00:00:00 IGIHE NETWORK KN KINYARWANDA EN ENGLISH FR FRANCAIS

Coup d’Etat, umwenda wambitswe Afurika nyamara ubera n’Abanyaburayi

Yanditswe na Léana Bisa
Kuya 18 May 2022 saa 09:23
Yasuwe :

Akenshi iyo bavuze coup d’état (guhirikwa ku butegetsi), abantu benshi bibwira ko ari umwihariko w’umugabane wa Afurika, ariko iyo urebye mu mateka hari izindi zagiye ziba ku yindi migabane ndetse hari n’izimaze igihe gito zibaye zitamenyekana kuko iziba muri Afurika arizo zivugwa cyane mu binyamakuru mpuzamahanga.

Akenshi ihirikwa ry’ubutegetsi muri Afurika ritwererwa kuba hatari demokarasi isesuye, ndetse bikaba nk’urugero rw’uko uwo mugabane uyobowe nabi. Nyamara zimwe mu ngero z’ibihugu byo ku migabane yibwira ko yagezeyo, zigaragaza ko demokarasi hamwe iba ku munwa, bakaba aka wa mugani wa ‘Nenge itirora’!.

Tutagiye kure, ku mu myaka mike ishize Coup d’Etats zisaga eshanu zimaze kuba mu bihugu by’i Burayi cyangwa se ibindi byafatwaga nk’ingero za demokarasi mu Burengerazuba no mu Burasirazuba bw’Isi.

Muri Armenia, igisirikare cyari gihitanye Minisitiri w’Intebe

Armenia ni igihugu giherereye muri Aziya. Mu mwaka wa 2021 ingabo za Armenia ziyobowe n’umugaba mukuru w’ingabo z’igihugu cya Armenia, Onik Gasparyan, zagize umugambi wo kugerageza guhirika ubutegetsi no kurwanya Guverinoma ya Minisitiri w’intebe wa Armenia Nikol Pashinyan.

Pashinyan yashinje Gasparyan n’abandi basirikare bo mu rwego rwo hejuru 40 gushaka guhirika ubutegetsi nyuma yo gushyira ahagaragara itangazo risaba ko Pashinyan yegura ku ya 25 Gashyantare 2021.

Aba bifuje ko Pashinyan yegura kuko atabashije kugarurira Armenia agace kitwa Nagorno-Karabakh kamaze igihe kaberaho imirwano hagati ya Armenia na Azerbaijan buri gihugu cyifuza gutwara.

Nyuma yo kwakira inyandiko imusaba kwegura Pashinyan yahise asezerera umugaba mukuru w’ingabo.

Muri Jordan, Hussein yari yirengeje murumuna we

Jordan ni igihugu giherereye mu Burasirazuba bwo hagati. Muri 2021 igikomangoma Hamzah bin Hussein cyagerageje guhirika ku butegetsi murumuna we Umwami Abdullah II ariko ntibyashobotse.

Ku ya 3 Mata 2021, abategetsi ba Jordan bataye muri yombi abantu 19 barimo igikomangoma Hamzah, bafungirwa mu rugo.

Abafashwe kandi barimo umugaba mukuru w’ingabo n’abandi bantu bafitanye isano na we.

Perezida watowe arafunzwe muri Myanmar (Burma)

Myanmar (Burma) iherereye ku mugabane wa Aziya. Ihirikwa ry’ubutegetsi ryatangiye mu gitondo cyo ku ya 1 Gashyantare 2021.

Igisirikare cyakuyeho Aung San Suu Kyi wari Perezida, biteza imyigaragambyo igikomeje n’ubu muri icyo gihugu cyizwiho kuba mu maboko y’abasirikare kurusha abasivile.

Igisirikare cyakuyeho Aung San Suu Kyi nyuma yo gutsindira indi manda abasirikare bakuru batashakaga, dore ko mu matora bari bashyigikiye abatavuga rumwe na Leta.

Kuri ubu ubutegetsi buri mu maboko ya Min Aung Hlaing uyobora igisirikare. Ni mu gihe Aung San Suu Kyi wahiritswe ari mu gihome.

Perezida yakuweho izuba riva muri Bolivia

Bolivia iherereye muri Amerika y’Amajyepfo. Mu 2019 Evo Morales wari uyoboye Bolivia yasabwe kuva ku butegetsi n’abasirikare n’abapolisi nyuma y’uko raporo yasohotse yerekana ko habaye uburiganya mu matora rusange.

Morales yeguranye n’aba minisitiri be bose, nyuma visi Perezida wa Sena n’umunyapolitiki utavuga rumwe n’ubutegetsi Jeanine Áñez afata ubutegetsi atangira kuyobora.

Áñez ntabwo yari mu murongo w’abagomba gusimbura Morales ku butegetsi , ariko yari umwe mu bayobozi bo mu rwego rwo hejuru utarigeze yegura.

Mu matora mashya yabaye nyuma y’umwaka Perezida wa Boliviya Luis Arce ukomoka mu ishyaka rya Morales.

I Montenegro ishyaka ry’iciyemo ibice

Tariki 16 Ukwakira 2016, habaye igeragezwa ryo guhirika ubutegetsi muri Montenegro iherereye ku mugabane w’u Burayi,

Uwo munsi hagombaga kuba amatora y’abadepite ariko hari abifuza ko ataba ngo ishyaka DPS rigume ku butegetsi. Bivugwa ko u Burusiya bwari bwihishe inyuma y’iryo hirikwa ry’ubutegetsi nubwo bwabyamaganye.

Impamvu ni uko Montenegro yahoze muri Leta Zunze Ubumwe z’Abasoviyeti ariko umubano ifitanye n’abanyaburayi uruta uwo ifitanye n’u Burusiya.

Bivugwa ko u Burusiya bwari bufite ubwoba bw’uko icyo gihugu kigiye kwinjira mu muryango wa NATO, udacana uwaka n’u Burusiya ari nabyo byatumye hategurwa ihirikwa ry’ubutegetsi ngo uwo mugambi uburizwemo.

Byarangiye Montenegro yinjiye muri NATO, ndetse abashatse kugerageza guhirika ubutegetsi barafatwa.

Turikiya, igisirikare cyagerageje gukuraho Perezida Erdogan

Tariki 16 Nyakanga 2016, igisirikare cyatunguye Perezida wa Turikiya Recep Tayyip Erdogan ubwo yari yibereye mu biruhuko.

Bamwe mu basirikare bo muri iki gihugu cy’i Burayi, bafunze imihanda y’umurwa mukuru Istanbul, indege z’igisirikare zitangira kuguruka mu kirere cy’uwo murwa ariko kuri Televiziyo y’Igihugu ingabo zidoga kuba zahiritse ubutegetsi bwa Erdogan.

Ntabwo abasirikare bose bari babishyigikiye ari nabyo byatumye Erdogan afashwa kuva mu biruhuko, yinjira umurwa mukuru atangira gupanga kwisubiza ubutegetsi.

Ingabo ziri ku ruhande rwa Erdogan zaganje izari zateguye coup d’Etat, birangira ihirikwa ry’ubutegetsi riburijwemo ibihumbi by’abagize uruhare muri ako kavuyo bishyirwa muri gereza, abandi baricwa.

Uwo mugambi washinjwe Fethullah Gülen, umucuruzi akaba n’umumenyi mu idini ya Islam wahungiye muri Leta Zunze Ubumwe za Amerika. Uyu azwiho kudacana uwaka n’ubutegetsi bwa Erdogan. Yahakanye kugira uruhare muri iryo geragezwa ry’ihirikwa ry’ubutegetsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .