00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri Qatar yiteguye kwakira Igikombe cy’Isi

Yanditswe na Iradukunda Olivier
Kuya 7 Ugushyingo 2022 saa 08:30
Yasuwe :

Harabura igihe gito Igikombe cy’Isi cya 2022 kigatangira muri Qatar izacyakira, yamaze gukora ibishoboka byose kugira ngo hazaboneke umutekano n’imibereho myiza ku bazagana iki gihugu bitabiriye iyi mikino.

Iki ni igihugu gito kizakira abantu hafi 50% by’abasanzwe ari abaturage b’iki gihugu. Kugeza ubu iki gihugu gituwe na miliyoni zigiye kuzura eshatu, kandi kirateganya kwakira miliyoni imwe n’igice mu gikombe cy’isi.

Qatar iyoborwa n’umwana wa Hamad bin Khalifa Al Thani ari we Tamim bin Hamad Al Thani, wambaye ikamba ry’ubwami mu 2013 kugeza ubu. Se kandi yatanze mu 2016.

Mu gihe abamubanjirije barwanaga ahanini no gushakira iki gihugu ukwishyira ukizana, uyu mugabo we yaharaniye iterambere ryacyo no ku kimenyekanisha ku ruhando mpuzamahanga.

Mu 2010, iki gihugu cyahawe uburenganzira bwo kuzakira iki gikombe mu mwaka wa 2022. Nta kuzuyaza barabyemeye ndetse banahita batangira ibikorwa byo kubaka no kongera ibikorwa remezo bizatuma iki gikombe cyitabirwa kikananogera buri wese.

Ibi byagezweho bituma bahita basaba kwakira igikombe cya Arab Cup nk’isuzuma.

Mu byo cyasabwe harimo kongera serivisi zo kwakira abantu benshi kandi icyarimwe muri icyo gikombe. Bahise bubaka hoteli zikomeye ziyongera ku zihari ziba 200. Muri Kanama 2022, nibwo iza nyuma nazo zafunguye imiryango zitangira imirimo yazo.

Leta ya Qatar kandi ku bazaba bifuza kujya batembera mu mazi nabo yabatekerejeho kuko yakodesheje amato manini yahinduwemo hoteli. Abarenga ibihumbi 40 niho bateganyirijwe kuba nk’uko amakuru dukesha The National News abivuga.

Qatar yubatse ‘Fun Village’ nk’icyanya cyo kwidagaduriramo ku bafite amikoro make. Utu duce kandi twubatswe mu bice bitandukanye by’igihugu kandi byegereye za stade.

Iki gihugu na none cyahaye akazi ikigo cya Festival Glastonbarry gisanzwe gitegura ibitaramo, kugira ngo cyubake amahema ya gakondo ashushanya umuco w’abanya-Qatar, ‘Arab Tents’ aho abantu baciriritse bazajya batahamo mu gihe cy’igikombe cy’Isi. Hubatswe amahema 1000.

Imyiteguro y’igikombe cy’Isi ntiwayivuga ngo usige ibirebana n’uburyo bwo gutwara abantu n’ibintu muri iki gihugu. Muri Kanama 2022 nibwo igihugu cya Qatar cyisabiye abakozi ba FIFA kujya kureba uko serivise zo gutwara abantu zihagaze.

Aha isuzuma ryakorewe ku modoka nshya 1300 zaguzwe kugira ngo zizifashishwe mu gikombe cy’Isi mu mujyi wa Doha kugera ku zigeza abantu kuri stade. Kugenda muri izi modoka ni ukwishyura ifaranga ryaho rimwe, hafi 300 y’amafaranga y’u Rwanda.

Ubundi buryo bwashyizweho kandi bwasuzumwe ni ugutwara abantu hifashishijwe Gari ya Moshi.

Abakunzi b’umupira w’amaguru berekeza muri Qatar mu gikombe cy’isi ntibazaba bagikeneye kwerekana ibisubizo byo kuba barikingije Covid-19, bazasabwa icyangombwa kibemerera kwinjira mu gihugu gusa, nabyo leta yabyoroheje ishyiraho ‘Application’ zo mu telefone zizajya zibafasha.

Ujya muri Qatar ava mu gihugu aturutsemo afite ikarita ya ‘Ehteraz’ ifite ikoranabuhanga rigaragaza uko ubuzima bwe buhagaze. Iyi karita izaba yemeza iminsi wahawe kumara muri Qatar, yemeze niba hari ibibazo by’ubuzima ufite ndetse niyo izajya ituma umuntu wagiye muri Qatar yemererwa serivisi zagizwe ubuntu. Izajya kandi imenyesha umuntu ko hafi ye hari uwanduye.

Ibibuga byose byubatswe hakurikijwe amateka ndetse n’umuco w’iki gihugu, inyinshi zikaba zisasenywa mu gihe iki gikombe cy’isi kizaba kirangiye, maze hubakwe ibindi bikorwa remezo.

Ibibuga by’umupira birindwi mu bizakinirwaho ni bishya byubatswe muri iki gihugu hashyizwemo intera nto kuko zose ziri mu mujyi wa Doha no mu nkengero zayo, usibye Al Djanub iri mu mujyi wa Al-Wakrah w’ubucuruzi, na Al Bayt Stadium iri mu mujyi wa Al Khor ari na yo yavuguruwe yonyine ziri ku ntera y’izindi ho ibirometero 75.

Hari stade ya Al Bayt yakira abafana ibihumbi 60, yagenewe kuzakira imikino icyenda muri iki gikombe cy’Isi, harimo umukino ufungura igikombe cy’isi uzahuza Qatar na Ecuador, ikazakorerwaho kandi, ibirori byo gufungura iki gikombe ku mugaragaro.

Indi Stade yubatswe kuva hasi ni Lusail Iconic Stadium akaba ariyo izakira imikino 10 muri iki gikombe, ikajyamo abantu ibihumbi 80, arinayo izakinirwaho umukino wa nyuma w’iki gikombe. Impamvu abanya-Qatar bahaye iyi stade kwakira iyi mikino yose, ni uko yubatse mu mujyi bashaka kubaka mushya muri gahunda yabo ya 2030.

Izindi stade zisigaye ni Al Janoub Stadium, Ahmad Bin Ali Stadium, Khalifa International Stadium, Education City Stadium, Stadium 974 na Al Thumama Stadium. Izi zose zizakira imikino kandi irebwe n’abantu ibihumbi 40 babasha kuzicaramo.

Mu rwego rwo kugaragaza isura nziza mu by’umutekano, Qatar yamaze gutangaza ko izatanga ingabo zirenga ibihumbi 10. Izi ngabo za Qatar ndetse n’izidi ziturutse mu bihugu 13, ziri kugabanywa mu bice bitandukanye by’Igihugu binyuranye hagendewe ku hantu bazaba bakorera nk’uko Aljazeera ibitangaza.

Iminsi isigaye irabarirwa ku ntoki kugira ngo imikino y’igikombe cy’isi itangire. Ibikorwa byose byo kwitegura byararangiye. Abarenga miliyoni 1.5 biteganyijwe ko bazahurira muri iki gihugu kureba imikino 64 y’igikombe cy’isi, izatangira tariki ya 20 Ugushyingo 2022 kugeza tariki ya 18 Ukuboza 2022.

Amahema abantu bazabamo yarubatswe ndetse barenza n'umubare kubera ko abantu basabye kuzayabamo
Abatabasha kwishyura amatike kuri Sitade bagenewe aho bazajya barebera imipira bisanzuye
Bin al Sheikh Residences by Rotana Doha mu gihe yarimo yubakirwa Igikombe cy'Isi
Sheraton Hotel Doha izacumbikira abanyacyubahiro bazagana muri Qatar
Metro zagenewe kugeza abantu ku bibuga nta kiguzi
Ubwato bwahinduwemo hotel izakira abantu mu gikombe cy'isi
Sheikh Tamim Bin Hamad al Thani yagize uruhare rukomeye mu gutuma Qatar yemererwa kwakira Igikombe cy'Isi cya 2022
Ingabo zizarinda umutekano mu Gikombe cy'Isi zamaze gutegurwa
Kuba muri Qatar ugomba kuba ufite ikoranabuhanga rya Ehteraz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .