00:00:00 IGIHE NETWORK KN KINYARWANDA EN ENGLISH FR FRANCAIS

Akagozi kacitse mu minota ya nyuma! U Buholandi bwatsinze Sénégal bigoranye mu Gikombe cy’Isi

Yanditswe na Byiringiro Osée Elvis
Kuya 21 Ugushyingo 2022 saa 10:02
Yasuwe :

Ikipe y’Igihugu y’u Buholandi ‘Les Oranges’ yatsinze Sénégal ibitego 2-0 mu mukino wa kabiri w’Itsinda rya Mbere wabereye kuri Al Thumama kuri uyu wa Mbere, tariki 21 Ugushyingo 2022.

Sénégal ni yo kipe ihanzwe amaso nk’ishobora guhagararira Afurika neza; yinjiye mu mukino ifitiwe amatsiko menshi yo kureba uko yitwara idafite kizigenza wayo Sadio Mané wavunitse.

Umukino watangiye amakipe yombi asatirana ariko Sénégal yihariye umupira mu minota icumi ya mbere y’umukino.

Abakinnyi b’u Buholandi batangiye bacungira ku mipira Sénégal yatakazaga bakayizamukana biruka. Ku munota wa 16 bagerageje uburyo bw’igitego ariko umupira Daley Blind awuteye n’umutwe ujya hanze gato y’izamu.

Uko iminota yagendaga ni ko u Buholandi bwinjiraga mu mukino ari nako bugaragaza ak’inda ya bukuru ariko kuboneza mu izamu bikomeza kunanirana.

Ku munota wa 25 Sénégal yazamukanye umupira neza ariko Ismaila Sarr ateye Virgil Van Dijk awushyira muri koruneri itagize icyo ibyara.

Amakipe yombi yakomeje gusatirana, umupira uva ku izamu rimwe ujya ku rindi ariko u Buholandi bwahushaga uburyo bwinshi kurusha Sénégal. Igice cya mbere cyarangiye amakipe yombi anganya 0-0.

U Buholandi bwatangiye igice cya kabiri busatira kurusha Sénégal, ari nako bwahushaga ibitego.

Ku munota wa 61, Memphis Depay yasimbuye Vincent Janssen mu gihe Ismail Jakobs yafashe umwanya wa Abdou Diallo ku ruhande rwa Sénégal.

Sénégal yabonye amahirwe yo gufungura amazamu ku munota wa 65 ariko ishoti Boulaye Dia yateye umunyezamu w’u Buholandi Andries Noppert yarishyize muri koruneri.

Umutoza wa Sénégal, Aliou Cissé, yongeye gukora impinduka akuramo Dia asimburwa na Bamba Dieng ku munota wa 69.

Ku munota wa 73, Idrissa Gana Gueye yateye ishoti rikomeye cyane umunyezamu Noppert awukuramo ariko umusifuzi avuga habayeho kurarira.

U Buholandi bwakomeje gusatira bwahinduye imikinire butangira gutera imipira miremire maze uwo Frank De Jong yahinduye wageze ku mutwe wa Cody Gakpo atsinda igitego cya mbere ku munota wa 84.

Umukino ugana ku musozo, Memphis Depay yazamukanye umupira neza ateye ishoti Mendy arikuramo ariko umupira ugarukira Davy Klaassen asongamo atsinda igitego cya kabiri ku munota wa 99.

Umukino warangiye u Buholandi butsinze Sénégal ibitego 2-0. Kugeza ubu mu Itsinda A, u Buholandi ni bwo bwa mbere aho bufite amanota atatu bukanazigama ibitego bibiri, bunganya na Equateur. Umwanya wa gatatu ufitwe na Sénégal n’aho Qatar ikaba iya nyuma.

Ku mukino w’Umunsi wa Kabiri muri iri tsinda, Qatar izakina na Sénégal saa 15:00 mu gihe u Buholandi buzacakirana na Equateur saa 18:00 ku wa Gatanu, tariki 25 Ugushyingo 2022.

Cody Gakpo yatangiye kugora ab'inyuma ba Sénégal hakiri kare. Aha yagundaguranaga na myugariro Kalidou Koulibaly n'umunyezamu, Edouard Mendy
Cody Gakpo yishimira igitego cye cya mbere mu Gikombe cy'Isi
Frank De Jong (ibumoso) yishimira igitego cya Cody Gakpo cyari icya mbere cy'u Buholandi
N'abafana b'abana ntibasigaye
Itsinda ry'abafana ba Sénégal bazwiho gufana bikomeye bayiherekeje muri Qatar
Ibihugu bya Afurika bizwiho abafana batangaje mu mikino y'Igikombe cy'Isi
Frenkie De Jong agerageza ishoti rya kure ritabyaye igitego
Wari umukino w'ishiraniro hagati y'impande zombi
Virgil Van Dijk w'u Buholandi ahanganiye umupira na mugenzi we wa Sénégal
Davy Klassen w'imyaka 29 yashimangiye intsinzi nyuma yo gutsinda igitego cya kabiri cy'u Buholandi ku munota wa nyuma
Davy Klassen yishimira igitego cya kabiri cy'u Buholandi yatsinze mu minota ya nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .