00:00:00 IGIHE NETWORK KN KINYARWANDA EN ENGLISH FR FRANCAIS

U Bubiligi bufite nyungu ki mu guteza akavuyo agace u Rwanda ruherereyemo?

Yanditswe na Musangwa Arthur
Kuya 11 June 2024 saa 12:13
Yasuwe :

Amateka agaragaza ko u Bubiligi bwabayeho ari igihugu cyacikaguritse, giterwa n’amahanga kandi kikagenzurwa nayo kugera ejo bundi mu 1830 ubwo cyabaga igihugu cyigenga byuzuye, cyikuye mu maboko y’Abaholandi.

Iki gihugu kiri mu bya mbere byatangiye guteza imbere Inganda mu bihe bya ‘Industrial Revolution’ gusa ibintu byahindutse neza mu 1885 ubwo Congo yahindukaga umutungo bwite w’Umwami Leopord II, wawukoresheje mu kwibikaho ubutunzi ku buryo Ikinyajana cya 20 cyagiye gutangira umutungo we ubarirwa hagati ya miliyoni 200$ na miliyoni 500$ z’icyo gihe.

Ubu butunzi bw’uyu mugabo bwabonetse ku kiguzi gikomeye kirimo na Jenoside yakorewe abaturage ba Congo, igahitana abarenga miliyoni 10, abandi benshi bagacibwa amaboko kubera kudatanga umusaruro wifuzwaga.

Ibiyaga Bigari byaremye u Bubiligi

U Bubiligi buri mu bihugu byakize bikomeye cyane mu ntangiriro y’inkundura yateje imbere inganda mu Burayi, gusa benshi bibaza uko byari kugenda iyo butaza kwinjira mu Karere k’Ibiyaga Bigari, agace Umwami Leopold II yatangiye kwinjirira ahagana mu 1876.

Ubucuruzi bw’imbaho n’amabuye y’agaciro byavuye muri Congo byakijije u Bubiligi ku buryo muri ibyo bihe bwari cyo gihugu cya mbere gifite imihanda ya gari ya moshi yegeranye kurusha ahandi hose ku Isi y’’icyo gihe. Byageze mu ntangiriro z’ikinyejana cya 20 icyambu cya Antwerp ari cyo cya mbere kigezweho mu Burayi bwose.

Umwaka umwe mbere y’intambara ya mbere y’Isi, u Bubiligi bwari mu bihugu bifite umusaruro mbumbe ku muturage umwe (GDP per capita) uri hejuru kurusha ibindi bihugu by’ibigugu nk’u Bufaransa n’u Butaliyani mu gihe u Budage n’u Bwongereza nabyo bitari hejuru cyane y’u Bubiligi.

Icyakora mu gihe Ababiligi bari bari kwikungahaza iwabo, iwacu muri Afurika byari ibicika. Nyuma yo gutsinda Abadage mu Ntambara ya mbere y’Isi yanarwaniwe no mu Rwanda, Ababiligi batangiye kwinjira mu gihugu ndetse banakizanamo politiki zabo, zirimo nka politiki y’amoko yatangijwe neza ahagana mu 1932.

Abanyarwanda bajyanywe bunyago gukora mu birombe n’imirima by’Ababiligi byari muri Burasirazuba bwa Congo, benshi babyarirayo ndetse ubu bagize igice kinini cy’abaturage ba Congo bavuga Ikinyarwanda.

Uku kugabanya Abanyarwanda ntabwo byaje gutyo gusa kuko ari umurage uri mu mateka y’Ababiligi na magingo aya, dore ko ari igihugu gituwe n’abaturage bakunze kutajya imbizi, bafite politiki rimwe na rimwe ituma bananirwa gushyiraho Leta bigafata igihe.

Amoko nk’Ubuhutu, Ubututsi n’Ubutwa byahawe indi nyito, ari nayo yakoreshejwe mu gihe cy’ubukolini ubwo Abanyarwanda batangiraga gusaba ubwigenge, u Bubiligi bagahitamo kugarura politiki y’ivangura mu rwego rwo guca intege ubwo busabe.

Ibi byatumye Abatutsi barenga ibihumbi 500 bameneshwa abandi barahunga mu 1959, muri make amacakubiri aba atangiye gukwira mu Rwanda mu buryo bwuzuye, ashyigikiwe n’abanyepolitiki babi, kandi babaye babi kuko benshi bari barahawe ubumenyi burogano n’Ababiligi.

Ubuhutu, Ubutwa n'Ubututsi Ababiligi babihinduriye igisobanuro, babyifashishwa mu gucamo Abanyarwanda ibice

Byari kugenda gute iyo Akarere k’Ibiyaga Bigari kataza guhura n’u Bubiligi?

Kimwe mu bibazo bigoye kukibonera ibisubizo, ni ukwibaza uko byari kugenda iyo u Bubiligi butaza kwinjira mu mibereho y’abatuye mu Karere ka Afurika y’Ibiyaga Bigari.

Ese ubwo Jenoside yakorewe Abatutsi yari gushoboka? Ese ubu Congo iba ikennye nk’uko bimeze uyu munsi? Ese u Rwanda na Congo byari kuzigera birebana ay’ingwe? Aho byari kugenda gute iyo umutungo wakijije Ababiligi uza gukoreshwa mu gukiza benewo?

Umwami w'Ababiligi Leopold II ashinjwa uruhare mu kwica abanye-Congo basaga miliyoni icumi babaga batemeranya na politiki ye yo kubakoresha uburetwa

Ibi byose ni ibibazo bigoye kubibonera ibisubizo, gusa ikizwi cyo ni uko umuzi w’amacakubiri ari nawo ubyara kwishishanya n’ibindi bibazo byabaye muri aka Karere, byose bifitanye isano mbi n’Ababiligi.

Iyo badashyigikira amacakubiri, birashoboka cyane ko Jenoside yakorewe Abatutsi ishobora kuba yarakumiriwe mu Rwanda, ubwicanyi bw’abarenga miliyoni 10 muri Congo ntibubeho.

Byarashobokaga ko iyo Ababiligi bataza, Umwami Yuhi V Musinga atari kugwa ishyanga azira kutumvikana n’Ababiligi, byarashobokaga ko u Rwanda rubona ubwigenge ruyobowe n’Umwami Mutara II Rudahigwa wanzwe cyane n’Ababiligi kugeza bamwiciye i Bujumbura.

Iyo bataza ntabwo Patricie Lumumba ufatwa nk’intwari ya Afurika yari kwicwa agambaniwe n’Ababiligi, ngo Congo yisange mu kavuyo n’umuzimu ukiyikurikirana magingo aya.

U Bubiligi buracyashaka gutwika akarere

Nyuma y’aya mateka yose angana gutya, umuntu yagatekereje ko u Bubiligi butagifite inyota yo guteza aka Karere ibibazo, gusa urebye muri rusange, usanga ibikorwa byo kuvuyanga no guteza ibibazo muri Afurika biri gufata indi ntera.

Ubu ikigezweho ni inkuru z’umusubirizo ziri kurekurwa zivuga nabi u Rwanda, zagizwemo n’abanyamakuru basaga 50 b’i Burayi. Urebye izingiro ry’abakoze kuri izi nkuru, aho zakorewe n’ibinyamakuru bishyushye mu kuzirekura, ibyo mu Bubiligi biri ku isonga.

Iki gihugu kandi ntigihwema kwinjira mu miyoborere y’ibihugu bigize aka karere. Urugero, u Bubiligi, nyuma yo gusubiza Congo iryinyo rya Lumumba, buracyafite akaboko kanini muri icyo gihugu mu gihe amabi bwakozeyo butarayashyira ku mugaragaro, dore ko Perezida Felix Tshisekedi wa Congo kuri ubu, ubuzima bwe bwinshi yabubayeho mu Bubiligi.

Umuntu yagatekereje ko u Bubiligi, nk’igihugu cyakolonije Congo n’u Rwanda, bwakagize inyungu mu gutuma umubano w’ibihugu byombi ugenda neza, gusa ibi siko bimeze kuko icyo gihugu cyamaze gufata uruhande aho ndetse Ambasaderi w’icyo gihugu muri Repubulika Iharanira Demokarasi ya Congo, Roxane de Bilderling, aherutse kwitegera u Rwanda arutunga urutoki, asaba Congo kujyana u Rwanda mu nkiko.

Lumumba yishwe urubozo, vuba aha nibwo Congo yagaruriwe iryinyo rye nyamara u Bubiligi ntibwabisabira imbabazi

Nk’igihugu kizi neza ibyabaye mu karere, aho gushyira ingufu mu gukemura ibibazo mu mahoro no kwerekana Congo uruhare rwayo mu bibazo biyugarije, Roxane arifuza ko u Rwanda na Congo bikomeza gushwana, abaturage b’inzirakarengane bakahababarira.

Kwanga Ambasaderi Vincent Karega nta mpamvu ni ikindi kimenyetso cy’imyitwarire idahwitse y’icyo gihugu, ariko iyo bigeze ku gushyigikira Umuryango Jambo Asbl, iby’u Rwanda bihinduka ibindi bindi.

Muri make ni nk’aho u Bubiligi butahagijwe n’ibyabaye mu Rwanda ku buryo rugishyigikira ibikorwa birimo uwo Muryango bizwi neza ko ushingiye ku ngengabitekerezo yagejeje u Rwanda kuri Jenoside yakorewe Abatutsi mu 1994.

Jambo Asbl ni umuryango uzwiho gushyigikira umutwe wa FDLR wasize ukoze Jenoside mu Rwanda, ukaba ukinafite umugambi wo guhungabanya iki gihugu.

Ku rundi ruhande, ikibabaje ni uko imiryango nka Jambo Asbl iba itunzwe n’inkunga zirimo n’ituruka muri Leta y’u Bubiligi, nayo igahindukira ikayishyira FDLR.

Impamvu u Bubiligi bushaka gusambura aka Karere

Nk’uko twabibonye, u Bubiligi bufite amateka yanduye cyane muri aka Karere k’Ibiyaga Bigari, kandi bisa nk’aho budashigikiye ikintu cyose cyazana amahoro.

Mu rwego rwo guhisha aya mateka, u Bubiligi buri kubikora binyuze mu buryo butandukanye. Nko ku ruhande rw’u Rwanda, u Bubiligi bukora ibishoboka byose kugira ngo amateka yarwo yandikwe ukundi.

Gutera inkunga imitwe nka Jambo Asbl nta kindi bimaze bitari ugukomeza gukwirakwiza ingengabitekerezo no kugaragaza ko amateka ya Jenoside azwi atari yo, bagasa nk’abashyiraho ukundi kuri guhabanye n’ibyabaye.

Mu gihe u Bubiligi bwabasha kubigeraho, nubwo bigoye cyane, byatuma uburemere bw’ibikorwa bwakoze byaganishije kuri Jenoside yakorewe Abatutsi bugabanuka, bityo igisebo n’ikimwaro cy’urwo ruhare nabyo bikagabanuka.

Ku rundi ruhande, u Bubiligi buhora butera ikinya Congo kugira ngo ikomeze irangare, bityo ntizagire inshuro n’imwe itinyuka kubaza u Bubiligi ibyo bwakoze muri icyo gihugu mu myaka irenga 100 buhamaze.

Niyo mpamvu muri iki kibazo cy’amakimbirane ari hagati y’ibihugu byombi, bigoye u Bubiligi bufata iya mbere mu gushaka ibisubizo kuko nta kinini bihindura.

Iyo Ambasaderi Roxane asabye Congo kurega u Rwanda mu nkiko mpuzamahanga, ntabwo aba ari impanuka kandi ikiba kigamijwe ni ukugira ngo ibihugu byombi bikomeze muri uwo mwuka mubi.

Ntibitangaje kandi ku gihugu gifite uwahoze ari Minisitiri w’Ububanyi n’amahanga waje mu Rwanda, akaza yikoma mu gatuza ko Paul Rusesabagina wahamijwe ibyaha by’iterabwoba agomba kurekurwa, nyamara hirengagijwe abo FLN yari abereye umuyobozi yahitanye n’abo yakomerekeje.

U Bubiligi butinya igihe cyose u Rwanda na Congo byakongera kwihuza bigakorana, bishobora kurangira ingingo y’u Bubiligi igarutsweho, kandi ibyo bishobora kwica izina ry’u Bubiligi mu Karere.

Niyo mpamvu kongera gutwika aka Karere ntacyo bibatwaye mu rwego rwo kwikura mu isoni.

Patrice Lumumba wafatwaga nk'amakiriro ya Congo, yishwe n'Ababiligi nyuma y'akagambane n'Abanyamerika
Abanyarwanda bagize uruhare mu gushyiraho Leta ya Kayibanda nyuma yo kumenesha ibihumbi by'Abatutsi mu gihugu, abandi baricwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .