Ibimenyetso bitanu bigaragaza aho u Burundi buganisha umubano n’u Rwanda

Yanditswe na Musangwa Arthur
Kuya 22 Nyakanga 2020 saa 07:40
Yasuwe :
0 0

Ukwezi kumwe n’iminsi itanu birashize Perezida Evariste Ndayishimiye arahiriye kuyobora u Burundi muri manda y’imyaka irindwi. Ni manda yatangiye mu buryo budasanzwe, kuko irahira rye ryigijwe imbere kubera urupfu rwa Pierre Nkurunziza yari asimbuye, n’ubu rukivugwaho byinshi.

Hari byinshi byibazwaga Ndayishimiye ajya gutangira manda, cyane cyane ku buryo azabana n’ibihugu by’amahanga, bitewe n’uko uwo yasimbuye yasaga n’uwashyize igihugu mu kato n’u Rwanda bahoze ari abanywanyi batagicana uwaka.

Mu minsi 35 Ndayishimiye amaze, hari bimwe mu byemezo yafashe byatumye harushaho kwibaza ku mibanire n’u Burundi, no kureba niba azatangira uburyo bushya bw’imitegekere cyangwa niba ari roho ya Nkurunziza ikiyobora u Burundi.

Abasesenguzi bagaragaza ko nta bimenyetso bitanga icyizere ku mubano w’ibihugu byombi, ahubwo hari bimwe mu bimenyetso byagaragaye bituma hibazwa byinshi ku cyerekezo cy’umubano w’ibihugu byombi.

Yahembye abasirikare barashe ku Rwanda

Mu gihe u Burundi bwizihizaga imyaka 58 bubonye ubwigenge, kimwe mu byaranze uyu munsi ni ugushimira abiswe intwari z’igihugu.

Mu bashimiwe na Ndayishimiye barimo abasirikare Adjudent Nitunga Jonathan wapfuye, wari uhagarariwe n’umugore we na Caporal Chef Ndizeye Fulgence "bari kumwe ari na we watabaye n’abandi agatsinda umwanzi”. Barwanye n’igihugu cy’abaturanyi yirinze kuvuga izina, ariko uburyo yagisobanuye yagushije ku Rwanda.

Muri Gicurasi uyu mwaka nibwo Ingabo z’u Rwanda n’iz’u Burundi zarasanye, nyuma y’uko abarobyi bo muri iki gihugu binjiye mu mazi yo ku ruhande rw’u Rwanda.

Icyo gihe RDF yatangaje ko “Ubwo Ingabo z’u Rwanda zategekaga abo barobyi gusubira mu gihugu cyabo, Abasirikare b’u Burundi bari ku ruhande rwabo, batangiye kurasa ku Ngabo z’u Rwanda, nazo zirabasubiza.”

Perezida Ndayishimiye yagize ati “Muzi ko mu minsi ishize wa mwanzi uhora adushotora hariya ku rubibi rwo mu majyaruguru, yaje ashaka kongera kuduhekura abarobyi bo mu Kiyaga cya Rweru, hanyuma rero muzi ko ingabo z’u Burundi zitajya zigoheka, zijya gutabara abo barobyi bari bagiye kwicirwa muri icyo kiyaga, hanyuma uyu Adjudent Nitunga Jonathan kuri urwo rugamba ni we wahasize ubuzima.”

Yavuze ko ari umusirikare wemeye kwitangira abenegihugu, icyo gihe ngo ni nawe wari uyoboye abasirikare bari kumwe. Abo basirikare bombi bahawe imidali, ndetse buri ruhande ruhabwa miliyoni y’amafaranga y’Amarundi.

Gushyigikira abatera u Rwanda ntibyahagaze

Kuva mu myaka ishize, u Burundi bwakunze gufasha abagamije gutera u Rwanda, inshuro nyinshi bakagaba ibitero baturutse mu ishyamba rya Kibira rihana imbibi n’u Rwanda, rifatanye n’ishyamba rya Nyungwe mu Majyepfo y’u Rwanda.

Igitero giheruka ni icyo ku wa 27 Kamena 2020, ubwo ahagana saa sita n’iminota makumyabiri, abantu babarirwa mu 100 bitwaje imbunda nini zirimo mashinigani (machine gun), imbunda zirasa za rockettes na gerenade, bateye ibirindiro by’Ingabo z’u Rwanda mu Murenge wa Ruheru mu Karere ka Nyaruguru, mu Ntara y’Amajyepfo.

Basanze Ingabo z’u Rwanda ziri maso zitangira kubarasa, mu gitero cyamaze iminota iri hagati ya 20 na 30 muri icyo gicuku.

Icyo gihe Umuvugizi w’Ingabo z’u Rwanda, Lt Col Innocent Munyengango yavuze ko RDF yarashe abari bateye maze bahunga basubira mu Burundi aho bateye baturutse.

Yakomeje ati "Aba bitwaje intwaro bateye baturutse mu Burundi ndetse bahunze basubira muri icyo cyerekezo, bagana mu birindiro by’Ingabo z’u Burundi biherereye ahitwa mu Gihisi ho muri Komini Bukinanyana mu Ntara ya Cibitoke."

"Abagabye igitero basize inyuma abarwanyi babo bane bapfuye, ibikoresho bya gisirikare birimo imbunda na radiyo za gisirikari n’ibikombe by’ibiribwa byanditseho "FORCE DE DEFENSE NATIONALE DU BURUNDI" (Ingabo z’Igihugu z’u Burundi). Batatu mu bagabye igitero bafashwe."

Nyuma y’icyo gitero, Guverinoma y’u Rwanda yandikiye iy’u Burundi iyisaba ibisobanuro ku gitero cyagabwe n’abantu bataramenyekana baturutse mu Burundi, inasaba Guverinoma y’u Burundi gufata ingamba zose zishoboka kugira ngo abagize uruhare muri ibyo byaha bahungiye mu Burundi, bafatwe mu maguru mashya bagezwe imbere y’ubutabera, cyangwa boherezwe mu Rwanda kugira ngo babazwe ibyo bakoze.

Nta kintu u Burundi bwigeze busubiza.

Umusesenguzi mu bya politiki, Dr Ismail Buchanan, avuga ko kuba u Burundi butareruye ngo bugaragaze ko bukeneye kumenya ukuri kuri icyo gitero, ubwabyo biteye amakenga.

Yakomeje ati “Urabizi ko hari igihe impande zombi zishobora guhagarara zikavuga ngo reka turebe hagati yacu cyangwa se dufate bamwe mu ngabo zacu bagende barebe ibyo bintu. Niba nta cyakozwe kuri ibyo, uguceceka kwabo bishobora kugaragaza ko ibyo aribyo byose byakozwe bishobora kuba hari ikibyihishe inyuma.”

“Nkumva rero icyo nacyo ni kimwe mu bishobora gutuma hadatangwa cya cyizere cy’impinduka zabaye zitanga icyizere ko amahoro yaza arambye mu gihe Nkurunziza atakiriho.”

Abakomeye ku bwa Nkurunziza bagumanye ububasha

Ubwo yari amaze kurahira, Perezida Ndayishimiye yashyizeho Minisitiri w’Intebe Gen Alain Guillaume, wahoze akomeye ku bwa Nkurunziza, ndetse yari Minisitiri w’Umutekano mu gihugu.

Bimwe mu bitangaje byagaragaye muri iyo Guverinoma ni uko imyanya ikomeye mu butegetsi yose yahawe abasirikare bakuru. Nko ku mwanya wa Minisitiri w’Umutekano, wahawe Gen Gervais Ndirakobuca wamenyekanye nka Ndakugarika. Uyu yabaye ushinzwe iperereza ku butegetsi bwa Perezida Nkurunziza.

Ndirakubocu yafatiwe ibihano n’Umuryango w’Ubumwe bw’u Burayi, Leta Zunze Ubumwe za Amerika n’u Busuwisi, kubera uruhare rwe mu ihonyorwa ry’uburenganzira bwa muntu guhera mu 2015.

Undi musirikare uri mu butegetsi bukuru mu Burundi ni Gen Gabriel Nzigama wigeze kuba Minisitiri w’Umutekano, uherutse kugirwa ushinzwe ibiro bya Perezida. Ibyo bivuze ko imyanya ine ikomeye iri mu maboko y’igisirikare, ni ukuvuga uwa Perezida, Minisitiri w’Intebe, uw’Umutekano n’ushinzwe ibiro bya Perezida.

Albert Shingiro wahoze ahagarariye u Burundi muri Loni yagizwe Minisitiri w’Ububanyi n’Amahanga.

Uyu azwi ku magambo yigeze kuvugira muri Loni ahakana Jenoside yakorewe Abatutsi muri Mata 1994. Ni ibintu abasesenguzi bavuga ko biteye impungenge ku mubano w’u Rwanda n’u Burundi byari byitezwe ko wazahuka mu gihe uwushinzwe atemera Jenoside yakorewe Abatutsi, ingingo u Rwanda rutajya rwihanganira na mba.

Ba Guverineri b’Intara bibajijweho byinshi

Muri ba Guverineri b’Intana n’Umuyobozi w’Umujyi wa Bujumbura bose hamwe baheruka gushyirwaho uko ari 18, nyuma y’isesengura byaje kugaragara ko harimo benshi bari abasirikare n’abapolisi bakuru n’abari bashinzwe iperereza.

Ni igikorwa cyatumye abakurikiranira hafi politiki y’u Burundi bakomeza kwibaza byinshi, cyane ko na Guverinoma aheruka gushyiraho iyobowe n’umupolisi urusha abandi ipeti mu Burundi, Commissaire de Police Général Alain Guillaume Bunyoni, ndetse n’imyanya ikomeye uhereye ku muyobozi w’ibiro bye, ni abasirikare bakuru.

Mu ba Guverineri bashyizweho, 13 ni abasivili, 3 ni abasirikare bakuru naho 2 ni abapolisi bakuru. Muri ba Guverineri bashyizweho na Pierre Nkurunziza uheruka kwitaba Imana, babiri gusa nibo bagumye mu myanya yabo, abo ni Venant Manirambona wa Gitega na Carinie Mbarushimana wa Karusi.

Intara zahawe abasirikare ni Bururi yahawe Colonel Bandenzamaso Leonidas, Kayanza yahawe Colonel Cishahayo Remy na Mwaro yahawe Colonel Gasanzwe Gaspard.

Naho Intara zahawe ba Guverineri b’abapolisi bakuru ni Cibitoke yegeranye n’u Rwanda yahawe OPC1 (Officier de police chef de première classe) Bizoza Carème n’Umujyi wa Bujumbura wahawe CP (Commissaire de Police) Hatungimana Jimmy.

Umwe mu basesenguzi avuga ko ukurikije uburyo aba bayobozi bashyizwe mu myanya, nabyo bifite ubutumwa bishobora gutanga ku mubano w’u Rwanda.

Yakomeje ati “Ikindi, abo baheruka gushyirwa mu myanya y’abaguverineri n’abantu nk’abo ngabo, ahaganisha ku mupaka w’u Rwanda bose ni abantu banabaye inaha kera ku ngoma ya Habyarimana, ni abantu babaye n’impunzi ino, ni abantu bazi u Rwanda, ariko akenshi ni abantu bakujije amabinga kubera umujinya.”

Ibyo byose ngo uretse kuba haba impinduka mu buryo budasanzwe, “ariko muri aka kanya nta kintu gitanga icyizere mbona mu Burundi.”

Kikwete yagarutse

Kuva ibibazo bya politiki byatangira guhinduka mu Burundi, Jakaya Kikwete, wigeze kuba Perezida wa Tanzania yakomeje kugaragara nk’umujyanama w’akadasohoka wa Perezida Pierre Nkurunziza, none ni n’umuntu uri imbere cyane ku bwa Perezida ndayishimiye.

Kikwete ntabwo yakunze kuvuga rumwe n’u Rwanda, igihe kizwi cyane ni ubwo yamaganirwaga kure avuga ko rukwiye kugirana ibiganiro n’umutwe wa FDLR, washinzwe n’abagize uruhare muri Jenoside yakorewe Abatutsi mu 1994.

Umwe mu basesenguzi yagize ati “N’ubu Kikwete yaje mu Burundi inshuro ebyiri muri iyi minsi barangije amatora no gushyingura Nkurunziza.”

Kikwete ni umuntu wa hafi ku butegetsi bwa CNDD-FDD, ku buryo bidatangaje kuba yatanga inama zizambya umubano w’u Rwanda n’u Burundi.

Umusesenguzi yakomeje ati “Mbese bisa n’aho yaje ngo badasubiranamo [nyuma y’urupfu rwa Nkurunziza]. Kuko Ndayishimiye kera yari mu bantu bandikiye Nkurunziza ko Adolphe [Nshimirimana] na Bunyoni [Alain Guillaume] ari ibibazo, none Ndayishimiye abaye Perezida ariko Binuyoni ni Minisitiri w’Intebe. N’igihe u Rwanda rutavugaga rumwe n’akarere harimo na Tanzania, ni kikwete wari Perezida.”

Gusa Dr Buchanan avuga ko nta muyobozi washyizweho wari wagira ijambo avuga rigaragaza ko hari ikibazo gihari ku Rwanda, ariko ibyaba byose byabazwa Ndayishimiye kuko ari we urangaje imbere ubutegetsi.

Yakomeje ati “Gen Evariste agomba kugira impinduka agira n’ibikorwa, aho kuba amagambo kuko burya amagambo meza yarayavuze yiyamamaza, amaze no gutorwa ariko hari ayo yavuze atari meza, atuma uhita uyoberwa uruhande ashaka kujyamo.”

U Rwanda rutegereje u Burundi

Mu kiganiro yagiranye n’urubyiruko rwiganjemo urukoresha imbuga nkoranyambaga ku wa 10 Nyakanga 2020, Perezida Paul Kagame yavuze ko u Rwanda rwiteguye kubana neza n’u Burundi mu gihe ubuyobozi bushya muri icyo gihugu bwaba bwifuza gusubukura umubano.

Yagize ati “Ubundi tubwirizwa ko abantu bakwiye kuba babana bagahahirana, ibindi byo kutumvikana bikagira uko birangira. Nicyo twifuza ko twageraho n’abayobozi bashya b’u Burundi, ari Perezida Ndayishimiye n’abo afatanyije nabo kuyobora.”

Perezida Kagame yavuze ko ubuyobozi burangajwe imbere na Perezida Ndayishimiye niba bwifuza ko ibintu bigenda neza, u Rwanda rutazagorana.

Mu minsi ishize ubwo Perezida Kagame yagiranaga ikiganiro n’Umunyamakuru François Soudan wa Jeune Afrique, yavuze ko yizeye ko itorwa rya Ndayishimiye rishobora guharurira amayira umubano mushya hagati y’ibihugu byombi.

Perezida Kagame yavuze ko na mbere hose u Rwanda rwashakaga kuzahura umubano n’u Burundi, bityo itorwa ry’umuyobozi mushya rishobora kuba inzira igeza kuri urwo rugendo.

Ati “Perezida mushya akenshi ni n’amahirwe y’intangiriro nshya. Reba nko muri RDC, twishimiye ko kuva Félix Tshisekedi yagera ku butegetsi, imikoranire y’ibihugu byombi yashimangiwe.”

U Rwanda ni kimwe mu bihugu byashimiye Gen Ndayishimiye ubwo yegukanaga intsinzi mu matora yo ku wa 20 Gicurasi 2020, rugaragaza ko rwizeye ko umubano w’ibihugu byombi uzazahuka.

Alain Guillaume Bunyoni arahirira kuba Minisitiri w'Intebe w'u Burundi
Perezida Evariste Ndayishimiye yakira indahiro z'abayobozi bakuru bashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .