qatar kwakira Igikombe cy'Isi ngo ntiwari umwanzuro mwiza
Harabura iminsi mike Isi igahanga amaso muri Qatar ahazabera imikino y'Igikombe cy'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .