Yaherekaniwe mu ijoro ryo ku wa 30 Werurwe 2026, mu rwego rwo gukomeza kwizihiza Umunsi Mpuzamahanga wahariwe umugore, ubusanzwe wizihizwa ku wa 08 Werurwe buri mwaka.
Filime ‘Beyond the Clouds’ ishingiye nkuru mpamo, yasohotse mu 2023. Yubakiye ku nkuru y’umugore witwa Hai Qing wo mu Bushinwa wayikinnyemo ari umwarimu witwa Zhang Guimei, wubatse ikigo cy’amashuri yisumbuye mu cyaro cy’icyo gihugu, mu guha uburezi abana b’abakobwa baturuka mu miryango ikennye, hagamijwe ko baniga bakaminuza.
Igaruka ku rugendo rwa Zhang Guimei mu kurwana ishyaka ry’uko buri mukobwa wese yiga, akagira uruhare mu kugena ahazaza he inzozi ze zikaba impamo adahejwe cyangwa ngo afatirwe imyanzuro rimwe na rimwe imutesha agaciro.
Igaragaza uyu mugore arwanira ishyaka abana b’abakobwa bo mu miryango idafite ubushobozi bwo kwishyura amafaranga y’ishuri, akabajyana kuryigamo ku buntu, ndetse akanahindura imyumvire y’ababyeyi bakennye bumvaga ko umwana wabo w’umukobwa adakwiye kujya kwiga ahubwo ko agomba kubafasha imirimo yo mu rugo nko guteka.
Keza Mugisha Ornella wiga mu mwaka wa Kabiri w’Amashuri Yisumbuye muri FAWE, yavuze ko iyi filime yamusigiye isomo ryo gukomera ku nzozi ze nubwo haza ibicantege.
Ati ‘‘Yanyigishiye ko ntagomba kwita ku bansha intege nubwo haza ibibazo byinshi, ko ari njye ugomba kwifatira umwanzuro w’ikizangirira akamaro mu hazaza.’’
Ibi kandi byashimangiwe na Gihozo Nelly Blessed na we wiga mu mwaka wa Kabiri kuri iki kigo, anaboneraho kwibutsa ababyeyi ko ubukene budakwiye gutuma babuza amahirwe abana babo ngo banjye ko bajya kwiga, kuko umwana ashobora kuba ari umuntu usanzwe uyu munsi, yakwigishwa akavamo umuntu ukomeye wanahindurira ubuzima umuryango we.
Ati ‘‘Umwana w’umukobwa wese afite ubushobozi kuko twese twavukanye ubushobozi bwo kugera kure, kandi ushobora kuba uvuga ngo ‘Umwana wanjye nta kintu yageraho ngo akoze imirimo yo mu rugo ni bwo yabona akazi kenshi’, ariko ushobora gusanga agiye kwiga akagira ubushobozi bwisumbuyeho akabona umutera ingabo mu bitugu, ashobora kubona amahirwe akajya kwiga hanze, ashobora no kuba perezida.’’
Ashingiye kuri iyi filime yerekaniwe muri FAWE, Ambasaderi w’u Bushinwa mu Rwanda, Gao Wenqi, yashimangiye ko gukora ibishoboka byose umwana w’umukobwa akajya kwiga, ari ukugena ahazaza heza h’Isi.
Ati ‘‘Ibiri muri iyi filime, yaba uburinganire, guteza imbere umugore, kwiga, ni indagagaciro dusangiye […] Ntimuzatume hari ubabwira ko mutagera kure.’
Minisitiri w’Uburinganire n’Iterambere ry’Umuryango, Uwimana Consolée, yashimangiye ko u Rwanda rwakoze byinshi mu guteza imbere umugore dore ko runamaze imyaka isaga 20 ruri mu bihugu biza imbere mu kugira abagore benshi mu Nteko Ishinga Amategeko.
Yashimiye Ishuri rya FAWE rikomeje gutanga uburezi bufite ireme ku bana b’abakobwa, asaba abarebye filime ‘Beyond the Clouds’ gukomeza amahirwe y’uburezi bwiza bahawe bakazayabyaza umusaruro uko bikwiye.
