00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi ba Arsenal FC berekeje mu Gikombe cy’Isi bayoboye urutonde, Manchester City ikorwa mu jisho

Yanditswe na Iradukunda Olivier
Kuya 13 Ugushyingo 2022 saa 10:37
Yasuwe :

Amakipe yo mu Bwongereza kuri uyu 12 Ugushyingo yakinnye imikino ya nyuma mbere yo kwerekeza mu Gikombe cy’Isi, aho Arsenal FC yabonye intsinzi ishimangira umwanya wa mbere imazeho igihe kitari gito.

Habaye imikino umunani mu mikino 10 ikinwa ku munsi wa Shampiyona. Uwatunguranye ni umukino Manchester City FC yakiriyemo Brentford, itsindwa 2-1.

Ivan Toney wari uhagaze neza, ku munota wa 16’ gusa yari abonye igitego cya mbere cya Brentford. Iki gitego cyayoboye umukino kugeza mu nyongera z’uyu mukino mu gice cya mbere.

Manchester City yaje mu gice cya kabiri ishaka kwishyura, kugeza ubwo umutoza Pep Guardiola yakoze impinuka imwe muri uyu mukino, ubwo yakuraga mu kibuga Joao Cancelo agashyiramo Julian Alvarez.

Brenford FC yabonye ko nta yandi mahitamo asigaye, ihitamo kugarira n’imbaraga zose.

Mu gihe Manchester City ari igishaka uko yabona igitego mu nyongera y’iminota 10’, ba rutahizamu ba Brentford bayibye umugono, birukankana umupira bavuye inyuma, batsinda igitego cya kabiri cya Ivan Toney nanone, bihindura isura kuri Etihad Stadium, umukino urangira ari ibitego 2-1.

Arsenal FC yabyungukiyemo kuko yamenye ibyabaye kuri mukeba mbere yo gukina na Wolves FC.

Nyuma yo guhusha uburyo bwinshi mu gice cya mbere, mu gice cya kabiri Arsenal FC yabonye igitego cya mbere cyatsinzwe na Martin Ødegaard ku munota wa 55’.

Iki gitego cyagaruriye icyizere Arsenal, yinjira mu mukino no mu nkundura yo gushaka igitego cya kabiri, biza no kuyihira ku munota wa 92’ ibona ikindi cyatumye umukino urangira ku bitego 2-1.

Abakunzi ba Arsenal F.C bari mu bihe byiza kuko ikipe yabo iyoboye urutonde rwa Shampiyona y’u Bwongereza, n’amanota 37. Irusha Manchester City iyikurikiye amanota atanu.

Arsenal FC igiye mu karuhuko k’imikino y’igikombe cy’Isi iri ku mwanya wa mbere, ndetse yizeye gusoza umwaka wa 2022 iyoboye ‘English Premier League’

Mu gihe Arsenal yasoje akazi kayo, Chelsea ikomeje guhura n’ibizazane. Yatsinzwe igitego 1-0 na Newcastle United, imibare yayo muri Shampiona ikomeza kugorana.

Umukino Chelsea FC yakinnye wari uwa gatanu mu marushanwa yose, aho yabashije gutsinda umukino umwe, itsindwa ine. Ibintu bikomeje kwanga ku mutoza wayo mushya, Graham Potter.

Amakipe agiye mu karuhuko Chelsea iri ku mwanya wa munani n’amanota 21, nta gitego na kimwe izigamye.

Amakipe asigaje imikino yayo kugira ngo yerekeze mu gikombe cy’Isi ni Brighton iza kwakira Aston Villa na Fulham iza kwakira Manchester United FC kuri iki Cyumweru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .