00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashishikarije Abayapani kongera ishoramari mu Rwanda

Yanditswe na

Noel Turikumwe

Kuya 9 January 2015 saa 05:25
Yasuwe :

Perezida wa Repubulika y’u Rwanda, Paul Kagame, yakiriye umuyobozi w’Ikigo cy’u Buyapani gishinzwe Iterambere (JICA), Prof. Akihiko Tanaka, ashima inkunga y’u Buyapani mu iterambere ry’u Rwanda ariko asaba ko JICA yarushaho gutera inkunga ibikorwa byinshi by’abikorera.
Ibi biganiro byabereye mu muhezo, nyuma yabyo Amb. Muligande Charles, uhagarariye u Rwanda mu Buyapani, yavuze ko ibiganiro iri tsinda ry’Abayapani ryagiranye na Perezida Kagame byibanze ku bufatanye hagati y’u Rwanda n’iki (…)

Perezida wa Repubulika y’u Rwanda, Paul Kagame, yakiriye umuyobozi w’Ikigo cy’u Buyapani gishinzwe Iterambere (JICA), Prof. Akihiko Tanaka, ashima inkunga y’u Buyapani mu iterambere ry’u Rwanda ariko asaba ko JICA yarushaho gutera inkunga ibikorwa byinshi by’abikorera.

Ibi biganiro byabereye mu muhezo, nyuma yabyo Amb. Muligande Charles, uhagarariye u Rwanda mu Buyapani, yavuze ko ibiganiro iri tsinda ry’Abayapani ryagiranye na Perezida Kagame byibanze ku bufatanye hagati y’u Rwanda n’iki gihugu, ahaniniku mishinga y’ibikorwa by’iterambere u Buyapani bufashamo u Rwanda.

Yagize ati “U Buyapani bwagize uruhare mu iyubakwa ry’Ikiraro cya Rusumo kiduhuza na Tanzaniya, Perezida wa Repubulika yabashimiye iyi nkunga, avuga ko atari inkunga igirira u Rwanda akamaro gusa ko ahubwo igira uruhare mu guhuza u Rwanda n’ibindi bihugu bya Afurika.”

Amb. Muligande yakomeje avuga ko Perezida Kagame yasabye abahagarariye u Buyapani ko hejuru y’inkunga igihugu cyabo kigenera u Rwanda, bashobora no gukangurira abashoramari b’u Buyapani kuza mu Rwanda ari benshi kuko ari igihugu gifite umutekano usesuye, kibarizwa no mu miryango ituma ibikorwa bigikorerwamo bigera mu karere ka Afurika y’Uburasirazuba bikanungukira no ku zindi gahunda z’igihugu zo korohereza abashoramari.

Umuyobozi wa JICA, Prof Tanaka, yavuze ko bimwe mu byo yasabwe na Perezida w’u Rwanda, birimo kurushaho gukorana n’abikorera kandi bakaba babyemeranyijweho.

Yagize ati “Ibintu dufite kwigaho cyane mu minsi iri imbere ni ukureba uko twakorana cyane n’ibigo by’Abikorera, Ubuyapani buri gutanga inkunga nyinshi, ishobora kuba inkingi nyayo y’iterambere ry’u Rwanda, ariko Perezida Kagame yasabye ko twashyira imbaraga nyinshi mu gukorana n’abikorera, tugatanga inkunga nyinshi muri uru rwego kandi twabyemeranyijeho.”

Umubano w’u Rwanda n’u Buyapani umaze imyaka irenga 50 ibi bihugu bifatanya mu mishinga y’iterambere.

Leta y’u Buyapani ifasha u Rwanda mu kubaka ubumenyi n’ubushobozi bw’abaturage, no mu bindi bikorwa by’iterambere birimo kongera ingufu z’amashanyarazi n’ibikorwa remezo.

Mu bikorwa bya vuba iki gihugu cyakoranye n’u Rwanda, harimo inkunga yubatse ikiraro cya Rusumo gihuza u Rwanda na Tanzaniya kizanatahwa ku mugaragaro kuri uyu wa Gatandatu tariki ya 10 Mutarama 2015.

Indi mishinga yaganiriweho, harimo gukangurira u Buyapani kugira uruhare mu mishinga ihuza ubukungu bw’ibihugu bya Afurika y’Uburasirazuba irimo kubaka umuhanda wa gari ya moshi, guhuza imiyoboro y’itumanaho no guhuza ibikorwa by’amashanyarazi mu bihugu by’akarere ku buryo ibihugu byegeranye bishobora guhahirana umuriro n’indi mishinga y’iterambere.

Prof.Tanaka ari mu Rwanda mu ruzinduko rw’iminsi itatu rutangira kuva tariki ya 8 kugeza ku ya 10 Mutarama 2015, mu bindi bikorwa yakoze ageze mu Rwanda yasuye urwibutso Rukuru rwa kigali ruri ku Gisozi.

Andi mafoto wayasanga hano

Amafoto: Urugwiro Village

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .