Iki gikorwa cyabaye ku wa 6 Ukuboza 2025 ku cyicaro cya ALX Rwanda i Nyarutarama, cyitabirwa n’urubyiruko rwahize abandi mu bihugu birimo Misiri, Ethiopia, Ghana, Kenya, Maroc, Nigeria, u Rwanda na Afurika y’Epfo.
Umushinga waje ku isonga ni uwitwa ‘AgriCom Assurance’ wo muri Ghana, ukaba warahawe igihembo cy’ibihumbi 10$, nk’umushinga utanga ibisubizo bishingiye ku gufasha abahinzi kubona ubwishingizi, pansiyo ndetse n’ubujyanama mu buhinzi binyuze mu ikoranabuhanga.
Umwanya wa kabiri wegukanwe n’umushinga witwa ‘Neem’ wo mu Rwanda, ku bwo kugaragaza udushya mu ikoranabuhanga rishingiye ku buzima, aho ukora tapi zimenyesha abarwaye diyabete ko batangiye kuzana ibisebe bishobora gutuma babura ingingo hakiri kare. Wahawe igihembo cya 5000$.
Umwanya wa gatatu wegukanywe na ‘URI’ yo muri Nigeria, urubuga rukoresha ubwenge bw’ubukorano (AI) mu gufasha ibigo kumva no gukurikirana ibitekerezo by’abakiliya, bakanabahuza n’abahanga mu itumanaho ndetse bagafasha abacuruzi kugera ku bakiliya bashya. Wahawe 3000$, yatanzwe na ALX.
Umuyobozi uhagarariye ALX mu Rwanda no muri Kenya, Nimmie Chaylone, yibukije abatoranyijwe ko inkunga bahawe igamije kubafasha kuzamura imishinga yabo aho kuyifata nk’amafaranga yo kwishimisha.
Ati “Icyo mukwiye kwibuka ni uko inkunga mugiye guhabwa ari intangiriro. Ni urufunguzo rwo kubafasha kuzamura imishinga yanyu no kugira icyo muhindura mu muryango.”
Umunyamabanga Nshingwabikorwa wa BK Foundation, Ingrid Karangwayire, yavuze ko inshingano zabo ari ugushora imari mu rubyiruko rufite icyerekezo no kurufasha guhanga ibisubizo bikemura ibibazo bifatika.
Ati: “Inshingano zacu ni uguhugura, gushyigikira no gushora imari mu rubyiruko rufite icyerekezo mu guhanga ibisubizo bikemura ibibazo bifatika.”
Yongeyeho ko gahunda bari gushyiraho igamije gufasha abanyeshuri 500 mu gihe cy’igerageza, kugira ngo binjire mu masomo y’ubumenyi n’ikoranabuhanga arimo Virtual Assistant, Data Analytics na Data Science, mu rwego rwo kubafungurira imiryango mishya y’akazi n’iterambere ry’ejo hazaza.
