Miss Nimwiza Meghan, Iradukunda Liliane na Elsa mu bihumbi by’abazitabira Rwanda Day mu Budage

Yanditswe na Nsengiyumva Emmy
Kuya 3 Ukwakira 2019 saa 09:55
Yasuwe :
0 0

Iminsi irabarirwa ku ntoki ngo Abanyarwanda baturutse imihanda yose bakoranire mu Mujyi wa Bonn uherereye mu Burengerazuba bw’u Budage, mu munsi udasanzwe uzwi nka Rwanda Day uteganyijwe ku wa 5 Ukwakira 2019.

Aba mbere baturutse mu Rwanda bamaze kwerekeza mu Budage aho Abanyarwanda bazahurira baganira ku iterambere ry’igihugu no guhabwa impanuro na Perezida Kagame.

Mu bagiye mu gitondo cyo kuri uyu wa Kane, tariki 3 Ukwakira 2019, harimo Nimwiza Meghan, Nyampinga w’u Rwanda w’umwaka wa 2019.

Usibye uyu ariko abandi bari mu ikipe ya Miss Rwanda yerekeza mu Budage harimo Miss Iradukunda Liliane na Miss Iradukunda Elsa bo bagomba kugenda ku mugoroba wo kuri uyu wa Kane.

Umuyobozi wa Rwanda Inspiration Back Up, Ishimwe Dieudonné, yatangarije IGIHE ko aba bakobwa bitabiriye Rwanda Day ku nshuro yabo ya mbere byatewe n’ishyaka bafite ryo kuganiriza urubyiruko rw’u Rwanda aho ruri hose.

Yagize ati” Icyaduteye imbaraga ni uko ba Nyampinga bifuza gufata iya mbere mu kintu icyo aricyo cyose cyubaka igihugu. Nkaha bagiye nibagira amahirwe yo kugira urubyiruko bahura narwo bafite byinshi byo kurubwira cyane ko Diaspora ubu ari intara ya gatandatu y’u Rwanda.”

Usibye ba nyampinga berekeje mu Budage, hanagiye abahanzi barimo Intore Masamba, Jules Sentore, Charly na Nina, King James, Bruce Melodie na Igor Mabano bose bagiye gususurutsa abazitabira Rwanda Day bafatanyije na Dj Princess Flor uzaturuka mu Bubiligi, Kitoko Bibarwa uzaturuka mu Bwongereza n’abandi banyuranye.

‘Rwanda Day’ ni umunsi umaze kumenyerwa nk’uhuza Abanyarwanda bo mu gihugu, ababa mu mahanga n’inshuti z’u Rwanda, bagahuzwa n’intego imwe yo kuganira ku cyarushaho guteza imbere igihugu cyabo. Kuri iyi nshuro uteganyijwe ku wa 5 Ukwakira 2019 Mujyi wa Bonn ho mu Budage.

Kuva mu 2010, uyu munsi wasize amateka akomeye mu mpande zose z’isi, yaba muri Leta Zunze Ubumwe za Amerika no mu Burayi aho wabereye.

Uhereye ibumoso: Miss Iradukunda Liliane, Iradukunda Elsa na Nimwiza Meghan bakunze guhurira mu bikorwa bitandukanye no gukorana bya hafi
Miss Nimwiza Meghan ubwo yari ageze ku ndege yerekeje mu Budage
Uhereye iburyo: Charly, Igor Mabano, Nina, Jules Sentore, Bruce Melodie na King James bari mu bahanzi berekeje mu Budage aho bazasusurutsa abazitabira Rwanda Day

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza