00:00:00 IGIHE NETWORK KN KINYARWANDA EN ENGLISH FR FRANCAIS

U Buyapani bwahaye u Rwanda miliyoni zisaga 900 yo guteza imbere abanyabugesera

Yanditswe na

Rabbi Malo Umucunguzi

Kuya 7 July 2015 saa 05:11
Yasuwe :

Ibinyujije mu biro by’Umuryango w’abibumbye bishinzwe imishinga inyuranye (UNOPS), Guverinoma y’u Buyapani yahaye u Rwanda Amadolari ya Amerika 1,307,496, ni ukuvuga Amafaranga y’u Rwanda asaga miliyoni 940, muri gahunda yo kuzamura imibereho y’abaturage (Millennium Villages Project/MVP), i Mayange mu Karere ka Bugesera.

Tariki ya 2 Nyakanga i Copenhagen mu Denmark, ni bwo hashyizwe umukono ku masezerano hagati ya guverinoma y’u Buyapani, hemezwa impano y’inyongera ku mushinga wa MVP, yiyongera ku yandi yatanzwe muri Mata n’Ukuboza 2014, agera kuri miliyoni 2.5 z’Amadolari ya Amerika.

Uretse u Rwanda, muri iyi gahunda u Buyapani bwatanze aya mafaranga muri Kenya na Nigeria.

Iyi nkunga iri mu rwego Guverinoma y’u Buyapani yiyemeje gufasha u Rwanda ikugera ku ntego z’ikinyagihumbi zigamije iterambere (MDGs).

By’umwihariko, iyi nkunga izakoreshwa mu gukomeza kunoza imishinga y’amazi n’isuku, ubuzima n’imirire myiza, ubuhinzi no kuzamura ibikorwa bibyara inyungu no muri gahunda zo gukurikirana no gusuzuma ibi bikorwa mu murenge wa Mayange, Akarere ka Bugesera mu ntara y’Uburasirazuba.

Igamije kandi gushyira abaturage mu murongo mwiza w’iterambere, kandi amasomo azaturuka ku bikorwa by’i Mayange akazakwira mu bice bitandukanye by’u Rwanda.

Gahunda ya MVP yatangiye mu 2005/06, icyiciro cyayo cya mbere kirangira mu 2010. Mu cyiciro cya kabiri cyatangiye mu 2011 kikazarangira hagati mu 2016, hari gufashwa ibihugu bitandukanye bya Afurika birimo u Rwanda kugera ku ntego z’ikinyagihumbi, MDGs, bitarenze uyu mwaka wa 2015.

Uyu mushinga ushyirwa mu bikorwa bijyanye n’ ibyo u Buyapani bwemereye mu Nama ya gatanu ya Tokyo ku iterambere rya Afurika (TICAD V), yabereye i Yokohama mu Buyapani, muri Kamena June, 2013.

Guverinoma y’ u Buyapani ikomeje kugaragaza ubushake bwayo mu gufasha guverinoma z’ibihugu bya Afurika yo munsi y’ubutayu bwa Sahara, mu rugendo rugana ku ntego z’ikinyagihumbi, MDGs, imibereho y’abaturage, n’iterambere ridaheza kandi rirambye muri Afurika yose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .