00:00:00 IGIHE NETWORK KN KINYARWANDA EN ENGLISH FR FRANCAIS

Abasaga 500 basoje amasomo muri ICK basabwe kuyibera abavugizi ku isoko ry’umurimo (Amafoto)

Yanditswe na Akimana Jean de Dieu
Kuya 21 April 2022 saa 11:52
Yasuwe :

Umuyobozi w’Ishuri Rikuru Gatolika rya Kabgayi, ICK, Padiri Ntivuguruzwa Barthazar, yasabye abasoje amasomo guhanga udushya ndetse no kuribera abavugizi aho bari bityo uburere n’ubumenyi bahungukiye bikazabafasha kugera ku byo bifuza.

Ibi yabigarutseho mu mbwirwaruhame yatanze mu gusoza amasomo y’abize muri ICK mu myaka ya 2019-2020 ndetse na 2020-2021.

Ibi birori byabereye kuri Stade y’Akarere ka Muhanga iherereye mu mujyi rwagati, ku wa Kane, tariki ya 21 Mata 2022.

Umuyobozi wa ICK, Padiri Ntivuguruzwa Barthazar, yasabye abasoje amasomo guhanga udushya dukenewe ku isoko.

Yagize ati “Musoje amasomo yanyu kandi mwitwaye neza nubwo bitari byoroshye kubera COVID-19 ariko icyo tubitezeho ni uko muzajya mutubera abahamya b’ubumenyi muherwa muri iri shuri.”

“Ikindi musabwa ni uguhanga udushya kugira ngo muzanatange akazi ku batagafite kuko ubumenyi mufite bubemerera kugera ku byo mwifuza byose."

Umuyobozi Wungirije w’Akarere ka Muhanga Ushinzwe Imibereho Myiza y’Abaturage, Gilbert Mugabo, yashimye umusanzu ICK itanga mu burezi bw’u Rwanda.

Yasabye abasoje amasomo kwishyira hamwe bakoroherwa no kugana ibigo by’imari n’amabanki bakabasha kubona ubushobozi bwo kwihangira umurimo.

Uwitonze Chadia wari uhagarariye bagenzi be, yavuze ko bashimira ababafashije bakiga neza none bakaba basoje amasomo yabo neza nubwo nubwo bahuye n’imbogamizi zatewe n’icyorezo cya COVID-19, yemeza ko impamba bahawe izabaherekeza.

Yasabye ko muri iyi shuri hatangizwa "Icyiciro cya Gatatu cya Kaminuza ‘Masters’, ababishoboye bakahakomereza amasomo".

Cleophas Barore usanzwe ari umunyamakuru w’Urwego rw’Igihugu rw’Itangazamakuru, RBA, yavuze ko ubumenyi bahawe buhagije kandi buzabafasha kugera ku ntego zabo.

Yagize ati “Ni urugendo rukomeye twanyuzemo ariko twahawe ubumenyi buhagije kandi badufasha kujya ku isoko ry’umurimo ukabasha kugera ku nshingano uhabwa n’umukoresha mu gutanga ibirenze ibyo watangaga. Mbere yo kujya ku ishuri kwiga, iki kigo gifite ibikoresho byagufasha kugera ku ntego zawe ndetse naho kwimenyereza umwuga n’aho harahari.’’

ICK itanga amasomo mu by’Itangazamakuru n’Inozabubanyi, Ibaruramari n’Icungamutungo, Iterambere ry’Icyaro no kubungabunga Ibidukikije n’ayandi.

Mu myaka ishize kandi hatangijwe ishami ry’Uburezi ririmo icyiciro cy’abahabwa impamyabumenyi yo ku rwego rwa ‘Diploma’ n’abahabwa iy’icyiciro cya kabiri cya kaminuza nyuma yo gutozwa kwigisha Icyongereza n’Igifaransa, Icyongereza n’Ikinyarwanda, Icyongereza n’Igiswahili, Ubumenyi bw’Isi n’Amateka.

Muri ibi birori abanyeshuri 13 barushije abandi amanota bahawe ibihembo birimo mudasobwa ndetse na sheki za miliyoni imwe kuri babiri gusa mu batsinze neza.

Abanyeshuri basoje amasomo yabo bari bafite akanyamuneza ku maso
Abanyeshuri basaga 500 basoje amasomo yabo muri ICK, basabwa kuyibera abavugizi ku isoko ry'umurimo
Ubwo abanyeshuri berekezaga ahabereye umuhango wo gusoza amasomo yabo muri ICK
Byari ibyishimo ku bayobozi n'abanyeshuri ba ICK
Abanyeshuri bari babukereye ku munsi wo gusoza amasomo
Ababyeyi n'abaherekeje abasoje amasomo bari benshi muri uyu muhango
Ibi birori byabereye muri Stade y'Akarere ka Muhanga
Umuyobozi wa ICK, Padiri Ntivuguruzwa Barthazar, avuga ijambo
Umuyobozi wungirije uhagarariye ICK mu Mategeko, Padiri Kageruka Joseph Emmanuel
Itorero rya ICK ni ryo ryasusurukije abitabiriye ibi birori
Iri torero ririmo abari bazi kubyina bya Kinyarwanda
Ibi birori byitabiriwe n'abantu b'ingeri zitandukanye
Abitabiriye ibi birori bagerageje gufata amafoto y'urwibutso
Senateri Kanyarukiga Ephrem uhagarariye Amashuri makuru na Kaminuza byigenga
Uyu munyeshuri ari mu basoje amasomo mu Ishami ry'Itangazamakuru
Uwera Jean Maurice ukorera Televiziyo Rwanda yishimiye intambwe ikomeye yateye
Umunyamakuru wa RBA akaba n'Umuyobozi w'Urwego rw'Abanyamakuru bigenzura RMC, Cléophas Barore, ari mu basoje amasomo y'Icyiciro cya Kabiri cya Kaminuza
Patrick Nyiridandi umenyerewe mu makuru y'Igifaransa kuri RTV mu basoje amasomo
Umutoniwase Diane, umunyamakuru wa Isango star na Uwitonze Providence Chadia wavuze mu mwanya wa bagenzi be
Rutagambwa Gerard umwe mu banyamakuru bamaze igihe kirekire bakora uyu mwuga na we yasoje amasomo ye mu itangazamakuru
Biba ari ishimwe rikomeye ku babyeyi, iyo babonye abana babo basoje kaminuza
Umuyobozi w'Ishami ry'Uburezi muri ICK, Dr Joseph Kubwimana, ageza ubutumwa ku bitabiriye ibi birori
Umuyobozi w'Amasomo n'Ubushakashatsi muri ICK, Padiri Dushimimana Fidèle
Musenyeri Smaragde Mbonyintege yasabye abanyeshuri basoje amasomo yabo kurangwa n'umwete mu byo bazakora byose
Uwitonze Providence Chadia wavuze mu izina rya bagenzi be, yasabye ko kaminuza yashyiraho ibindi byiciro ku bashaka kuyikomerezamo amasomo
Abanyeshuri bitwaye neza mu Ishami ry'Uburezi bahembwe na Banki ya Kigali
Musesayose Tharcissie wigisha mu Rwunge rw'Amashuri rwa Gitarama mu Karere ka Muhanga yavuze ko igihembo yahawe ari ingenzi kuri we nk’umurezi
Padiri Bernard Dourwe wahize abandi mu bize Itangazamakuru yahembwe na Equity Bank

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .