00:00:00 IGIHE NETWORK KN KINYARWANDA EN ENGLISH FR FRANCAIS

Mu 2015 narabibonaga-Perezida Kagame avuga ku bibazo by’abimukira

Yanditswe na Ferdinand Maniraguha
Kuya 27 April 2022 saa 02:21
Yasuwe :

Perezida Paul Kagame yavuze ko ibibazo by’abimukira bagana i Burayi bikeneye ubufatanye bwa buri wese ngo bikemuke, kuko bimaze igihe byigaragaza ko igihe kimwe bizagera abanyaburayi bakarambirwa.

Yabitangaje kuri uyu wa Kabiri ubwo yakiraga ku mezi abahagarariye ibihugu byabo n’imiryango mpuzamahanga mu Rwanda, umuhango wabereye muri Kigali Convention Centre.

Perezida Kagame yabikomojeho ubwo yasobanuriraga abo badipolomate intandaro y’umwanzuro u Rwanda ruherutse gufata wo gusinya amasezerano n’u Bwongereza, agamije kwakira bamwe mu bimukira binjiye muri icyo gihugu cy’i Burayi mu buryo bunyuranyije n’amategeko.

Ni amasezerano yasinywe tariki 14 Mata 2022. Akimara gusinywa, yavuzwe cyane ndetse bamwe bayanenga bavuga ko bisa nk’ubucuruzi kuko u Bwongereza buzatanga bimwe mubyo abo bimukira bazakenera nibagera mu Rwanda.

U Rwanda rwo rugaragaza ko nk’igihugu cyanyuze mu mateka asharirirye aho benshi mu baturage bacyo babaye impunzi, gisobanukiwe neza kubaho nta burenganzira ufite ariyo mpamvu cyemeye kwakira abo bimukira kugira ngo babeho ubuzima burenze ubwo babamo mu bigo bibakira mu Bwongereza cyangwa se mu nzira banyuramo bagana i Burayi.

Perezida Kagame yavuze ko u Rwanda rutabikoze kubera ko rukeneye amafaranga ahubwo ngo ni uko ari zimwe mu ndangagaciro z’Abanyarwanda.

Ati “Nabonye bamwe bavuga ngo murabizi, UK yabahaye amafaranga none muraashaka kujugunya abantu haano, ntabwo dukora ibintu nk’ibyo. Ntabwo tugura abantu ngo tubacuruze, ntabwo biri mu ndangagaciro zacu.”

Perezida Kagame yagarutse ku mateka y’uburyo u Rwanda rwatangiye kwinjira mu kibazo cy’abimukira mu 2018 ubwo ibihumbi by’Abanyafurika barohamaga mu nyanja bagana i Burayi, abandi bafatwa nabi mu bigo bimeze nka za gereza muri Libya.

Nibwo ku bufatanye n’imiryango mpuzamahanga, u Rwanda rwatangiye kwemera kwakira abimukira bavuye muri Libya, bagashyirwa mu kigo bitwabaho neza mbere yo kubona ibihugu bibakira.

Perezida Kagame avuga ko ubushake bwa mbere bwaturutse ku nkuru yasomye y’umusore wo muri Ghana washatse amafaranga ngo abone ayo yishyura abamujyana i Burayi, bikarangira yisanze mu buzima bubi muri Libya, abayeho nk’imfungwa.

Ubwo uwo musore yari amaze kugera muri Libya, ubuzima bwamubereye bubi yifuza kongera kwishyura abari bamuzanye aho ngo bamusubize iwabo.

Perezida Kagame yavuze ko yaje kuganira n’abandi bayobozi, bemeranya gushaka igisubizo bagatabara ubuzima bwa bamwe bari babayeho nabi muri Libya.

Ati “Twemeranyije ko baramutse bageze hano bashobora gusubira iwabo byoroshye. Icya kabiri ibyo bihugu by’i Burayi bishaka abimukira bishobora kuza bigahitamo abo bishaka , ibyo bizaba byiza kurusha guhera muri Libya. Twatanze ikindi gitekerezo, ko ku badashaka gusubira iwabo kandi batatoranyijwe n’ibindi bihugu, twe turabaha andi mahirwe turashaka uburyo baguma hano..”

Yavuze ko ibyo byose bitaturutse ku busabe bw’undi uwo ari we wese, ahubwo ariko mu ndangagaciro z’Abanyarwanda kwakira abari mu byago atari ibyo bigishwa.

Ati “Ntabwo tugikeneye kwigira indangagaciro ku bandi, twe ubwacu turazifitiye. Dushobora kwakira abantu baturutse ahantu hose.”

Yongeyeho ati “Hari ibintu utatugurishaho, twe turi abo turi bo ntabwo turi ba bantu bo kugura no kugurisha abandi.”

Iki kibazo nakibonye mu 2015…

Perezida Kagame yavuze ko mu mwaka wa 2015 aribwo yabonye ikibazo cy’abimukira n’Abanyaburayi, kizarushaho gukomera uko iminsi izagenda iza.

Icyo gihe byari mu Ukwakira 2015 ubwo yari muri Rwanda Day mu mujyi wa Amsterdam mu Buholandi.

Akurikije uburyo icyo kibazo cyari kimaze gufata intera, Abanyafurika bajya i Burayi ku bwinshi, yabonye ko umunsi umwe igihe kizagera abanyaburayi bakarambirwa.

Ati “Abanyarwanda bari baje ari benshi, mbabaza bagiye baza mu Burayi. Narababwiye nti ‘murabizi, bamwe muri mwe mwaje mubeshye, yego hari abaje mu nzira nziza, ariko benshi muri mwe mwarabeshye.’ Bamwe mwaje muvuga ko mwavuye mu Rwanda muzira politiki, bamwe mwasize mukoze ibyaha hanyuma muza mwiruka muvuga ko muhunze Guverinoma mbi mu Rwanda.”

Perezida Kagame yakomeje agira ati “Narababwiye nti umunsi umwe ubu Burayi muri gufatirana, buzagera aho bumenye ukuri kandi buzagaruka bubabaze buti harya wageze hano ute? Bazagushyira muri kontineri bakugarure aho waje uturutse. Bazagira igihe bamenye ukuri kuko nabo bafite ibibazo byabo bashaka gukemura.”

Kugeza ubu bimwe mu bihugu by’i Burayi bifite ibibazo by’ubukungu, ibindi bifite ubwoba bw’abimukira kubera ibikorwa by’iterabwoba bigenda byiyongera, ibyaha, urwango rukomeza kwiyongera mu baturage ku bimukira n’ibindi.

Hari icyegeranyo cyakozwe ku mpunzi mu Burayi mu mwaka wa 2017, kigaragaza ko 38 % by’Abanyaburayi batekereza ko abimukira baturuka hanze y’uwo mugabane, nta cyiza bawuzanira uretse ibibazo.

Perezida Kagame yavuze ko byigaragazaga ko hari igihe kizagera abanyaburayi bakarambirwa.

Ati “Nta kuntu wafata Afurika ngo uyuzuze mu Burayi ngo u Burayi buceceke, bazagira rimwe bakanguke.”

Yasabye ibihugu by’i Burayi gukora isesengura no ku bantu bamazeyo igihe baje biyita impunzi cyangwa abimukira kuko harimo abashobora kuba barasize bakoze ibyaha aho bavuye.

Ati “Ndizera ko mu Bwongereza nibohereza aba bantu bazanaturebera abo bamaranye imyaka nka 15 basize bakoze ibyaha hano. Hari abantu batanu bafite dosiye hano, bishe abantu. Bafite abantu bagakwiriye kuba bari muri gereza haba mu Bwongereza cyangwa se mu Rwanda.”

Abo Perezida Kagame yavugaga ni Vincent Bajinya, wari umuganga; Celestin Mutabaruka, wari umupasiteri; Celestin Ugirashebuja, Charles Munyaneza na Emmanuel Nteziryayo bari ba burugumesitiri bakekwaho ibyaha bya Jenoside bamaze igihe mu Bwongereza.

Yavuze ko u Rwanda rwiteguye gufatanye n’uwo ari we wese wifuza ibyiza, bipfa kuba bikozwe mu bwubahane.

Ati “Turi abantu beza, twaba abafatanyabikorwa beza n’ababyifuza muri mwe ariko mukwiriye kutumenye neza , ibigize ubufatanye bwacu bikaba bizwi neza.”

Mu 2021, Umuryango w’Ubumwe bw’u Burayi uvuga ko wakiriye ubusabe bw’abimukira basaga ibihumbi 600. Ni imibare bivugwa ko hatagize igikorwa ishobora gukomeza kwiyongera mu myaka iri imbere.

Ubushakashatsi bwakozwe n’ikigo Pew Research Center mu 2016, bugaragaza ko umuvuduko w’abimukira mu Burayi nukomeza uko biri, bizagera mu mwaka wa 2080, abaturage ‘u Burayi bamaze kwiyongeraho miliyoni 121 kubera abimukira.

Ni ukuvuga ko u Burayi buramutse nta bimukira na bake bwakira, byazagera muri uwo mwaka bufite abaturage miliyoni 399 ariko imibare igaragaza ko icyo gihe buzaba bufite miliyoni 520.

Mu myaka ya 2050, umubare w’abakiristu i Burayi uzaba waragabanyutseho 18 % mu gihe uw’abayisilamu uzaba warikubye hafi kabiri, ugeze kuri miliyoni 71 %.

Perezida Kagame yavuze ko kwakira abari mu bibazo biri mu ndangagaciro z'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .