Ni igitaramo cyabaye kuri uyu wa Gatanu tariki ya 13 Gashyantare 2026, gitegurwa na Imbuto Foundation, gihuza abahanzi mu ngeri zitandukanye banyuze mu marushanwa ya Art-Rwanda Ubuhanzi.

Cyabereye muri Kigali Conference and Exhibition Village (KCEV) cyitabirwa n’abayobozi batandukanye n’urubyiruko rwanyuze muri gahunda ya Art-Rwanda mu bihe bitandukanye.

Umuyobozi Mukuru wa Imbuto Foundation, Elodie Shami, yavuze ko Art-Rwanda Ubuhanzi ari kimwe mu bikorwa bya Imbuto Foundation bigamije guteza imbere urubyiruko no kurwagurira ubushobozi binyuze mu guteza imbere impano zabo z’ubuhanzi.

Ati “Art-Rwanda Ubuhanzi ni kimwe mu bikorwa bya Imbuto Foundation, bigamije guteza imbere urubyiruko no kurwubakira ubushobozi binyuze mu kwagura impano zabo z’ubuhanzi.”

Yongeyeho ko “Tuba tugamije gufasha abahanzi baza muri iyi gahunda babasha gukoresha impano zabo, bagahanga n’imirimo ishingiye ku buhanzi.”

Yerekanye ko muri icyo gitaramo hizihizwa ubuhanzi mu byiciro bigera ku icyenda ndetse hakabaho no guhemba abahize abandi mu cyiciro kigiye gusozwa.

Hagaragajwe ko kuva Art-Rwanda Ubuhanzi yatangira, imaze gufasha abahanzi 174 mu ngeri z’ubuhanzi icyenda zitandukanye, aho yagiye ibafasha kwagura impano zabo binyuze mu kubaha ubumenyi, ibikoresho, amahugurwa no gufashwa kugera ku isoko ry’ibyo bakora.

Icyiciro cya gatatu kigiye gusozwa kigizwe n’abahanzi 46 bari mu ngeri zitandukanye.

Umusaruro wa Art-Rwanda kandi uragaragara aho mu 2025 yafashije abahanzi kwinjiza miliyoni 103 Frw, ibishimangira ko ubuhanzi bushyizwemo imbaraga bwateza imbere ababukora.

Umuyobozi Uhagarariye Ishami ry’Umuryango w’Abibumbye ryita ku Iterambere mu Rwanda, UNDP Rwanda, Fatmata Lovetta Sesay, yashimangiye ko mu gihe ubuhanzi bwatezwa imbere bwaba isoko yo guhanga imirimo, iterambere no kuzamura umusaruro mbumbe w’Igihugu.

Yerekanye ko iyo urubyiruko rwubakiwe ubushobozi rushobora kwiteza imbere, guhanga imirimo ku bandi ndetse no kugira uruhare mu kuzamura ubukungu bw’igihugu.

Abahanzi banyuze muri gahunda ya Art-Rwanda Ubuhanzi mu byiciro binyuranye basusurukije abitabiriye iki gitaramo mu ndirimbo, imbyino gakondo, imbyino zigezweho, imivugo, imikino itandukanye n’ibindi.

Hahembwe abahize abandi muri iki cyiciro cya gatatu

Mu cyiciro cya Gatatu cya Art-Rwanda Ubuhanzi, abanyempano 46 ni bo basoje amahugurwa bakuwe mu bandi bari bahatanye mu gihugu hose.

Abasoje amahugurwa, bahabwa impamyabumenyi nyuma y’umwaka bari bamaze bahugurwa ndetse abahize abandi mu byiciro bitandukanye bakegukana igihembo cya miliyoni 1 Frw.

Mu bahembwe, ku cyiciro cy’umuziki hahembwe Nezerwa Ukwishatse, mu kubyina hahembwa Hirwa Christian, mu gukora filimi hatsinda Gisa Innocent, mu cyiciro cya Classic Art igihembo cyegukanywe na Bayingana Andy, mu mideli hahembwa Ndayishimiye Kamali Jimmy, gukina ikinamico (Art and Drama) hahembwe Akimana Priscilla mu gihe mu Buvanganzo hahembwe Niyere Milliam.

Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah, yashimye abahize abandi, asaba n’abitabiriye amarushanwa ya Art-Rwanda Ubuhanzi gukomeza guharanira ishyirwa mu bikorwa ry’imishinga yabo ikabyara umusaruro.

Yatangaje ko bitarenze muri Gicurasi 2026 u Rwanda ruzaba rufite politiki yihariye igenga ubuhanzi mu rwego rwo kubuteza imbere.

Ati “Ndifuza kubwira abahanzi ko natwe tugeze kure gahunda yo guteza imbere ubuhanzi ku buryo buzagirira akamaro abahanzi ubwabo ariko no kugira uruhare mu bukungu bw’igihugu. Ubu twatangiye kubaka politiki yihariye igenga ubuhanzi ndetse tukagira na gahunda y’ibikorwa y’igihe kirekire y’ubuhanzi.”

Yerekanye kandi ko hari kuvugururwa Inama y’Igihugu y’Abuhanzi n’amategeko agenga ubuhanzi ku bufatanye na UNESCO ndetse bitarenze muri Werurwe 2026, abahanzi bazitorera ababayobora guhera ku rwego rwo hasi kugera ku rwego rw’Igihugu.

Yanavuze kandi ko hari ibiganiro n’ibigo by’imari bitandukanye, bizafasha abahanzi kugera kuri serivisi z’imari no kubona amafaranga yo gukoresha mu buhanzi bwabo mu gufasha abahanzi.

Ku bijyanye na ‘Monetization’ y’imbuga nkoranyambaga zitandukanye, Minisitiri Dr. Utumatwishima, yavuze ko u Rwanda rubigeze kure.

Ati “Tubigeze kure kandi tuzajya tubagezaho aho bigeze.”

Minisitiri Dr. Utumatwishima, yasabye abahanzi kurangwa n’imyitwarire myiza, kwirinda ibiyobyabwenge no guharanira ko impano zabo zibabyarira umusaruro.

Meya w'Umujyi wa Kigali, Dusengiyumva Samuel, ubwo yageraga ahabereye igitaramo

Urubyiruko rufite impano zitandukanye rwasabwe kuzibyaza umusaruro

Abanyabugeni bagaragaje ibyo bakora ndetse abantu banyurwa na byo

Minisitiri w'Urubyiruko n'Iterambere ry'Ubuhanzi, Dr Utumatwishima, yavuze ko bakomeje guteza imbere ubuhanzi

Ndaruhutse Merci ni we wayoboye iki gitaramo

Abahanzi basabwe kurangwa n'imyitwarire myiza

Elodie Shami yavuze ko Imbuto Foundation izakomeza gushyigikira impano z'abahanzi

Umuyobozi Mukuru wa Imbuto Foundation, Elodie Shami, yavuze ko Art-Rwanda ari uburyo bwo guteza imbere urubyiruko rufite impano z'ubuhanzi

Abahanzi beretswe ko hari amahirwe ahari, ndetse Leta ikomeje kunoza ingamba zigamije kubuteza imbere

Umuyobozi Uhagarariye Ishami ry’Umuryango w’Abibumbye ryita ku Iterambere mu Rwanda, UNDP Rwanda, Fatmata Lovetta Sesay, yashimangiye ko mu gihe ubuhanzi bwatezwa imbere bwaba isoko yo guhanga imirimo

Ubwitabire bwari hejuru muri iki gitaramo cyabereye muri Camp Kigali

Abanyuze muri Art-Rwanda Ubuhanzi bagaragaje ubuhanga mu mibyinire

Indirimbo n'imbyino gakondo na zo zahawe umwanya

Abanyempano banyuze muri Art-Rwanda bashimye uko yabafashije kuba abo bari bo

Ukwishatse yerekanye impano idasanzwe mu kuririmba no gucuranga

Abanyempano banyuze muri Art-Rwanda bagaragaje impano zabo

Bakinnye imikino itandukanye mu gususurutsa abitabiriye igitaramo

Abahize abandi mu cyiciro cya Gatatu

Nezerwa Ukwishatse yahise abandi mu cyiciro cyo kuririmba

Hirwa Arnold Christian yatsinze mu cyiciro cyo kubyina

Akimana Priscille, watsinze mu cyiciro cyo gukina ikinamico, (Art and drama)

Niyera Miliam ni we wahize abandi mu bijyanye n'Ubuvanganzo

Ndayishimiye Kamali Jimmy yahize abandi mu binyanye n'imideli

Abanyempano 46 barangije amahugurwa ya Art-Rwanda Ubuhanzi