ULK yatangije ku mugaragaro umwaka w’amashuri 2018-2019 igaruka no ku ireme ry’uburezi

Yanditswe na David Eugène Marshall
Kuya 4 Ukwakira 2018 saa 06:30
Yasuwe :
0 0

Ni kenshi twumva abantu bakemanga ireme ry’uburezi mu Rwanda, ndetse bamwe basa n’abitana ba mwana, iyi ngingo kandi ikunze kugarukwaho n’abatari bake mu biganiro biba bifite aho bihuriye n’uburezi mu Rwanda.

Prof. Rwigamba Balinda, Perezida akaba n’uwashinze Kaminuza yigenga ya Kigali, ULK, avuga ko umuti atari ukwitana ba mwana, ahubwo ari ugufatanyiriza hamwe mu kugishakira umuti, ku mpande zose bireba.

Ibi yabitangaje mu muhango wo gutangiza umwaka w’amashuri wahuriranye no gutangiza icyumweru cyahariwe kwinjiza intore mu zindi ( induction week ), kizasozwa ku itariki 5 Ukwakira 2018.

Ni igikorwa cyabereye muri Stade ya ULK ku gicamunsi cyo kuri uyu wa 01 Ukwakira 2018.

Muri icyo gikorwa ngaruka mwaka gifite inyito ya ‘Induction Week 2018’, Umuyobozi mukuru wa ULK Dr Sekibibi Ezéchiel, yeretse abanyeshuri batangiye amasomo abarimu bazabafasha mu rugendo rw’amasomo batangiye.

Kimwe mu byashimishije abanyeshuri, ni umubare w’abarimu benshi bamurikiwe biganjemo abo ku rwego rwa (PhD) n’abandi bafite impamyabushobozi z’icyiciro cya gatatu cya kaminuza (Master’s Degree ) mu mashami atandukanye iyi Kaminuza ifite.

Agaruka ku ireme ry’Uburezi ari nabwo butumwa nyamukuru yatanze muri uyu muhango, Prof Rwigamba Balinda yavuze ko hari abantu basa n’abitana ba mwana ku bijyanye n’iryo reme.

Yagize ati “Ireme ry’uburezi ni uruhurirane n’ukuzuzanya kw’ibintu byinshi byegeranywa bigashyirwa hamwe kugira ngo bitange umusaruro uboneye ku burezi umunyeshuri agenerwa, kandi nawe abigizemo uruhare rwo kuzuza neza inshingano z’ibyo asabwa, ubuyobozi nabwo bugashyiraho akabwo mu buryo bwose bukwiye.”

Yanenze cyane abajya bashinga za kaminuza nta bikoresho n’ibikorwaremezo bihagije bafite, ibyo byose rubanda rukabirebera mu musaruro muke w’ubumenyi abazisohokamo bagaragaza muri sosiyete, iki ariko ULK ikaba ari ikibazo yigengesera mu buzima bwayo bwa buri munsi.

Ageze ku barimu, hari aho yagaye abajya babona umunyeshuri ari mu kibazo, aho kumutega amatwi no kumufasha bakamushushubikanya.

Ati “Uriya munyeshuri ubuza kwiga kubera ko yakererewe, ahari yaturutse Nyamirambo cyangwa Kabeza n’amaguru, aba yaje afite ishyaka ryo kwiga nk’abandi, ntumuteze amatwi ngo umenye ikibazo yahuye nacyo uramushushubikanije uti ‘sohoka’, ntabwo ari abyo. Aba banyeshuri nibo ba bosi bacu, ndetse igihembo duhabwa na Kaminuza twese, nibo baduhemba, ni abanyeshuri ariko kandi ni abakiriya bacu, tujye tubafasha cyane bige neza.”

Yasabye abantu kwishingikiriza ku kwizera Imana mu byo bakora byose, ndetse abahishurira ko urwego umuntu yizeramo Imana ari narwo imugereramo umusaruro w’ibikorwa bye.

Kuri iyi ngingo ariko, Prof Rwigamba yakebuye bamwe mu banyeshuri bumva ko kugera ku ishuri gusa bihagije, bakarangarira ku ku mbuga nkoranyambaga, abandi bakigira mu bibanezeza nk’utubyiniro n’ibitaramo bya ninjoro, aho gukurikira neza isomo kurindi nk’inshingano zabo zabazanye kwiga.

Yabasobanuriye icyo ijambo ‘ Class Participation ’ ritandukaniyeho na ‘ Class Assistance’ mu ishuri, aho kuba mu ishuri ubwabyo bidahagije, ahubwo haba hakenewe kuba muri iryo shuri, ariko ukanakurikira buri kimwe cyose ( Class Assistance ), byongeye umunyeshuri akanihatira gufatanya n’abandi mu matsinda ( Group Work ).

Yabaciriye umugani ko nta mugabo umwe, anabashishikariza gufatanya kandi aho batumvise bagasobanuza mwarimu aho kwicecekera.

Imwe mu ngamba ULK yafashe, ni ugushyiraho Ishuri ry’Ikoranabuhanga n’Ubumenyingiro, ULK Polytechnic, ryanahawe ibikoresho bihambaye mu rwego rwo gutegurira u Rwanda, Afurika n’isi yose muri rusange abakozi bafite ubumenyi n’ubuhanga bugezweho, nk’uko Dr Karambizi Sylvestre ukuriye iki Kigo yabitangarije IGIHE.

Ibi ngo byatumye n’umubare w’abanyeshuri baturuka mu mahanga wiyongera, aho mu mwaka ushize w’amashuri 2017-2018, ULK yari ifite abanyeshuri 1160 biganjemo abaturuka mu bihugu nka Nigeria, Sudani y’Epfo, Togo, Cote d’Ivoire, Djibouti, Repubulika Iharanira Demokarasi ya Congo, Burundi, Kenya, Somalia, Uganda n’ahandi.

Mu ijambo umuyobozi w’icyubahiro wa Kaminuza Yigenga ya Kigali, Prof Kalisa Mbanda, yagejeje kubari muri uyu muhango, yishimiye urwego ULK igezeho, anizeza abatangiye amasomo n’abagarutse ku ishuri ko bahisemo neza guhitamo ULK.

Bamwe mu banyeshuri biga muri ULK bavuganye na IGIHE, bashimangiye ishema n’icyizere cy’ejo hazaza baterwa no kuba biga muri ULK, aho ndetse bamwe banatangiye gusogongera ku byiza by’ubwo bumenyi mu ruhando rw’izindi kaminuza zo mu Rwanda.

Kabanda Erica wiga mu ishami ry’imibano mpuzamahanga yabwiye IGIHE ati “kuva aho ntangiriye kwitabira ibiganiro mpaka (debate) bihuza za kaminuza zitandukanye mu gihugu, kubera ubumenyi mu rurimi rw’icyongereza hamwe no kwihangira umurimo mperwa muri iyi Kaminuza, njye na bagenzi banjye duherutse guhigika abo mu zindi kaminuza dutahukana n’igikombe mu biganiro mpaka byabaye mu Kuboza 2017.”

Avuga ko yiteguye no kuzatsinda n’ibindi Kaminuza izamufasha kwitabira bizaba biri ku rwego mpuzamahanga.

Urwo ruhare rw’icyongereza mu iterambere, ikoranabuhanga, ubukungu n’ubucuruzi ku isi kandi, nirwo rutuma ULK itegurira amasomo yihariye umunyeshuri wese utangiye kwiga.

Umuyobozi ushinzwe guteza imbere ururimi indimi muri ULK, Manirakiza Jean Baptiste, yadutangarije ko bafasha abanyeshuri umunsi ku wundi kugira ngo batere imbere mu cyongereza, ndetse anatangariza IGIHE ko hateganijwe ikizamini ku banyeshuri bashya bose (English Proficiency Placement Test).

Abanyeshuri bashya bazamara iminsi itanu batozwa ubutore n'indangagaciro hamwe na Kirazira bikwiye intore z'abanyeshuri
Inyubako ikorerwamo n'icyicaro cya Kaminuza ya ULK
Kabanda Erica ashima uburyo ULK ifasha abanyeshuri mu marushanwa ajyanye n'ibiganiro mpaka, mu mwaka ushize we na bagenzi be batwaye igikombe bahiga izindi kaminuza
Hakizimana Jean Baptiste ukuriye Ikigo cya ULK gishinzwe guteza imbere ururimi rw'icyongereza
Prof Rwigamba Balinda yaragije abanyeshuri Imana, anabagira inama yo kwizera mu byo bakora byose
Ishuri ryigisha ubumenyingiro mu myuga itandukanye, ryeretse itangazamakuru ibikoresho bihambaye ULK Polytechnic ifite
Isomero ryifashisha ikoranabuhanga aho abanyeshuri bakorera ubushakashatsi bifashishije mudasobwa na murandasi yihuta
Muri Kaminuza Yigenga ya Kigali ibikorwa byose biragizwa Imana, kandi ngo Imana igenera umuntu ibihwanye n'urugero yizeraho
ULK Polytechnic ifite ikoranabuhanga rishoboza abayigamo basohokana ubuhanga n'ubumenyi buhanitse

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza