00:00:00 IGIHE NETWORK KN KINYARWANDA EN ENGLISH FR FRANCAIS

Bararurwanye! Ibyo utamenye ku rugamba rwaharuriye amayira umugore mu Rwanda

Yanditswe na Rabbi Malo Umucunguzi
Kuya 12 Werurwe 2018 saa 08:41
Yasuwe :
0 0

Imibare mpuzamahanga ihamya ko u Rwanda rukataje mu guha umugore ijambo mu nzego zifata ibyemezo, mu Nteko Ishinga Amategeko bagera kuri 64% ndetse mu kuziba icyuho mu buringanire u Rwanda ni urwa kane ku Isi n’urwa mbere muri Afurika.

Nubwo byagezweho kubera ubushake bwa politiki ariko si ubufindo bwikoze ijoro rimwe, ni urugamba rwatwaye imyaka myinshi nubwo umudiho w’intsinzi ya nyuma utarabyinwa.

Umwe mu bagize uruhare muri uru rugamba ni Ruboneka Suzanne wanakoze imyaka 17 mu Mpuzamiryango Pro-Femmes/Twese Hamwe, amaze imyaka itatu ari mu kiruhuko cy’izabukuru. Muri uyu mwaka yatorewe kuba Umuyobozi wungirije mu Nama y’Ubutegetsi.

Abagore barwanye inkundura mu kubohora igihugu

Mu gihe cy’urugamba rwagejeje ku guhagarika Jenoside yakorewe Abatutsi mu 1994, nubwo abagabo aribo benshi bafashe umuheto rugikubita, hari n’abagore bahagurukanye ingoga bafatanya na basaza babo. Ibyo byari bishya mu mateka y’u Rwanda.

Abatarafashe umuheto nabo urugamba barurwanye ku bundi buryo burimo gushaka umusanzu, ibitekerezo n’ingemu zitaburaga zavaga mu bihugu Abanyarwanda bari barahungiyemo.

Nko muri Uganda aho urugamba rwateye ruturuka, hari abagore basigaraga ku mavi basabira abari ku rugamba, banabashakira ingemu. Urugamba rurangiye batashye bitwa Benishyaka, biyemeza gufasha imfubyi n’abapfakazi b’abagabo baguye ku rugamba.

Abari i Burundi bo bitwaga Benimpuhwe, batangiye bashaka gusigasira umuco gakondo wari utangiye gukendera no kwigisha abakobwa cyane cyane imyuga itandukanye kugira ngo bazibesheho batandagaye.

Ruboneka yagize ati “Bashakaga kwishyira hamwe kugira ngo babone ingemu y’abana bagiye ku rugamba babicishije mu bitaramo, guteka amandazi akagurishwa n’ibindi bikorwa by’ubukorikori.”

Abari barahungiye muri Tanzania bitwaga ‘Amaliza’ nabo bishyize hamwe ngo bashyigikire urugamba kandi bifashe kubaho neza. Abo muri Congo bitwa Benurugwiro nabo intero yari imwe, gushyigikira urugamba no kwifasha.

Abasigaye mu Rwanda nabo muri ibyo bihe bitari byoroshye, bishyize hamwe mu miryango itari iya Leta igera kuri 13 mu 1992, bashaka imbaraga zo guhangana na Leta ngo isinye amasezerano ya Arusha haboneke amahoro.

Nibwo batangiye Impuzamiryango PRO-FEMMES/TWESE HAMWE, yahurizaga hamwe imiryango irimo Duterimbere ifasha abagore mu kubitsa no kuguriza, Réseau des Femmes Rurales, Haguruka n’indi.

Yakomeje agira ati “Muri icyo gihe cyose abagore bagaragaje ubushobozi budasanzwe nubwo ubuyobozi bwo hambere butabahaga umwanya ngo bagaragaze ko bashoboye. Mbere ubushobozi bwabo bwareberwaga mu mirimo yo mu rugo, kubyara no kurera.”

Nyuma ya jenoside habaye impinduka

FPR imaze gutsinda urugamba no gushyiraho Leta ya mbere y’Ubumwe ku wa 19 Nyakanga 1994, hagiyeho Minisiteri y’Uburinganire n’Iterambere ry’Umuryango, haza n’izindi nzego zifasha abagore.

Ruboneka wari warahungiye mu Burundi, yageze mu Rwanda ku wa 22 Nyakanga 1994 aje kureba u Rwanda no gutuza umubyeyi we, ariko umugambi ari ugusubirayo akazajya amugemurira amafaranga.

Waje kuyoyoka kuko yasanze hakenewe imbaraga nyinshi mu kubaka igihugu no gusana ibyasenyutse, kuko kubaka inzego byasaga no guhera ku busa.

Yajyanywe muri MIGEPROF yari yahawe Minisitiri Inyumba Aloysea, icyo gihe yari kumwe n’umugore umwe wari usanzwe ayikoramo witwaga Venantia Mukarugomwa, bombi ubu bitabye Imana.

Yagize ati “Nasanze bicaye mu nzu yasenyutse, y’umurangare imbere ya Hotel Novotel. Minisitiri Inyumba ambonye yarishimye kuko twari tunaziranye, na mbere nari muri Komisiyo y’Abategarugori ba FPR. Ati uratashye? Nti oya nje gutuza umukecuru wanjye nkazajya mbagemurira amafaranga.”

“Inyumba ati ntibishoboka ntiwansiga njyenyine, ahubwo ngwino dufatanye dutekereze ku cyerekezo cy’iyi Minisiteri tunarebe uburyo tuzahuza abagore, dutange umusanzu mu kubaka ubumwe bw’Abanyarwanda.”

Inyumba ngo yari afite impano akaba umuhanga, agakunda umurimo akamenya n’uburyo bwo kugera ku cyo ashatse mu mutuzo.

Ruboneka ngo yabajije niba inzu barimo ari iya Leta ngo bashake uko bayivugurura, bamusubiza ko ari iy’umuntu ku giti cye, bumvikana kujya gushaka iya Leta babohoza kuko aribyo byakorwaga icyo gihe.

Abasirikare babashakiye akamodoka gashaje bakozanya insinga ngo kake, Ruboneka aratwara, ajyana na Venantia. Bageze imbere ya Cathédrale St Michel ngo babonye inzu yahoze ari iya Etat Major, yarasenyutse ariko harimo amadosiye yabo ya kera.

Barahashimye kuko hari hafi ya PNUD, UNICEF na HCR, bizera ko bazabona inkunga yo kuyisana.

Yakomeje agira ati “Twasubiye inyuma tubikojeje Inyumba ati nta kibazo. Atelefona muri Etat Major ati muze mutware inyandiko zose ariko mudusigire intebe n’utubati ni ibyacu, twabibohoje!”

Ntibyatinze UNICEF na HCR basannye iyo nzu, abasirikare babaha tapi yo gusasa mu biro kwa Minisitiri.

Venantia yagizwe Umuyobozi Mukuru muri Minisiteri, Ruboneka aba byose nk’umushoferi, uwakira abantu, umunyamabanga n’intumwa yo kohereza hirya no hino. Nyuma yaje gushingwa imiryango itari iya leta n’ishami ryo kurengera abana no kubateza imbere.

Yakomeje agira ati “Tumaze kubona aho twicara heza nibwo twatangiye gutekereza icyerekezo cya Minisiteri, tuti Umunyarwandakazi dushaka yaba yujuje iki?”

“Twatangiye dushaka abakozi bemera kuba ab’abakorera bushake kuko nta ngengo y’imari yariho. Ukwezi kwarashiraga bakaduha ibigori, akawunga, amavuta... Inyumba yari afite impano yo gushaka abakozi beza imyanya yose iruzura ndetse n’inkunga zitangira kuboneka.”

Mu 1996 nibwo Ruboneka yasabye kuva muri MIGEPROF nubwo yakundaga akazi ke, ajya gushaka akandi katuma arera abana umunani yari afite bakeneye kwiga no kubaho.

Inkomoko ya 30% y’Abagore mu nzego zifata ibyemezo

Mu 1995 hatangiye gutegurwa inama mpuzamahanga ikomeye y’Abagore yabereye i Beijing mu Bushinwa. Abayobozi bibazaga niba Abanyarwandakazi bazajyayo, hemezwa ko Leta izahagararirwa na Minisiteri hakagenda n’urwego rw’imiryango itari iya leta.

I Beijing, mu gihe ibindi bihugu byagaragazaga intambwe y’abagore mu iterambere, mu Rwanda zari ingaruka za jenoside, abagore bahohotewe, abapfakazi, imfubyi, abagore bafunzwe, impunzi n’ibindi bibazo bishamikiye ku mateka.

Ruboneka ati “Barakubonaga uri Umunyarwanda bagahunga ngo ubwo ntiwicanye? Nyuma haje kwemezwa imyanzuro, muri yo niho hemejwe ko byibura 30% by’abagore bajya mu nzego zifata ibyemezo mu myanya yose, ndetse na za Leza zisabwa gushyiraho inzego zigamije iterambere ry’abagore. ”

Amategeko yashyizweho andi aravugururwa

Mu ngaruka za jenoside yakorewe Abatutsi u Rwanda rwari rufite imfubyi nyinshi n’abapfakazi ariko mu mategeko n’umuco ntibemererwaga kuzungura cyangwa gucunga umutungo wasizwe n’ababyeyi cyangwa abagabo babo ku buryo imitungo imwe yononekaraga.

Ku ikubitiro havuguruwe Itegeko Nshinga hashyirwamo ko nibura 30% bagomba kuba ari abagore, nubwo habanje impaka kuko hari abadepite batabyumvaga.

Mu 1999 nibwo hatowe itegeko ry’icunga mutungo w’abashakanye, impano n’izungura, ryanateje impaka kuko ngo mu badepite hari abibazaga impamvu umugore azungura nta mutungo yavanye iwabo.

Ruboneka ati “Hari abavugaga ngo azazungura aho avuka azungure n’aho yashatse? Ngo umugore nibamuha urutoki azatwara n’ukuboko! Byabaye ngombwa kwifashisha abadepite bavuga rikijyana kandi batabangamiye ihame ry’uburinganire nka Tito Rutaremara, cyanga undi tubona ko atabogamye cyane. ”

Ku munsi wo gutora ngo habayeho igisa n’igitutu gicishije make, haza imiryango n’abagore bo mu isoko batarinjira na rimwe mu nteko, irakubita iruzura.
Ati “Ibyo byatunguye abadepite, Perezida w’Inteko (Joseph Sebarenzi) ati habaye iki? Bati Nyakubahwa turifuza ko ririya tegeko risohoka vuba rikaramira imitungo y’abapfakazi n’imfubyi ndetse n’iy’abagabo bafunze cyangwa bahunze itangiye kononekara no kwigabizwa n’abatabifitiye uburenganzira. ”

Kuritora byarihuse ryoherezwa mu Rukiko rw’Ikirenga kuko Sena itabagaho, abagore bakoresha uburyo bwo gutelefona Perezida warwo Rwagasore Siméon, abahagarariye imiryango itandukanye bakagenda bamutakambira.

Yagize ati “Nawe yarabyumvise yumva ko bifite ishingiro rirasohoka. Twavuga ko ryaje risasira ayandi, harimo iry’ubutaka mbere imvugo yari ngo hari isambu wavanye iwanyu? “

Perezida Kagame yabaruhuye kwambara mugondo

Nyuma haje gutorwa irindi tegeko ryo kurwanya ihohoterwa rishingiye ku gitsina kugira ngo harandurwe n’umugera winjiye muri benshi.

Ruboneka yakomeje ati “Icyaha cyo guhohotera umugore muri jenoside cyari mu cyiciro cya kane, umugabo agahanwa kimwe n’uwibye ihene cyangwa intebe. Abagore bo muri Pro-Femmes baraye bicaye bategura inyandiko izashyikirizwa Perezida wa Repubulika Nyakubahwa Paul Kagame. Bamwumvisha ko ibintu bikomeye n’umugore uherekeje agenda yambaye ‘Mugondo’ kuko ashobora guhohoterwa. Perezida ati Mugondo ni iki? Uwari Minisitiri w’Ubutabera Mucyo ati ni amakabututura bakenyereraho mu rwego rwo kwirinda ifatwa ku ngufu.”

“Perezida ati murumva aho bashiki banyu n’ababyeyi banyu bageze? Iryo tegeko naryo ryasohotse vuba ndetse icyaha cyo guhohotera abagore gishyirwa mu rwego rwa mbere.”

Abagore bahawe umwanya mu nzego zifata ibyemezo

Abagore baje guhabwa imyanya abandi baratorwa mu nzego zifata ibyemezo. Gusa haje kuvuka inzitizi ko abenshi batari barize ku mpamvu z’umuco utarahaga amahirwe angana umwana w’umukobwa n’umuhungu.

Naho hashyizwe imbaraga mu bukangurambaga, Madamu Jeannette Kagame binyuze mu Imbuto Foundation atera inkunga abana b’abakobwa batsinze neza ndetse imiryango ya Pro-Femmes nayo ikomeza ubuvugizi.

Pro-Femmes yaje gutangiza umushinga “Women can do it” wigishaga abagore ko nabo babishora, bagatozwa kwigirira icyizere, ku buryo ubu imvugo yahindutse “Women do it” cyangwa “Umugore arabishoboye.”

Ruboneka Suzanne ashimangira ko uru rugamba rwari rugamije kubaka ejo heza h'u Rwanda
Inyumba niwe wabaye Minisitiri wa mbere w'Uburinganire n'Iterambere ry'umuryango; icyo gihe batangiye Minisiteri ari abantu babiri
Abagore bamaze kugira ubwiganze mu Nteko Ishinga Amategeko nyuma y'urugamba rukomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .