NARAROSE

Yanditswe na
Kuya 11 Gashyantare 2016 saa 06:00
Yasuwe :
0 0

Narotaga ntarasinzira, nakwicura bikaba uko, nk’abandi bakobwa...Natekerezaga umusore uzansaba, tukambikana impeta, tukabyara tukarera, tugatuma tugakuza. Ngashushanya mu bwenge umusore mwizaaa..., wo mu nzozi nyine ! Nararose imyaka irashira.

Nyamara shenge sinari nteye nk’abandi. Kandi nifuzaga kuba nkabo. Aho nyuze sinshimanirwe inzara, ntibandebane amaso yuzuye impuhwe zenda gusa n’umugayo. Nashakaga ko nanjye najya ntera abo nyuzeho guhindukira bifuza guherekeza urwunyunyu rwo kundeba, dore ko burya umubiri uryoherwa henshi , no ku maso !

Nakoraga muri Banki y’abaturage i Nyanza, ngatura ahitwa mu Gakenyeri. Urakambona nicaye inyuma y’ibiro ! Nyagasani we, si ishyano nari naragushije gusa, kari akaga ! Nyamara bambwiraga ko ndeba nk’inyana mu ruhongore, kandi no ku mafoto narabibonaga koko. Narasekaga ukaba wampa imbyeyi. Nkagira amenyo yera nk’urubura. Umusatsi wanjye wari umusereka, w’igikaranka utagira uko usa. Umubiri nari inzobe, nkavuga neza, nkagira ingeso n’imico myiza. Ntawe uyoberwa uko ateye ga !

Nkinanutse nari mfite amabere y’akadaterurwa,wagirango ni amatererano si gusa. Ngiyo impamvu nahoraga nicaye, naba mpagurutse nkiheta nk’umuheto, kugirango ibitugu bikingirize igituza ariko kikanga kikagaragara. Nahoranaga ipfunwe, nkambara neza simberwe, hakaboneka amabere arenze gutubuka. Nagendaga nihuta, nahura n’uwo nzi ngashirwa muteye umugongo.

Mu biro nakoragamo twari bane, hari Roza, umubyeyi ubyiruye inkumi n’abasore, hakaba Maraba, umusore wari umaze kurushinga, na Nyirinkindi wari hafi gufata pansiyo y’iza bukuru. Twumvikanaga nk’abavukanye, twizeranaga nk’abanywanye, tugakora nk’abikorera.

Nyirinkindi tumusezeraho, asimburwa n’umusore urangije Kaminuza witwaga Mukeshimana Olivier. Yarahageze nkabona muzi, nshatse aho namubonye haranyobera. Naje kwibuka ko nigeze kumurabukwa ahagaze imbere ya Banki avugana n’umukobwa.

Icyo gihe nari mbaciyeho ntaha kuko nari nasabye ikiruhuko cya nyuma ya saa sita. Nyuma yansobanuriye ko uwo munsi yari yaje gushaka akazi.
Nubwo nihutaga, narabasuhuje ngo ahindukire akanya kangana n’umurabyo, mu maso he hantera ibishashi.

Nageze hirya umutima untota ngo nimpindukire murebe n’igihagararo, ariko nkanga nti : « baragirango iki ? » Hafi kuminuka naratsinzwe ndahagarara ndeba inyuma, ndakebaguzwa ngo bagirengo hari uwo ntegereje. Nubwo nari ntakibari hafi namurebye igihagararo, mureba indeshyo, mureba umubyimba numva aranyuze. Umenya yarendaga gusa na wawundi nashushanyaga ndyame... Mu bitekerezo nti : « Arahirwa uriya mwana w’umukobwa ! ».

Twakiriye Mukeshimana uko dushoboye, ndetse tumubonera akabyiniriro duhina izina rye, tumwita Kesha. Udukuriye aramunshinga ngo mwereke uko dukora akazi. Ntibyanshimishije gusa ahubwo byanteye n’igihunga ntamenya gusobanura. Ese aho si uko nangaga kuzashiduka mukunda nkamusarira kandi nari nariboneye umukobwa buzura ? Nari mfite ubwoba bwo kuzakomereka umutima nkababara.
Kesha ntiyavugaga menshi, twamaze ibyumweru bibiri byose ntacyo tuzi kuri we. Yashishikariraga akazi, tugakora tugataha, nkumva umunsi ubaye mugufi, nkifuza ko bwacya vuba tukagaruka...

Nyuma y’ibyumweru bibiri, kuwa gatanu twagize akazi kenshi, dusigara twembi abandi batashye ngo tukarangize. Kesha yambwiye ko bucya ajya ku Ijuru rya Kamonyi kureba abo iwabo. Mboneraho nshaka kumenya ibyo maze iminsi nibaza nti :
- Ababyeyi n’abavandimwe niho batuye ?

Yubika umutwe biratinda yitsa umutima ati :
- Niho bari batuye.
Ndaceceka nkomeza kumureba. Yubuye amaso mbona aratukuye. Yongera kuyampisha. Ndanwanwagira nti :
- Mbabarira birakubabaje.
Araterura ati :
- Data yapfuye umwaka ushize, yiyahuye. Mama wari utwite bimutera guhungabana, abyara udakuze. Ntiyamurera amusiga amaze ibyumweru bibiri nawe turamushyingura. Ni jye mfura iwacu, icyo gihe nari i Butare niga. Aho kumperana, umubabaro untera ingufu ngo ndangize nzarere bashiki banjye babiri na barumuna banjye babiri harimo n’ako gahinja. Abo bavandimwe baracyari aho twaboneye izuba, bararerwa na mushiki wanjye unkurikira. Ngize amahirwe yo kubona aka kazi. Nari ngakeneye !

Ngo anyizere ambwire atyo numva anshikuje roho yanjye nari maze iminsi nkomeyeho nanga kuzababara. Umubiri usigara ari igipampara. Amaso azamukamo amansonza ndwanira kuyamuhisha ariko biranga ibirira byinshi byisuka ku matama ndabireka. Sinzi niba nararizwaga n’izo mpfubyi zihuye n’umuruho ari ibitenga bituzuye, cyangwa niba ari uko Kesha yari anyinjije mu ibanga rye nk’inshuti magara. Ariko ndakeka byari biturutse kuri izo mpamvu zombi. Nkomeza kurira ntacyo mvuga nubika umutwe.

Kesha yarahagurutse, aranyegera amfata mu maboko arankomeza, ngo ubwanwa bwinshi bukimerera ku musaya we bunkore ku itama ndatengurwa biratinda ariko nkomeza kumva urwunyunyu ndetse nifuza ko twakwigumira gutyo. Aranyongorera ati :
- Humura ntugahogore si cyo cyanteye kukubwira ibyanjye. Naje hano ntazi uko nzakirwa ariko byashushe nko gusanga abavandimwe. Wowe by’umwihariko, bampaye ngo untoze, mbona ntakintonda kubera ko ushishikajwe n’uko ndangiza inshingano, nkamenyera nkagira amahirwe yo kuramba ku kazi. Muri mwese uri umuvandimwe undutira abandi. Nta banga rero nakurenza.

Numvaga nezerewe bagenzi ! Ariko ndamwitaza turebana mu maso. Nsanga uwo nitaga umuntu arayingayinga umumarayika. Nibuka mubona bwa mbere...Ntekereza n’uko nteye... Nibwo mubwiye nti :
- Urakoze. Turi abavandimwe koko ! Twaba ba nde bandi se ?
Twendaga no gutaha. Buhoro buhoro ngenda murekurira akazi, aho twasinyaga twembi akahasinya wenyine, nuko aza kumenyera.

Reka rero ubuyobozi buzavumbure ikosa rikomeye ryaturutse mu biro byacu rigatera igihombo gikomeye Banki twakoreraga. Turadagadwa. Itohoza rirakorwa, ryerekana ko Kesha ari we nyirabayazana ariko ko atabikoranye uburiganya ahubwo byaturutse ku burangare. Yitegura gusezererwa.

Natekerezaga abana barumuna be, nkazirikana ibyishimo yari afite by’amahirwe yari abonye mu kuronka akazi adatinze, n’urukundo namukundaga bucece, nubwo nari nzi ko rudashoboka, nkumva mbaye umurwayi. Mfata icyemezo gikomeye cyo kumwigurana, nemera ko uburangare ari jye wabugize nkamusinyisha ntabanje gushishoza. Ntibyatinda mbona ibaruwa inyirukana. Duherukana ubwo.

Nabaye aho nshaka akazi ndakabura, udufaranga nari narabitse turakendera ndateseka. Nyuma y’amezi umunani nafashwe n’indwara idasobanutse, biba ngombwa ko ninjizwa ibitaro ngakorerwa ibizami bishoboka. Mbamo ndavurwa birarambirana ndiheba.

Hagati muri Gashyantare, nota izuba imbere y’icyumba, ndabukwa Kesha azanye amaroza atagira uko asa. Mubonye umutima urandya. Turaramukanya ampereza indabyo, mwinjiza ahari hasigaye ari iwanjye. Tubaye ibiragi ndamubaza nti :
- Wabwiwe na nde ko ndi aha ?
- Nabaririje aho utuye ntinda kuhamenya, mpageze nsanga ntuhari, umuturanyi ambwira ko uri aha. Ariko ku mutima twahoranaga. N’ubwo ntacyo wambwiye, warankunze uranyigurana. Ibyo nabyumvaga mu iyobokamana ! Wanyitangiye ntacyo unca ntacyo unsaba, unkunda kurusha uko wikunda, unkundira abanjye biranyura. Uri mwiza ntawe musa, ukagira umutima wa diyama. Niba ufite umukunzi umbwire mpinire aha, nzakurwe uruvi nkiri ingaragu.

Nari mfite byinshi byo kumubaza, byinshi byo kumubwira ariko uwo mugoroba mvuga make. Byose byafututse mu minsi yakurikiyeho.
Kesha yankunze ndwaye, nta kazi mfite, mfite n’ikinegu, mpora mbimubwira....
Urukundo ni ubwitange, ntirwibagirwa ikiza. Uzamukundane ubupfura, umukundire mu mucyo, umwemere uko yaremwe !
Dusazanye turebana akana mu jisho.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza