Kigali Marriott Hotel yasuye abagore barimo abafashwe ku ngufu muri Jenoside, inabagenera inkunga

Yanditswe na IGIHE
Kuya 28 Werurwe 2019 saa 10:11
Yasuwe :
0 0

Abakozi ba Kigali Marriott Hotel, basuye abagore bibumbiye muri ‘Association Tubahumurize’ igizwe n’abagore bafashwe ku ngufu muri jenoside yakorewe Abatutsi, n’abandi bafite ibibazo bitandukanye barabahumuriza babaha n’inkunga y’ibintu bitandukanye.

Kuva Kigali Marriott Hotel yashingwa mu Rwanda mu myaka itatu ishize, buri kwezi ikora igikorwa cy’ubugiraneza cyo gufasha abatishoboye.

Muri uku kwezi kwa Werurwe kwahariwe abagore, abakozi b’iyi Hotel bifatanyije n’abagore bibumbiye muri “Association Tubahumurize” yo mu Karere ka Kicukiro, babagenera n’inkunga y’ibiribwa, ibinyobwa, ibikoresho by’isuku n’ibindi bitandukanye.

Umuyobozi Mukuru ushinzwe abakozi muri Kigali Marriott Hotel, Ingabire Munyangabe Nicole, yavuze ko biri mu muhigo w’iyi Hotel, wo gufasha abatishoboye.

Ati “Buri kwezi tureba abo dusura bababaye, tukabafasha tukabahumuriza. Ni igikorwa cyatekerejwe na Hotel. Turi abacuruzi ariko dufite ubumuntu niyo mpamvu ibyo twunguka tubisangira n’abatishoboye.”

Mu butumwa yahaye aba bagore, Ingabire Munyangabe Nicole, yababwiye ko badakwiye guheranwa n’agahinda.

Ati “Ntimwihebe ngo muheranwe n’agahinda. Mukwiye kumva ko mufite impano ikomeye muri mwe, mwikunde kandi mukunde ubuzima, muhumure ntimuri mwenyine turi kumwe”.

Umuhuzabikorwa wa Association Tubahumurize, Mwiririza Jeanne, avuga ko ari igikorwa kidasazwe kuko ngo kuva yashingwa mu myaka 10 ishize, ari ubwa mbere bahabwa inkunga nk’iyo bahawe na Kigali Marriott Hotel.

Ati “Ni ibyishimo bidasanzwe kuri twe, kuko ni ubwa mbere twabona abagiraneza nk’aba. Twari tuzi ko inyungu za hotel zikoreshwa mu bikorwa by’ubucuruzi, ntitwari tuzi ko bakora ibikorwa byiza nk’ibi. Ni ubwa mbere tubonye inkunga nk’iyi.”

“Harimo abagore barya bibagoye, kubera iyi nkunga bagiye kurya bagiye kunywa, babonye isabune n’ibindi bikoresho by’isuku. Murakoze cyane.”

Association Tubahumurize, ifasha abagore mu bijyanye n’ubujyanama, ikanabigisha gukora imishinga iciriritse ibyara inyungu, abakobwa bacikirije amashuri nabo bigishwa kudoda no gufuma. Kuva mu 2008, imaze gufasha abagore barenga 1000.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza