00:00:00 IGIHE NETWORK KN KINYARWANDA EN ENGLISH FR FRANCAIS

Bwa mbere mu mateka inama ya TICAD igiye kubera muri Afurika

Yanditswe na Israel Ishimwe
Kuya 16 August 2016 saa 11:50
Yasuwe :

Nyuma y’imyaka 20 inama mpuzamahanga ya Tokyo yiga ku iterambere rya Afurika (Tokyo International Conference on African Development) ibayeho, bwa mbere mu mateka igiye kubera ku mugabane wa Afurika.

Iyi nama igiye kuba nshuro ya gatandatu (TICAD-VI) izabera i Nairobi muri Kenya ku itariki ya 27 na 28 Kanama 2016.

Mu 1993 nibwo Leta y’u Buyapani yatangije TICAD mu rwego rwo kwereka amahanga uburyo iterambere rya Afurika ari ingenzi kandi rikwiye kugerwaho byihutirwa binyuze mu guteza imbere amahame y’ibiganiro hagati y’abayobozi bo kuri uyu mugabane n’abafatanyabikorwa babo.

TICAD itegurwa ku bufatanye n’Ishami ry’Umuryango w’Abibumbye ryita ku iterambere, UNDP, Komisiyo y’Umuryango wa Afurika Yunze Ubumwe (AUC), Banki y’isi n’abandi bafatanyabikorwa baturutse mu bihugu byose bya Afurika.

Kuva yatangira mu myaka 20 ishize, TICAD yagiye ikora byinshi bigamije gushyira mu bikorwa gahunda zigamije kuzamura iterambere rya Afurika binyuze mu ihame ryuko abanyafurika bakwiye kubigira ibyabo, ndetse no gufatanya n’amahanga.

Inama zose zabaye mu 1993, 1998, 2003, 2008 na 2013 zaberaga mu Buyapani. Iheruka ya gatanu yabereye Yokohama yari ifite insanganyamatsiko igira iti” Twese hamwe dufatanyije dushobora kubaka iterambere rya Afurika ku buryo burambye.”

Ni iki u Rwanda rwungukira kuri TICAD

Ubusanzwe TICAD ifite inkingi eshatu z’ingenzi arizo: Iterambere rirambye, Umuryango abaturage bose bibonamo ndetse n’amahoro n’umutekano.

Binyuza muri izi nkingi, Ikigo cy’u Buyapani gitsura iterambera (Japan International Cooperation Agency, JICA) cyakoze ibikorwa bitandukanye mu Rwanda byagiye byibanda ahanini ku Iterambere rirambye n’Umuryango abaturage bose bibonamo mu rwego rwo gufasha igihugu kuzamuka mu bukungu.

JICA yatanze umusanzu mu byiciro bitandukanye birimo kubaka ibikorwaremezo, guteza imbere ubuhinzi, gusakaza amazi meza, isuku n’isukura ndetse n’ikoranabuhanga.

Binyuze muri ibi byiciro, imyanzuro ya TICAD V yabashije gushyirwa mu bikorwa aho ubucuruzi mu karere bworohejwe binyuze mu kubaka gasutamo imwe ku mupaka wa Rusumo uhuza u Rwanda na Tanzania.

Hanatanzwe kandi amahugurwa ku bahinzi b’imboga n’imbuto aho bigishijwe uburyo barushaho kongera umusaruro wabo no guhaza isoko (Smallholder Horticulture Empowerment and Promotion).

Mu bindi bikorwa bitandukanye u Rwanda rwungukiye kuri TICAD ni gahunda y’imyaka itanu yiswe ABE Initiative(African Business Education Initiative for the Youth) igamije guha urubyiruko 1000 rwo muri Afurika amahirwe yo kwiga muri Kaminuza zo mu Buyapani no kwimenyereza akazi muri sosiyete zikomeye muri iki gihugu.

Uretse kuba binyuze muri iyi gahunda abanyarwanda 26 baragiye kwiga icyiciro cya gatatu cya kaminuza mu Buyapani, ABE Initiative igira n’uruhare runini mu gutuma umubare w’abikorera baturuka mu Buyapani bifuza kuza mu Rwanda urushaho kwiyongera.

Ibi kandi bizatuma ba ambasaderi hagati y’u Rwanda n’u Buyapani barushaho kwagura ubucuruzi bw’abikorera hagati y’ibihugu zombi.

Inama ya TICAD iheruka yabereye i Yokohama mu Buyapani muri 2013, yitabiriwe n'Umunyamabanga wa Loni, Ban Ki Moon

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .